今次小妹同友人黎到位於又一城嘅Simplylife Bakery Cafe, 相信有唔少人試過! 今次小妹收工後去到又一城時, 友人們已經剛好坐坐底左, 聽講佢地已經等左一個鐘! (圖片來源:http://www.festivalwalk.com.hk/tc/shopping/shop-detail.php?id=202) 小妹見到餐廳嘅格調, 以為啲waiters/ waitresses又係啲明明識廣東話, 但非要你講英文佢先聽得明, 呢度雖然係好有格調嘅西餐, 餐牌依然係好貼心咁附上中文, 而且大家都係可以用廣東話嗌野食嘅! 食物嘅價錢以西餐同位於又一城, 見到溜冰場黎講算係幾合理, 百幾蚊一個意粉, 加$30就有湯或沙律同野飲(冰茶或汽水)。 餐湯係蘑菇湯, 非常之香, 每一啖都有菇碎, 好滿足到小妹呢個菇菇迷! 後面係跟餐嘅冰茶, 大家唔好以為係普通檸茶, 其實佢係橙茶, 但味道小妹無試過, 因為小妹不幸地對橙敏感, 好彩waiters都好好人肯換過杯汽水俾小妹 =] 友人點嘅係沙律, 睇落都唔錯, 但小妹都係比較中意自己嘅湯 <3 <3 <3 另外, 餐包軟軟咁, 如果可以提供埋醋同橄欖油就更正! 湯都未飲完, 就開始上意粉喇~! 唔係好記得呢個係咩糙米, 小妹試左一口, 味道幾濃, 適合比較重口味嘅朋友。 牛扒, 好似係7成熟, 牛扒一上, 就傳出陣陣香味, 非常吸引, 小妹都試左一口, 煎得幾淋, 喜歡牛扒嘅朋友可以一試! 海鮮螺絲粉, 螺絲粉個樣同平時食開嘅唔同, 個汁幾香! 呢個係小妹點嘅卡邦尼雜菌偏意粉($125) , 份量雖然唔多, 但真係好好味, 每粒菇都有好豐富嘅菇汁, 友人試過小妹呢個意粉都食指大動! 食西餐, 又點可以放過係女仔都中意嘅甜品呢? 無花果青檸撻, 餅底係酥皮, 小妹小試左一口, 比較特別嘅係無花果嘅味道。 綠茶紅豆慕絲蛋糕($32), 好有層次, 有綠茶慕絲, 又有綠菜蛋糕, 底層有紅豆, 兩者味道配合得宜。 栗子朱古力咖啡蛋糕($32), 小妹其實都有栗子控, 試左一口呢個CAKE, 覺得如果栗子味再重啲會更正! 香檳草莓蛋糕($32), 其實就係一個草莓蛋糕, 上面加左啲香檳jelly。 小妹中意呢度就算出面排隧人龍有幾長, 都唔會趕你走, 而且服務幾好! 麵包同意粉都係餐廳整嘅, 好有心思, 小妹覺得如果想追女仔(or 追男仔)黎呢度都唔錯, 氣氛幾好, 價錢合理, 食完仲可以去樓下溜個冰(<-- 溜冰先係重點, 你懂的~)