淡水~ 相信係好多香港人去台灣嘅時候都會到訪嘅景點, 不過小妹要介紹嘅當然係啲比較特別嘅地方啦! 每次去台灣, 小妹都會想去淡水住返一晚, 皆因小妹曾經起淡水住過一間叫OPENROOM嘅旅館, 環境好舒服, 價錢亦好合理, 而且服務員超好人又搞笑, 可惜今次去間旅館已經轉左手, 服務員唔同左, 雖然佢地都係super nice, 但感覺已經唔一樣lu, 不過小妹下次再到淡水, 應該都會住返呢間旅館=D 講完題外話, 入返正題, 小妹今次要介紹嘅就係起淡水附近嘅貝殼廟喇! 貝殼廟顧名思義就係入面所有野都係用貝殼砌嘅廟, 神像啦, 鼎啦都係用貝殼做成嘅, 小妹係貝殼控, 當然唔可以錯過呢個咁特別嘅廟啦! 唔好以為呢種貝殼頖嘅廟會近海, 其實個廟起三芝附近嘅山上, 接近山頂位置。小妹先由位於淡水嘅旅館(近淡水老街)搭巴士(話說台灣好似叫佢做客運XP)去到三芝, 再轉乘的士上貝殼廟。 路程比我地想像中要遠, 所以我地轉乘的士之前去左巴士站(客運站)附近嘅一間隕小店, 食左碗小妹夢寐以求嘅大腸面線! 呢碗大腸面線認真不得了啊, 一碗份量剛剛好, 而且個湯(可能叫汁會貼切啲!)好濃味好稠, 感覺好地道, 當時饑寒交迫嘅我地食得好滋味! 加埋食野, 經過接近兩個鐘嘅車程, 我地終於到達, 一落車覺得好迷茫, 周圍好大霧, 而且根本見唔到傳說中嘅廟, 經司機嘅指點下, 我地先搵到簡陋到唔起眼嘅指示牌↓ 入口係一條好窄嘅樓梯仔, 上幾級後會見到類似廚房嘅地方, 千祈唔好以為行錯路, 只要穿過樓梯, 就是到靚靚貝殼廟喇! 小妹同"男貧友仔"入廟唔識拜神, 好彩有廟祝溫馨提示, 帶我地裝返枝香, , 裝香時發現, 原來連個鼎都係用貝殼珊瑚砌架! 上面嘅龍都做得好仔細, 令人不禁駐足欣賞! 廟祝帶我地入廟, 首先就要摸下呢個大琥珀元寶, 聽講個元寶重成300KG架~! 小妹只係對貝殼有興趣, 無了解過廟嘅資料, 但從對聯睇黎, 呢間廟似乎係拜濟公嘅, 廟入面有好多個神像, 左左右右前前後後都有, 所以為表尊敬, 小妹全程都雙手合十, 因為真係分唔清邊個可以拜, 邊個係許願用...(原諒小妹無知><) 跟住廟祝又帶住我地去摸大珍珠, 雖然唔知係真係假, 但真係好大粒@.@ 摸完珍珠之前, 廟祝又叫我地聞下隔離嘅酒壺, 酒壺中果然傳黎陣陣酒香味! 之後就係貝殼廟最唔可以錯過嘅地方: 十八羅漢洞 與其叫佢做洞, 我覺得叫通道會貼切啲, 因為係由嘅右邊入, 然後起左邊出。呢個通道入面好矮, 要彎腰先入到, 整個通道入面都係貝殼珊瑚砌成, 就好似進入左海底迷宮咁, 唔小心撞到唔止痛, 仲要擔心會唔會撞爛人地啲貝殼珊瑚, 而且通道九曲十三彎咁, 個頂又時高時低(高嘅都係要彎腰, 低嘅要蹲低行), 如果帶小朋友就一定要拖實, 如果唔係佢實行得快過大人~ 仲有記住要裝左香先可以入去行架!!! ←高度示範, 大家可以隱約見到"男貧友仔"條腰彎得有幾低~ 通道中仲有不少神像, 唔知係咪十八羅漢呢, 因為小妹行得好辛苦, 無數過~ 貝殼廟唔係一個好熱門嘅旅遊景點, 亦唔係咁多人會山長水遠去參觀一個廟, 不過小妹就覺得好值得喇~ 唔止因為貝殼廟真係好壯觀, 啲野真係用貝殼一塊一塊咁砌出黎好有心思, 十八羅漢洞又好新奇, 而且啲廟祝仲好好人, 好細心添!
