小妹新年好不容易放個長假, 同"男貧友仔"去左台灣旅行, 可能你會話, 車~台灣咋嘛, 有咩咁特別! 非也, 非也~ 小妹今日先同大家分享拉拉山嘅旅程先! 拉拉山, 未聽過? 其實就姐係達觀山! 盛產水蜜桃嘅地方! 不過今次小妹去得唔係時候, 過左水蜜桃嘅季節, 但唔緊要, 拉拉山仍然係一個好值得去嘅地方! 因為有超靚景! 岩晒平日生活忙碌嘅香港人去渡假! 不過小妹去拉拉山之前考慮左好耐, 因為拉拉山對香港人黎講似乎唔係一個熱門景點, 去親嘅都係台灣人自駕遊, 而且上山嘅車一日只有兩班, 民宿同景點嘅距離又好遠, 無車嘅話就好麻煩! 好彩"男貧友仔"好堅持, 決定包車上山先無錯過呢個咁正嘅地方咋! 當日包車司機起機場接我地, 本身小妹好頭痕, 因為嗰日咁岩姨媽到訪, 姊妹們都明白呢個情況坐長途車有幾咁"危險" >0< 好彩包車司機係個好好人嘅大嬸, 佢完全明白我仲間唔中就問下小妹要唔要去洗手間。大嬸超好人, 驚餓親我地, 幾乎見到有野食嘅地方就停低同我地食, 甚至請我地食, 真係超級唔好意思。 沿途見到唔少水果檔, 賣嘅生果都好新鮮! 司機大嬸仲買左幾個蜜蘋果俾我地嘗嘗鮮, 可惜我地唔小心漏左起民宿 T.T 前往拉拉山途中, 我地順便去埋附近嘅景點, 架於山谷之中嘅粉紅色橋就係復興橋, 有興趣嘅可以去行下, 因為已經併於山區, 空氣特別好, 而且風景都好唔錯架! 呢座粉紅色大橋真係幾靚, 小妹唔鐘意粉紅色都不禁起橋邊留影! 另外, 橋嘅兩邊都有啲小食檔賣串燒等美食, 不過我地就無買到, 事關司機大嬸話我地行橋嘅時候佢去買啲地道串燒俾我地食! 不過.......因為太吸引了, 連相都唔記得影就食晒lu...=P 接住落黎就係去小烏來風景區, 小烏來最出名嘅莫過於天空步道喇! 天空步道係咩? 就係一條位於瀑布上方, 地下係強化玻璃嘅U型嘅步道, 就好似下圖咁樣, 左手邊見到嘅就係瀑布, 右手邊擠滿人嘅就係條玻璃路喇 (因為小妹畏高, 又好驚相機同手機會跌落瀑布, 所以一早就收晒啲野落袋, 相都無影一副, 實在可惜!) 雖然係玻璃路, 但行上呢個步道係有嚴格嘅人數限制嘅, 而且係禁止著高跟鞋架, 所以其實好安全, 不過小妹依然係用幾乎爬行嘅方式行過去嘅, 雙手應該無離開過側邊嘅欄杆>< 緊張嘅野仲陸續有黎, 跟住挑戰嘅就係呢條吊橋 (Well, 人地個名其實叫天空繩橋架~) 一開始小妹就係輕視左呢條吊橋, 心中納悶, 點解呢條橋都要有人數限制呢?????到我差不多走到橋中間終於明白O.o 即便只限20人, 到橋中間你都會FEEL到啲風大到橋都左搖右擺咁, 再加上無論工作人員點阻止, 都總有一兩個大朋友(唔係小朋友啊!)起度跳起度搖! 小妹當時真係覺得條橋隨時斷, 但又唔敢跑, 唯有一步一步慢慢行, 做左個阻街遊客~ 緊張過後, 小妹去到瀑布底欣賞風景, 路途有啲長, 而且一路落一路諗住行返上去好辛苦, 不過當到達瀑布底嘅時候, 覺得一切辛苦都值晒~! 皆因瀑布底風景好靚, 而且有個荒廢左嘅涼亭, 感覺太有詩意喇!!!瀑布嘅水聲好大, 但係小妹覺得個心有一種好平靜嘅感覺, "男貧友仔"原本來爬過荒廢嘅涼亭度探索一番, 但俾小妹禁止左, 因為小妹每次同"男貧友仔"出遊都緊有啲意, 例如上次去墾丁我地就炒左車, 仲入埋院O.o, 其實今次小妹都心郁郁想爬過去睇下, 但見到條路斷開晒, 又荒荒涼涼咁,都係安全至上...畢竟只係行程嘅第一日, 小妹唔想上報「港女遊台不守規則墜河受傷」... 一來一回後, 其實已經接近黃昏, 司機大嬸好緊張咁話要開始上山喇, 如果唔係入黑起霧就好麻煩, 其實睇上面嘅相都睇到係有一啲啲霧嘅, 因為山上濕氣本來就比較重, 當我地到達民宿時, 啲霧已經大到睇唔到野... 呢個咁靚, 好似仙境一樣嘅地方就係小妹當晚嘅民宿喇, 住嘅係啲獨立小木屋, 木屋一行出黎就係呢啲櫻花喇! 粉紅色嘅樱花加上濃濃嘅霧, 我真係以為自己發緊夢, 感覺太唔真實了! 當時諗, 如果咁多日都住呢度就好喇...而且民宿食到嘅晚餐同早餐實在太太太好食喇, 其實都係 啲好簡單嘅食物, 但食材新鮮, 原汁原味, 加上舒服嘅環境, 真係無得輸!! 第二日早餐後, 我地先去櫻木步道, 接受櫻花嘅洗禮, 唔係講笑, 咁靚嘅地方只有小妹同"男貧友仔"兩個人, 真係難以置信! 兩個人拖住手仔, 漫步起種滿櫻花樹嘅路上, 世界好似得返我地兩個咁(羞羞>3<) 真係一個人都無架! 起香港無可能發生:p 拉拉山行程嘅最後, 亦係重點所在就係拉拉山神木區喇!!! 基本上呢, 就係睇神木, 感受大自然神奇嘅力量, 同自己嘅渺小, 小妹同"男貧友仔"起神木區行左大約兩個鐘頭, 但影嘅相好少, 點解? 因為個觀景好宏大, 個人好細, 根本影唔到, 影左都無親眼見到個feel咁宏偉! 而且啲樹太高, 實在無辦法影得好。 睇到嘛, 呢棵並唔係神木黎, 相信係佢未到神木嘅level(啲神木少至幾百歲, 大至幾千歲!), 但小妹走埋去都依然顯得十分渺小。 要行晒整個神木區要大若3個鐘, 但小妹去嘅時候有一條路封左, 不過小妹同"男貧友仔"膽生毛, 唔理告示走入去, 因為唔想miss左一半以上嘅神木, 不過小妹愈行愈驚, 地下生晒青苔, 有啲木路嘅木又好林, 好似隨時會爛咁, 好彩最後無事, 大家千祈唔好學啊!!!! 就咁樣, 出走拉拉山之旅就黎到尾聲喇, 下次同大家介紹下我地淡水嘅旅程喇~!