之前都講過，話我哋會請一個菲律賓姐姐湊BB，基本上都冇乜做過個請姐姐嘅research，衹係上綱睇資料同入group問下野咁。問下啲親戚朋友請姐姐有啲咩特別嘢要注意，佢哋好多時都係話睇下你自己好唔好彩，一係好一係唔好(咁我都知12碼 一係入一係唔入)。有個朋友A介紹個agent畀我識，個agent叫我video call姐姐先，啱嘅話先去再同佢哋聯絡，都真係幾L求其。另一個朋友B都介紹咗佢嗰間agency畀我。因為朋友B個姐姐真係好好，而且時間都開始緊迫啦，所以有少少畀呢樣嘢蒙蔽咗自己雙眼。第一次上去朋友B嗰間agency度，傾下計，我哋講下自己嘅要求先啦，最主要都係想請一個喺香港凑過初生嬰兒經驗，同埋尊重衛生嘅姐姐。話畀agent知我哋只係可以畀一張唔係好大嘅床佢瞓，因為我屋企好細。個老闆係菲律賓人嚟嘅，以前都喺香港都做姐姐，佢話佢好明白香港僱主要啲乜嘢，仲同我哋講啲菲律賓姐姐好鍾意住細屋，拖地都拖快啲喎，咁識講嘢。佢話佢喺菲律賓開咗一間培訓中心，會訓練好啲姐姐先畀佢過嚟香港，跟住就比D係當地姐姐嘅片我地睇，又話自己揾姐姐會揾啲純品，所以喺落後D啲嘅地方揾，多數冇讀大學，但係就好捱得，叫我地有定心理預備。其實我都感覺到佢哋有啲唔同屋企樓下嗰啲僱傭中心，個感覺無咁雜。咁就開始揀啦， 睇咗幾個自我介紹之後，其實都麻麻地，然後佢同我講話有個(啱啱斷約)嘅姐姐"咁啱"係度，佢話 :"呢個係自己辭職，唔係比人炒嘅，所以有D唔同"。Diu，佢講到咁誠懇，我又坐左係度喇，咁我就諗住試下見左先，其實上網好多人都講斷約嘅工人有問題，好多請過姐姐嘅都話斷約嘅係唔好嘢，我哋梗係唔想請啦，我諗係因為個agent知道我哋第一次請姐姐所以試下我哋反應，造定呢個天仙局出嚟。見完，當然啲答案好多都係Agent教定點答，斷約姐姐一定講到之前係地府番上黎咁慘， 又食唔飽又瞓唔夠咁樣，所有前僱主都係衰人。事實上"離開上一個僱主"呢啲大路問題其實冇參考價值，我淨係想知佢識唔識凑BB，最好有凑初生嘅相關經驗，有冇自己小朋友？同埋我會問佢星期日放唔放假，因為我想頭兩個月唔好個個禮拜都放假，幫我太太湊小朋友。仲有一個好強烈嘅要求就係要注意衛生。唔知點解傾計嘅時候又覺得呢個姐姐幾好，而佢又真係湊過初生嘅經驗，幾日後決定請嗰個姐姐，但係個agent竟然話佢已經比人請咗。可能天仙局就係咁。呢個時侯又有一個"斷約姐姐"出現，我即刻狗衝去見啦，由於我地冇經驗，我見我朋友透過呢一間僱傭中心請個姐姐好好，又見到上一個斷約姐姐咁快畀人請咗，咁我潛意識相信呢一間僱傭公司係好，所以好快決定要佢，一來佢有3個小朋友，而且佢同我講話佢唔需要放假，只要畀返錢佢就得啦，同埋我又驚好快俾人請左。就係咁，請左個斷約姐姐番黎。*我真係好L天真。其實斷約嘅姐姐多L過天上面嘅星星。都唔知我做乜嘢咁心急。
