上次都講咗陪月都叫做可以憑感覺請，始終都係對一兩個月時間，冇大所謂， 最理想就請到個好㗎喇。終於去到一個面對小朋友出世嘅其中一個重點:"究竟邊個湊？"諗到頭都爆埋，其實都衹係篩選咗呢幾個可能性:第一個 自己湊第二個 嫲嫲婆婆湊第三個 家庭託管第四個 上門湊BB服務第五個 托兒所第六個 菲律賓姐姐湊首先第一個都唔駛點樣解釋，呢個係最理想嘅。BB梗係自己湊番啦，正所謂有頭髮，邊個想做熾哥。有邊一個父母唔想睇住自己個小朋友一日一日咁樣長大，同埋開頭幾個月大嘅BB，有幾多個父母捨得放心畀其他人凑，但係呢一個好視乎你嘅經濟能力可以唔可以可咁做先，自己睇住佢成長係最好嘅，可以跟進佢嘅所有發展， 又可以多啲親子時間。但係我地是但一個人嗰份收入又未必可以支撐到成個家庭開支，即係我哋係冇能力唔做嘢去湊仔。next第二個就係搵一個信得過嘅屋企人照顧佢，例如係自己老母或者外母，但係呢一個係冇絕對嘅，就算你想交畀一個你最信得過嘅親人，你屋企人都可能唔想湊，我阿媽同外母真係一啲都唔想湊孫，咁又係嘅，你估湊一個小朋友唔辛苦㗎，佢會覺得你哋都係自己搞掂最好，唔好麻煩到佢，但係最令我唔明嘅就係點解開頭你哋不斷叫我快啲生小朋友畀佢湊？到生咗出嚟嘅時候，又好似冇咗件事咁嘅呢？any肥，而且老人家唔代表係一定好，有時佢哋仲停留緊喺用滾水烚奶樽嘅年代，即係我本身出世嗰時，仲係有啲奉行天生天養嘅諗法。除非佢哋本身係一個專業幼兒教育嘅人士，如果唔係效果未必同你想像中嘅一樣。例如我外父食煙嘅，佢絕對唔會因為你屋企有一個小朋友而去戒煙或者食少啲，係諗都冇諗過。又例如我朋友個婆婆日日俾BB睇電視，基本上由BB訓醒起身，除咗再瞓晏覺之外，全日都衹係開住部電視比BB睇。 唔通你叫佢老人家唔睇電視咩。有啲長輩就帶住個bb去打麻雀， 細細個就有接觸國粹。有啲就每日都去樓下同啲朋友打成兩三個鐘頭牙骹先番屋企。我估對BB發展真係有DD嘅影響。 (戴返個頭盔，都有好多湊小朋友好好嘅) next第三個方法就係睇下屋企附近有冇啲姨姨係可以幫手湊小朋友，政府有個機構係會幫你配對呢啲姨姨嘅，佢會畀啲聯絡人你，大概收幾錢同埋佢嘅工作履歷，跟住你再去搵嗰姨姨傾價錢。我哋都搵過兩種方法嘅，一個就係帶BB去佢屋企，然之後你收工嘅時候就接返佢走，另外一個就係佢哋嚟你屋企九個鐘，到你返放工返嚟嘅時候佢就收工。如果係攞去人哋屋企湊，價錢就化算啲，我搵到一個係大概二百蚊一日，好處就係佢唔會計你ot錢，即係譬如你遲咗收工係唔會因為咁樣收多你錢，同埋佢哋係多數都有小朋友喺屋企嘅家庭主婦，你可以當佢哋啲仔女陪你個bb玩或者係畀佢哋玩你個BB。對於bb嚟講成長係會快啲。咁你就可以順便參考下佢哋讀嘅幼稚園或者小學，咁就知道個姨姨有冇料到，因為佢啲小朋友讀好嘅幼稚園，至少證明佢識教小朋友。好搞笑，有啲應徵者會同你講屋企有一套迪士尼嘅教材可以畀埋你小朋友用，都幾有gimmick。第四就係啲姨姨係上門到屋企嘅話，咁就要差唔多萬零蚊一個月，因為基本上佢哋係當自己係類似陪月咁嘅身份，所以價錢係好貼陪月價，大概係三分二度，當初我就唔係好明嘅，因為又唔係湊初生bb，又唔使再照顧個媽媽，照計應該少咗嘢做㗎，點解要收咁貴呢？咁最後我明白佢哋因為放棄咗做陪月，而接你呢單生意所以機會成本嘅計算之下佢係要收呢個價錢。所以你要記住，過咗九個鐘嘅話，佢係會收返ot錢，至於伙食嗰方面都係要提供嘅。至於點解我會有呢啲料呢，因為我最後尾係請咗一個做咗個半月。第五個選擇就係一啲類似托兒所嘅機構，呢樣嘢就要睇下你屋企附近有冇，咁啱我個區有一間，不過都非常之搶手，陀緊BB五個月時，打電話去諗住報名嘅時候，已經話要排waiting list，咁我唯有"排" 住先。托兒所嘅好處係小朋友好早已經有一個群體生活，好多嘢好快就可以彼此之間學識，例如: 大小肌肉嘅運用，轉身爬行，行路同埋好快已經學識自己揸匙羹食嘢。唔好處就係當有一個小朋友病，就會導致好多小朋友一齊病，始終咁細個小朋友 病嘅話多數都入醫院好陰公。本身呢個係我哋嘅第一選擇，我差唔多每隔一個月就打去問佢哋有冇位，佢哋都好好，一直都會同我哋跟進睇下有冇小朋友係要畢業。可以流出幾多個位，但奈何佢一直都未有，我哋都要諗定plan B。咁最後一個就係請菲律賓姐姐，呢一個亦都係我哋最後選擇嘅方法，本身我覺得可以搵托兒所湊BB嘅，不過我哋諗過可能都係請一個返嚟會好好多，因為就算去托兒所我都要有人帶佢番學放學。另外屋企有cam你又可以睇住佢點樣湊BB。如果佢帶到小朋友嘅話，其實係最經濟選擇。嘅然係咁，就要開始去研究點請工人姐姐。
