差唔多廿二週我哋開始考慮請唔請陪月,因為我哋之前都想穩定咗落嚟先決定其他嘢。第一個就係問我老母會唔會照顧我太太坐月,開頭佢就係應承我嘅,但係我哋最後尾諗下諗下都係揾定先,好彩冇信佢因為佢最後尾真係放我飛機。當公佈咗喜訊嘅時候,好多時都會講起陪月呢個問題,跟住嗰啲專家tone嘅人會出嚟同你講一堆好似有用,但又唔知有冇用嘅說話,例如:"一定要請陪月呀,有陪月好好多㗎。你唔請嘅話到時冇人照顧你,會好辛苦㗎,又要湊住個仔,又要泵奶,又要餵奶,又要沖凉,又要補身,又要煮飯,又要煲湯,又要洗奶樽又要洗衫,請個陪月可以幫到你各方面嘅嘢喎。""我上次個陪月好好㗎,好多人搵佢做㗎,你試下搵佢(但係多數都畀人book咗)""橫掂你放產假嘅時候,公司都會出糧畀你,你咪當呢啲錢請個人照顧自己,唔好慳呢啲錢呀。""本來諗住有嫲嫲婆婆照顧,慳番啲,點知原來都係幫唔到手,除非兩老都係職業陪月。如果唔係,你會好後悔嗰時冇請到陪月姨姨,坐月坐得好唔好。""請嗰個陪月真係好差,我一定唔會介紹畀人囉,好後悔請左返嚟咁。""請陪月返嚟記住同你阿媽同埋奶奶單聲,因為佢哋多數都有佢哋嘅意見,如果唔係到時佢哋又嗌交,你夾咗喺中間結果令到你嘅情緒仲煩。""駛乜請呀?奶奶外母夠啦,叫埋你老公放大假咪得囉,辛苦少少慳番啲錢比BB好過啦。"始終每一個人遇到嘅都係唔同嘅人,我地綜合咁多個意見之後,就係陪月係要請嘅, 原因衹係得一個,因為始終都係第一胎無經驗,唔想到時拿手唔成勢。但係好嘅陪月你未必請得到,有口碑嘅亦都非常之搶手,總之你要預定你個陪月未必好,只係減輕你嘅負擔,咁嘅心態可能會舒服啲。但係你都要畀幾皮嘢佢幫你手。因為你係要同佢簽約,仲要畀定三份一做訂,佢先會留個期畀你。點都好,都搵一啲陪月姨姨見下,我太太膽粗粗喺網上揾一啲好多人推介嘅陪月(多數嗰班都係畀人係親X王國讚到天上有地下無嘅"星級"陪月)。好快就有人回覆你㗎啦,但係多數嘅答案都係:"我嗰段時間唔得閒不如介紹另一個畀你,可唔可以?"當時我哋心諗: 咁奇怪嘅,唔係真係咁搶手呀?"仲要出咗名嘅陪月姨姨個個都咁爆,唔怪得知啲post成日都話,你有咗之後差唔多15週,就要開始搵定陪月,如果唔係越近你生嘅時間好嘅陪月就已經畀人book曬。但後尾我哋終於知道,原來係一個"出名"陪月姨姨介紹畀另外一個陪月姨姨係有佣金抽嘅。大概係2000至3000蚊,所以有啲"星級" 陪月淨係做介紹人都已經有一個幾好嘅收入,就係好似啲大判咁樣淨係搵人頭,根本佢哋都唔使點樣做。另外有一啲陪月都係行緊師徒嘅制度。師傅接到啲生意,就會叫返啲徒弟做,呢類型就係只係需要封利是就得。 (戴定頭盔,呢啲我都係聽人講)講住咁多先仲有一半末講,下次講。