我同我太太本身一齊嘅時候都唔會特別煮飯,廚房基本上係用嚟擺嘢,但係當佢陀bb嘅時候,冇理由再係成日食出面外賣叫嘅嘢,其實好多時都係食外賣可能只係盡量揀啲唔係咁重味精嘅嘢。我哋同奶奶外母又住得好鬼遠,基本上只係星期六嗰日先可以返去屋企食餐屋企飯。因為我做嘅工作比較夜收工,所以好多時佢等我返嚟整嘢食畀佢。事實上好多嘢都係逼返嚟,你要諗點樣可以畀到多啲營養佢,就算唔係大魚大肉都起碼唔好餓親佢,有三件廚房用具係喺呢段時間幫咗我好大。一個就係panasonic嗰部細蒸焗爐(大部分人都叫做細P),因為佢真係好L方便,一個咁細嘅爐又有得焗又有得蒸嘢食真係去邊度搵呀,重點係只不過千零蚊,唔識煮飯嘅人嚟講真係強烈推介。多數我會選擇去一田買三文魚,比目魚,泰安雞同埋買一啲無激素豬仔肶嚟焗,基本上返到嚟洗一陣,用海鹽同黑椒調少少味就焗得,沖完涼就已經有得食。無錯,全部都係用同一種調味方法好彩我太太冇覺得悶。因為真係冇時間再諗有啲咩花款。有時如果見到有黃花魚就會買返嚟用蒜蓉豆豉蒸,咁點解唔去街市要一田買魚呢?係人都知一田貴啲㗎喇,因為佢真係幫你洗乾淨曬,返嚟沖沖水就ok,因為洗乾淨一條魚係要用多少時間,懶人就要用懶人嘅方法,而且呢三種魚都對孕婦或者bb非常好。不過有時都會去街市買鷹倉同埋桂花魚返嚟蒸,桂花魚就唔係好推介,好食就好食,營養價值方面就應該冇三文魚同黃花嗰啲咁好。後期啲嘅時候,因為要谷大個胎,就會食牛肉牛扒,呢個都係朋友講畀我聽嘅方法,但係非常有效。同埋有個小貼士,每一個朝早我太太都會用蒸焗爐蒸兩隻雞蛋返工食,因為用烚嘅方法成日都穿,用蒸焗爐蒸十幾分鐘,個效果都等於烚蛋。蛋黃對於bb嘅腦部發展好重要,所以孕婦一定要食埋蛋黃。仲有一部就係Rasonic嘅燉盅,喺匯豐嗰個獎賞錢到換。燉盅好處就係佢唔會煲到入面個湯乾水,最多個燉盅煲到出面啲水乾曬自己熄機。(之後bb整嘢食都有用)我多數用嚟《燉肉汁》畀太太飲,之前嗰日放工買定嚿瘦肉(買一田嗰啲本地黑毛豬),朝頭早返工嘅時候就切曬一片片放落個燉盅度,就完成。然之後煲到夜晚佢放工返嚟就自己攞嚟飲,燉盅嘅好處係唔使理佢擺幾耐都得,(相或者video嘅教學過程我就冇喇,如果想整嘅話,就參考下其他人嘅youtube)學識整呢個真係冇壞,因為到太太坐月嘅時候基本上都要日日燉肉汁畀佢飲。咁有時我亦都會攞返個燉盅整《紅棗蟲草花燉烏雞湯》,一來佢好鍾意飲,二來又係超級方便,放工買定隻烏雞,朝頭早雪櫃攞出嚟拖水,凍水一齊落煲到滾起,可以加返舊瘦肉,螺頭,紅棗,蟲草花全部掉曬落個燉盅到加水就搞掂,咁我太太放工又可以番黎有啖湯飲下,基本上係超級快同埋超級易整。而對於大肚婆嚟講營養價值都好高。早期會煲《椰子花膠燉烏雞湯》,但係後尾佢覺得花膠好腥之後就冇再煲。椰子我會用印度椰子(叫街市佬用部機切碎,我就未試過自己切),加幾粒栗子( 街市有啲剝咗皮嘅),花膠就之前嗰晚開始發,然之後加舊瘦肉一齊燉。我太太每日飲兩包田原香滴雞精,(係要擺喺冰箱嘅冷藏滴雞精,因為感覺上應該比室溫嗰隻少啲防腐劑),而且味道都唔錯。但麻煩在唔可以即刻飲,我哋就會用燉盅嚟溶咗先,之後飲 。最後就係panasonic萬能原汁煲,衹係用黎煲湯用,因為佢話可以保住啲營養同埋佢個樣唔似嗰啲大陸煲湯電煲咁樣衰,不過之後就好少攞出嚟用,唔健議買。懶人用佢嘅方法係喺百佳買一啲包裝《花生雞腳眉豆湯》嚟煲,衹要返到屋企全部材料用水洗一次,用水浸住啲花生同埋眉豆,之後每一隻雞腳剪曬佢嘅腳指甲,拖完水之後就一齊煲,其實放工八點鐘開始煲,煲到九點鐘差唔多有得飲。因為佢類似係壓力煲咁樣。想再簡單啲嘅話就係《蕃茄薯仔紅蘿蔔肉碎湯》,呢一個湯真係終極簡單,只需要洗乾淨個薯仔同埋紅蘿蔔,刨曬啲皮,洗乾淨啲蕃茄切開,全部連埋啲肉碎倒落去個煲度再加水,完。星期六日就一定會用嚟整啲魚湯畀佢《大眼雞煲蕃茄薯仔湯》 因為大眼雞冇魚鱗,同埋聽講佢塊皮都好有營養。首先連皮煎完佢兩邊金黃色,預備定一煲滾水,煎到咁上下就到撞埋啲滾水落去變白色湯,加埋砌好咗嘅蕃茄薯仔煲大概九個字就搞掂。如果唔想蕃茄薯仔嘅話可以試下《大眼雞煲節瓜豆腐》 呢個就冇咁甜,不過都好飲,其實其他魚都得嘅我用大眼雞係因為我覺得大眼雞比較清洗方便,因為佢冇魚鱗。有時我都會用紅衫魚,或者魚檔有石祟魚嘅話,就一定買石崇魚(呢一種魚洗嘅時候一定要好小心,因為佢哋都幾尖)。因為有時佢都口淡淡或者口乾,所以我就會整糖水畀佢,會整《腐竹蛋糖水》 我嘅食譜就係用初生蛋,腐竹,冰糖直接煲一個鐘就搞掂。千祈唔好加白果同薏米。同埋《芋頭西米露》 呢個就真係去雜貨舖買西米浸倒冧,加冰糖,芋頭同花奶。其實我全部整嘅嘢都冇難度,如果其他人真係冇時間,又冇工人,又冇父母喺附近,我覺得都可以參考下,大肚婆最緊要係自己啱口味。當然我太太都有食supplement,每日會飲一包鈣思寶,其實食啲乜嘢我本人覺得都唔係最重要,最緊要係保持住樂天感恩嘅心咁到時就可以開開心心迎接新生命。下一個難關應該就係要請陪月嘅問題。