究竟私家開刀生?定QE順產生?講真私家醫院同公立醫院一定會有比較,如果係政府到生仔都係幾舊水埋單,有優勢,話曬我哋都係一個窮L。當你search google嘅時候你就會睇到好多係政府醫院生嘅好野。其實好多人都會讚政府醫院其實一啲都唔差,同埋好多報告都有講過話小朋友順產嘅話,對於佢哋嘅健康會好好多,呢一個亦都係我太太一直想順產嘅主要原因。而且私家醫院生仔,點樣計都要6, 7萬蚊起跳,如果以錢嘅角度同BB健康嚟睇咁梗係政府醫院生仔好啲,加上我地睇嘅係QE,口碑一向都唔錯,姑娘都好好。啱啱幾個月之前有個好朋友太太喺生嘅時候,BB係安全出世,但係之後我朋友太太突然間失血過多,然之後喺嗰度做咗四個鐘頭手術。另外一個係我太太個表妹,唔知道係咪唔夠力生,BB要吸出嚟,令到頭骨裂咗,住咗12日深切治療部。仲有一個係我同事,佢喺生嘅時候因為一大班學生喺度一齊研究學習,搞到佢好尷尬。其實對於我自己嘅諗法就係私家醫院開刀,但對我哋嚟講鄭昆瑜醫生個價錢都係貴嘅,我太太覺得慳返啲錢第時畀BB會好啲,我相信好多媽咪都會有咁嘅諗法(母愛永遠都係慳自己)。不過我覺得我太太食緊阿士匹靈,好似睇開佢嘅私家醫生幫佢接生會心裡上會好啲。除左BB嘅安全之外媽咪嘅安全都好緊要。雖然太太要捱一刀,但唔使生咁多個鐘頭咁辛苦。另外又可以畀到BB夾佢時辰八字嘅日子出世,如果我哋揀嘅時間,可以令到BB嘅人生行得暢順嘅話,我覺得開刀生係我哋畀BB嘅一份禮物, 希望嚟到呢個世界順順利利,健健康康,同埋聰明伶俐。而且私家醫院有酒店般嘅服務,無論係生產過程,姑娘態度同埋住院嘅時候都會舒服啲。原因係我太太因為之前有流啡嘅情況住個兩次公立醫院,個感覺都唔良好,嗰啲姑娘可能要照顧太多人 所以面口都有啲西 (香港醫護真係好唔夠人)。事實上你係唔會後悔你揀咗私家醫院生BB。我哋揀嘅係仁安醫院,呢樣嘢都唔使講太多因為好多媽媽都已經極力推介我哋去呢度,同埋我有個中學同學係度做助產士,好多中同個bb都係佢接生,所以我哋都搵咗去幫手,陪住我同我太太一齊,感覺好似有個熟人幫你會舒服啲。但係最笨嘅係自己遲咗去落訂,冇喺佢加價之前畀錢,結果蝕咗幾千蚊。*喺鄭醫生個診所嗰度遇到另一個中學同學,佢個小朋友早過麻薯波波半年出世。然之後仲有我老豆個friend個女竟然都係搵鄭昆瑜醫生開刀,只係遲過麻薯波波出世十幾日。所有嘢感覺真係好奇妙。