當bb喺個肚入面一日一日咁樣長大,你就要開始進行一個又一個嘅檢查。而每一個重要檢查都會令我好鬼緊張。首先第12週倒就做T21,檢查基因方面有冇問題。醫生只係抽一支血,就可以驗好多嘢,呢個技術真係好偉大,雖然真係有啲貴。我個人覺得真係唔好因為價錢平啲做大陸嗰個nifty,之前睇一啲報導講佢出錯率甚高,喺大陸已經令到一萬五千個bb因為佢嘅報告錯誤而被墮胎,因為竟然可以搞錯bb嘅性別。其實你驗得dna係冇可能搞錯到個性別,只要你驗到母親嘅血槳內係有男性dna,就即係證明你個bb係仔,反之冇男性dna咪就女囉,如果nifty咁都錯嘅話,你仲信唔信佢其他嘢 ?況且t21其實係一個香港教授級嘅盧煜明醫生發明,世界各地都好多地方免費提供t21呢一個技術比孕婦,個人感覺良好(雖然t21個lab好似都係喺大陸)。當然我有啲朋友都覺得乜都唔使做可以慳番幾千蚊,呢啲都係睇餸食飯。最後好感恩乜事都冇,同埋知道係男仔嚟。 (戴頭盔時間,我唔係專家我都係睇google。)然後就係照結構,鄭醫生好細心咁同我哋講解,佢有個list,話畀你聽邊一個部分我哋已經照咗,有少少似點貨咁樣。開始主要係照下啲手腳骨,幫下bb數下手指腳趾,埋牙就係睇塊面嘅鼻骨同埋兔唇位 ,跟住會睇下腦仔,四個心室,肝脾肺腎之類嘅內臟同埋血管分佈,每次佢用超聲波機照到啲內臟都會問我哋見唔見到,老實講我真係唔知點樣睇到,其實都係醫生你話冇事就係冇事,好感恩所有嘢都好正常。我記得照嗰日bb非常之頑皮,點都唔肯轉身,足足玩咗四個鐘。我覺得搵婦產科醫生最好就搵個肯做埋照結構嘅,一來唔洗book黎book去,二來就因為佢一向都睇開你BB,嗰種感覺會穩陣啲。點解我咁樣講呢? 因為我哋比較蛇呱,我地再搵多一個叫覃醫生嚟照多次結構,我相信冇其他另外嘅人好似我哋咁痴線照兩次結構。覃醫生係一個半退休狀態嘅醫生,唔會再做接生衹做門診,態度都好nice。因此我知道原來唔係話個個醫生都有期比你照結構,好嘅醫生一早就畀人book曬,如果你睇開嗰個醫生係有做照結構嘅話,就唔需要擔心,佢一定要安排到時間畀你。若然你要出去另外再搵照結構醫生嘅話,你要就返BB 18-22 week 個段時間心儀醫生有冇期,冇嘅話你就要再繼續搵,聽到都覺得麻煩。同埋另外book嗰個醫生度照結構,如果冇咁貼心嘅話,唔知會唔會有影響,純粹係感覺嚟嘅啫,唔代表佢地唔專業。另外有一日會返去伊利沙伯醫院度幫BB度頸皮,係啲護士姐姐做,度咗三次,用咗七分半鐘。之後返去鄭醫生嗰度叫佢幫手度多次,叫做量度咗冇問題,又過一關,再一次感恩。呢個檢查都好重要, 除咗t21之外,度頸皮都係睇下啲小朋友有冇唐氏綜合症嘅表徵,如果我冇記錯嘅話,政府呢度係唯一一次係有一部"大型"超聲波機(即係出面私家醫生嘅普通超聲波機)同bb 打個招呼。順便講下QE嗰度做啲乜,有限嘅記憶衹能夠記得幾樣嘢。記得每次覆診都係唔同醫生嘅,大部分都係年輕有為,後生仔為主。反而啲助產士仲緊張,記得有一次問:"BB平時有冇踼媽媽,八至十個鐘內大概郁幾多次,爸爸媽媽有冇同bb傾計?"我哋全部都話冇留意,搞到佢哋都好擔心,因為太太真係冇感覺過bb喺肚入面有冇喐動,唔似其他人個肚會浮起凸起。所以要我哋做功課,每一日要白紙黑字記低BB有冇郁動同埋係幾點鐘,下次覆診嘅時候要交返畀佢睇。PS. 記得做爸爸嘅每晚都應該同BB傾計,佢真係會畀反應你,我覺得呢啲係一種好特別嘅經驗,順便可以bb早啲聽到你把聲。跟住有一日會叫你上學習餵母乳班,我仲唔小心瞓著咗。之後畀咗份嘢你填,話如果你生嘅時候用啲咩方法麻醉,點樣預備走佬袋嗰D野。飲糖水時太太就覺得冇乜嘢,係排條隊好長,可能嗰度又熱又攰,佢一口氣當寶礦力咁飲,搞笑。驗b鏈球菌就應該冇事,因為我完全唔記得咗有呢件事發生。最後一次覆診嘅時候都有部同手提電話差唔多大部嘅超聲波機同你check,老實講都睇唔到啲乜嘢嘅。有樣野真係要講,就係睇完QE去食澳牛大肚婆真係唔駛排隊 🤣🤣