呢個時候我揾極都搵唔到人幫我太太再驗多一次,突然間記得我個friend個未婚妻係做護士,咁我就問下佢究竟有冇辦法,原來佢都係喺海港城入面做另外一個婦科診所嘅。佢真係好好人,一口答應幫我搵個醫生私底下簽張醫生紙比我太太去化驗室嗰度驗多次抗磷脂報告。(因為呢個報告好似係去美國嗰度驗,唔係香港是但一間實驗室可以做到,當然可能係我見識少被人水,有錯嘅話請多多包涵),價錢大概千五蚊。其實佢除咗幫我搞掂化驗報告之外,佢仲私底下幫我哋問咗幾個婦產科醫生,雖然佢哋冇面對面咁樣睇我哋,但係個個都有睇我太太個報告,都畀咗幾的專業嘅意見我哋參考,真係好感謝我朋友個未婚妻。結果出到嚟個報告係冇事呀,終於放下咗一個心頭大石,最後尾我太太都係決定繼續食阿士匹靈,但係就唔打肝素針。總之難關難過,關關過~喺呢個時候,陳醫生團隊要我地落"訂"開刀(佢話係唔會接順產嘅),又點都要我地打針(就算我哋證明咗畀佢聽話我哋冇事)。我同佢哋講我: "我地未決定係咪開刀生BB喎。"陳: " 如果你哋唔搵陳醫生開刀嘅話,陳醫生係唔會再見你地。"我: " 我地宜家諗住唔打針,所以先唔想開刀。"陳: "你哋選擇唔打針, 醫生都唔會見你地,更加唔會幫你哋開刀"我: "咁我地食開嗰D藥點算?"陳: "你地自己諗喇"同太太商量後,既然選擇唔打針嘅話,陳醫生又唔肯我哋喺冇打針嘅情況之下睇落去,唯有博一次。雖然好嬲,但其實都要多謝陳醫生,因為如果唔係佢幫我哋做呢啲檢查嘅話,我都唔知道咁多關於呢啲嘢嘅問題,不過可惜我哋冇繼續落去。聽講佢幫人開完刀生仔之後會唱生日歌,好有趣。我哋去返鄭昆瑜醫生嗰度睇,老實講我覺得佢係好好,每次都好細心咁睇BB,亦都好關心媽媽心理同生理狀況,有一次我太太唔知乜事好驚,佢就話"你要做媽媽喇,唔可以再咁驚青。"我太太即刻醒曬。 同埋佢有關心人同鼓勵人嘅語氣,呢一樣野係令太太覺得好舒服。加上(2019年嘅時候)佢嘅醫療設備係最新嘅,至於其他醫生就用咗一段時間,斷估你睇嗰個超聲波嘅圖,你都想睇得清楚啲㗎,有啲醫生嘅設備真係好落後,個電視又細啲畫面又矇查查。碌兩野個肚就話"ok"求其到呢?同埋女醫生我覺得做婦科係好嘅,始終生仔都係女人,我諗佢會明白我太太嘅心理狀況多啲,我相信男人始終都唔能夠明白一個BB喺肚入面嘅感覺。佢唯一唔好嘅地方就係要等好耐, 你要預咗坐一至兩個鐘喺佢嗰度。雖然冇繼續睇陳醫生,不過太太都有照食阿士匹靈同葉骸,我地Keep住兩星期會驗一次D Dimer,直到生之前兩個月。當初係去佐敦嘉賓商業大廈 驗,但係見到啲姑娘又求其,又冇消毒,又冇換手套,又好多大陸人驗野,又唔L係平。最後尾我哋轉咗去旺角雅蘭一間Lab驗,最正係有一個註場唔知係咪醫生嘅醫生幫你抽血,仲要幾好傾。次次都同我哋講: "唔使咁緊張,你哋冇事㗎啦,慳番啲錢,唔使驗得咁密㗎。"