關島遊記壓軸出場的係酒店，一間超舒適的酒店 - 關島希爾頓酒店(Hilton Guam Resort & Spa)。總共住左6晚，一句講曬我好鍾意間酒店！哈哈！下面再慢慢介紹，先講講位置。關島杜夢灣係一個遊客區，大部份酒店同大型商場都係呢個區，而希爾頓酒店係位於呢個區最盡頭，都可以話係離商場區最遠的一間酒店，呢樣要留意下。但其實酒店門口有巴士去主要商場，所以都唔會太唔方便。而最令我難以忘懷的係間超級海房！！！ 最愛無敵海景房 唔知大家有冇印象我去三亞都係住希爾頓酒店，其實兩間房好相似，房型都係海景露台房，不過關島呢間就冇按摩浴池，但個海景比三亞正好多！！！對住成個杜夢灣，係真係超超超靚！！！我每日都會抽少少時間坐係露台望住個海發呆，真係太寫意了。每朝一睜開眼就見到超級海景係一種幸福。有朝仲見到日出，簡直係驚艷！！唔同時間有完全唔同的海景。夜晚有時會見到星星，但唔多。間房好大，床又好舒服，仲有粉藍色的牆好柔和，整體黎講非常舒適！丫，個浴室就正正常常冇咩特別，有浴缸的。 點擊圖片放大 +4 餐廳密密食 平時自己旅行除左早餐外真係比較少會去酒店餐廳食，因為總覺得出面有好多好野食。不過因為今次係公幹的關係，7日行程，公司本身已經安排左4晚都係酒店餐廳食自助餐，所以就有機會試下。酒店總共有3間餐廳、1間池畔bar同1間在24小時開放的外賣cafe。 3間餐廳中自助早餐同晚餐都係Islander Terrace入面食，早餐食物選擇都幾豐富，中、西式都有，而且有水準。但食左5日都似乎冇點見到有換新既野食，所以真係食到悶悶地。而酒店就有個好貼心的安排，就係住客可以自由選擇食自助早餐或者去lobby間cafe cino換一個set代替早餐。個set有3樣野：一份三文治或一件蛋糕再加一盒生果同一杯野飲，好飽而且味道都唔錯！非常欣賞酒店呢個餐飲安排，可以換換口味！而cafe仲有雪糕、特飲同少少熱食賣，24小時開放，食宵夜岩曬！ 至於自助晚餐，又可以見到酒店另一種細心，就係晚餐每日的主題都唔同架！雖然buffet黎講就算咩主題都一定有相似既食物，前菜、沙律、甜品係大同小異既，不過都見到酒店係有花心思諗過菜單，食物都真係好配合主題，好似星期二的Asian night會有冷烏冬同天婦羅，又會有湯圓個d中式甜品，其他日子冇既，所以食左3晚感覺都還好唔會食到唔想食。特別推介係西米露超級好食！！！可能因為關島盛產椰子，椰汁好香甜，好味到我一晚要食幾碗！！！（嗚講起就好掛住） 每個星期5，在泳池旁的Tree Bar會有Tropics BBQ自助燒烤晚餐，有好多燒物，燒龍蝦同燒牛扒都好好食！而呢個晚餐的重點係有表演！大約兩個鐘入面大家可以一邊食野一邊欣賞民族舞同玩火表演，拎住條火棒狂fing個種呢。表演者仲會邀請台下觀眾一齊上去跳下舞做下示範，氣氛好熱烈。但我個人就覺得表演有點太長啦......雖然可能係跳緊唔同既舞，但感覺都係好重重複複。但感受下氣氛就幾好的。Tree Bar在室外，會見到海景，環境好舒適寫意，唔去食自助餐去飲下野感覺都好relax呢。整體而言酒店的餐飲部份都好有水準。 點擊圖片放大 +3 泳池與海灘 酒店叫泳池個部份做水上樂園，有一個大主池，另外有3個比較小型的泳池，其中一個有水上滑梯，好多小朋友去玩。另外一個係溫泉池同一個望海的infinity pool。我主要都在主池玩水，個池唔算大，人又多，所以感覺會好熱鬧，但唔係我想要的悠閒。（後來後悔冇去infinity pool，景色應該很好）另外酒店仲有私人海灘，泳池行出少少就係，原本好期待，但原來佢係類似石灘個種，一落去就係石同水，冇沙的，唔可以舒服攤係沙度曬太陽，連玩水都有困難，主要係游水同玩水上活動。酒店本身可以租借用具同安排水上活動。但總括黎講呢部份係有點失望既。 點擊圖片放大 +4 美麗而遙遠的教堂 貴為結婚蜜月勝地，關島的教堂靚到出晒名。酒店都有兩間教堂，一間叫Aqua Stella Chapel，另一間叫St.Probus Holy Chapel。我只去了Aqua Stella，另一間要行遠少少所以冇去到。（但後來發現其實冇去個間更有特色，係原始風格的！旅行就是不停的錯過再錯過......）Aqua Stella Chapel是比較典型的白色教堂，細細間，後面係可以望海景的落地玻璃。間教堂靚就幾靚，但教堂被草地包圍，而草地有好多四腳蛇。好！恐！怖！還要是中型的size，不是家裡遇然看到那種小小的。原本想走近一點影多幾張相，但實在太多四腳蛇，我心裡一直發毛，所以真的沒辦法......只能說有很多東西真的可遠觀而不可褻玩，太神聖的地方不能走太近。 點擊圖片放大 +2 酒店還有一間賣手信的店，手信種類都幾多。 我返左黎已經兩個月，都仲記得當時住既房號，以往所有旅行住的房號我都唔記得，可想而知我有幾鍾意我間412號房！哈哈。由於酒店間房好滿意，餐廳都不錯，員工們大多很親切，價錢都好合理，所以總結係值得推介。 關島希爾頓酒店 Hilton Guam Resort & Spa 海景露台房連早餐約 US$200/晚 (約HK$1560) 少女旅行日記 La La’s Facebook :https://www.facebook.com/lalatraveldiary Blog:http://lalalovetravel.blogspot.hk/
