早前去左台灣宜蘭礁溪,住左一間溫泉旅店覺得幾值得推薦,就喺度同大家分享一下啦~ 2018年11月起,喺桃園機場就可以坐統聯客運1661直到宜蘭、礁溪等地方喇。 坐左約一個鐘頭車,喺國道客運溫泉路口站落車,就會見到9號溫泉魚既地方,行前少少就會到達9號溫泉旅店。(次次旅行都太開心,完全唔記得影周圍環境T_T) 房間既門牌好特別,係利用光影既設計。 比check in時間早左一個鐘去到,但職員好好人,俾我地提早入房。我地既房間係位於check in樓層既520房間。 一入房間就見到一張特大既床同小梳化。 房間好大好乾淨,基本設施同用品都有。我最滿意既係佢張床,好大好舒服,而且床單質地好滑! 床對面就有一部電視,返到酒店休息個陣,睇下啲台灣綜藝節目,非常放鬆。而且房間空間好大,兩個大行李箱攤開係地下都唔會阻住行動。 雪櫃、熱水壺、水、水杯等基本用品都有提供。 除左茶包同咖啡,仲有一包爆谷零食。 拉開房間入邊既門,就會見到個同樣空間感十足,而且好乾淨既洗手間,重點係有一個好大既室內溫泉♨ 洗手間既右邊就係坐廁同洗手台。 基本既毛巾、牙刷、梳、剃刀都有供應。 洗手間既左邊就係一個好大既室內溫泉,同埋沖涼既地方。拉開窗簾仲可以欣賞埋個夜空(不過由於所在樓層唔高,所以景色會有所局限)。 空間好大既室內溫泉。 另外,佢既洗髮同淋浴露都係一個叫茶籽堂既台灣牌子,味道有陣茶香,用落都唔錯。酒店亦都有賣哩兩隻產品,不過價錢唔太吸引。 睇完房間既環境,就同大家分享一下佢既優點、缺點啦(o^^o) 宜蘭礁溪9號溫泉旅店 地點:礁溪鄉溫泉路85號5樓 價錢:平日、非旺季,雙人房 約HK$6xx一晚(未連稅) 優點: 地點方便,鄰近礁溪大街,路程只需2-3分鐘 交通方便,鄰近礁溪火車站,路程只需約5分鐘,離礁溪轉運站(客運)約10分鐘路程 樓下就有7-11,離屈臣氏不到5分鐘路程 價格相宜,房間空間大、舒適,CP值高 職員有禮、友善 缺點: 暫時諗唔到 總結:無論係地點定價錢都好唔錯,十分推薦去礁溪既朋友參考下。