半自助遊嘅意思係包車、包住、包食、包導賞，但唔包隨團領隊及導遊嘅旅行團。其實依類型嘅Package十分之適合小酷米依啲“獨行俠”，有人幫你安排好晒交通及行程，又唔會困死冇自由，真係幾好 我參加嘅係 阿里山小火車+日出美景二日遊 (嘉義愛玩美旅行社) 行程包括: 第一日: 專車上阿里山 --> #中興製茶所 --> *午餐 --> 阿里山森林遊樂園區(包導賞) --> 山芝鄉風味館(火鍋晚餐) --> 櫻山大飯店 #購物點 *自費 專車 豪華Benz 7人車，司機叔叔會沿途介紹風景及講解歷史 中興製茶所 雖然官方行程入面雖然冇提及過有購物點，但“到此一遊”影下相都唔錯，風景真係好正，而且又可以嘆下高山冠軍茶 點擊圖片放大 司機叔叔聲稱佢哋嘅烏龍茶係全台灣最高海拔種植出產，而且直接由茶農出售，比起外面用市價購買平得多，亦唔會怕買到假貨 (司機叔叔話依家好多阿里山賣茶葉嘅地方都唔係賣正宗阿里山烏龍，都係由平地運上山賣，特別喺旅遊區…) 烏龍紅茶NT$800 阿里山森林遊樂園區+日落 Package費用包含導賞，會帶大家行森林園區必睇景點及講解典故歷史。當日負責帶我哋團嘅導賞員吳導，講解清晰、又識講笑，整個導賞過程由下午1:30集合開始，至埋睇日落之後約6:00解散，一邊行山，一邊聽吳導講解比想像中輕鬆，而且沿途都係平坦路同小石級，所以山藝門外漢小酷米都可以挑戰順利。 阿里山日落 山芝鄉風味館 其實之前旅行社一直都冇提過晚餐食咩，只係派張餐卷，自行安排去餐廳食飯。本來諗住棄權，心諗“有幾豪華呀~咪又係清菜白飯….” 結果有大驚喜！ 一人火鍋，你都咪話唔過引 附一碟小菜 – 紅燒魚肉 (注意: 小酷米係獨遊關係，所以一人獨食，基本上為2人一鍋) 櫻山大飯店 Package可以自選飯店，小酷米選擇咗比較近商店街嘅櫻山大飯店，雖然設備舊、連電視都會Lag機…..但當你行完個山頭返嚟，冇野可以比得過沖個熱水涼同訓喺乾淨舒服嘅床舖上面 ---------------------------------------------------------------------------------------------------------- 第二日: 搭祝山線小火車上祝山睇日出 -->^海山園(早餐) --> 自由時間 --> 奮起湖 --> 阿里山小火車落山 ^為飯店特約早餐店 山線小火車+日出+雲海 Package入面包埋來回車票，因為每日來回車次大概只有1班(*旺季火車班次會增至2班)，車票又無劃位，所以大家好早就會去車站排隊等火車。當日開車時間為5:40，3:50點起身，4:30去到車站已經大排長龍....雖然未係旺季，但人流太多，車站決定加開車次，小酷米5:00到，都要上第二班車，所以時間方面大家可以再斟酌斟酌.... 吳導有提醒過我地，火車終點站祝山站一出月台就已經係觀景台，但往往人太多，好難欣賞美景，所以推介我地行遠啲，去小笠原觀景台，只要出車站轉右，然後一直行上大斜坡，大約15分鐘左右就到。無錯係大斜坡，行唔夠一半路程我就已經萌生退意........ 第一，前一日因為行森林遊樂園區已經消耗左好多體力，再行埋依段斜坡，對腳已經唔再屬於你....再者，因為唔掙氣，要上第二班火車(6:00開車)，變相遲左到達現場，小酷米認為，睇日出最美嘅時間係天空由深藍色慢慢變色，我地依班車嘅人未落車個天就已經光晒，最美已經過晒廟..... 阿里山日出 去到小笠原觀景台雖然如我所料，日出景色並不吸引(老實說，我覺得平時起身返工嗰陣睇到嘅日出比較靚...)不過行依條大斜坡都算直得嘅，小笠原觀景台係360度無遮無掩觀景台，即使唔係為左睇日出，睇風景甚至^觀星都一流！ 吳導話要睇雲海要碰運氣，因為出發旅遊前一個月(11月份)，雲海出現日數並唔多 小酷米運氣好，當日可以見到傳說中嘅雲海！ *於旅遊旺季火車班次會增至2班，另外每日開出時間會因應日出時間而更改，時間表會喺前一天下午4:00公報，一般喺酒店大堂會在告示 ^喺旅遊服務中心巴士站見到有海報宣傳觀星團，有導賞及專車接送往小笠原觀景台 海山園(早餐) – 棄權 飯店特約早餐店，其實小酷米唔知有咩食，因為當睇完日落之後諗住順道去食早餐，不過大家嘅諗法似乎都一樣，旅客一落火車就 “刀手式快衝”去早餐店…. 我去到已經太遲，多人到連門口都睇唔到，所以…我棄權… 我喺商店街買咗啲小食同阿里山咖啡做早餐 黑糖涼糕- 好濃郁嘅黑糖味，口感有啲似糯米糍嘅皮煙煙韌韌，不妨一試！而且有多種味道可以簡，例如朱古力、綠茶等等 而阿里山咖啡聞落好香，但飲落偏苦澀，我就不太喜歡 奮起湖 幾年前小酷米環島嘅時候已經嚟過奮起湖(連結在此)，今之試左新野，脆皮甜甜圈 超鬆脆！口感有啲似酥皮，信我！買一個會唔夠喉！ 阿里山小火車 依個Package其中一大賣點係包阿里山小火車車票，因為阿里山小火車車票好難訂。另外，每個星期三都會有導賞員註火車，會沿途介紹週邊風景，小酷米回程當日剛好係星期三， 可算賺到行程以外嘅驚喜。 雖然以上講左好多好玩經歷，但“獨行俠”小酷米參加今次旅行團覺得有點美中不足。說實話，“旅行”嘅重點有時係想擺脫現實….. 一心參加Local tours係希望更貼地感受當地文化，但好可惜，我被安排到一團約30人嘅香港人團….. 旅遊心態要被改變，時刻被提醒現實在左右，而且香港人去到外地都不改心急、怕執輸同冇禮貌嘅壞習慣…… 今次更可以睇到某些香港人嘅醜態，比如係大大聲討論人…. 「嘩！自己一個去玩都有引？我會驚比鴉烏婆捉左去嫁！」 「依條友梗係孤獨精…….」其實呢~ 唔好諗住自己喺外地就唔會遇到同鄉先得嫁！有冇鴉烏婆捉我...我係咪孤獨精又關你咩事呢？其實如果真係對我咁好奇嘅話歡迎你開聲問我，我識廣東話嫁，多謝！ **想睇更多胡迪與反'豆'小隊相片，歡迎Like反'豆'奇兵 - 劣質照相館 Toy Studio 台灣追星星手記
