話說上個星期小酷米又飛咗一轉台北,出發之前翻睇返N年前台灣某美食綜藝節目,剛好那集介紹依間文德炸雞,主持食到津津有味,彷彿隔住個鏡頭都聞到炸雞香,所以決心試一試 店面平平無奇,就跟一般台式小食店冇咩分別,因為食店位於菜市場(街市),所以有啲地踎,而且只限外賣,附近亦冇旅遊點,應該除咗小酷米之外都冇咩外地遊客會去..... 我點咗一份炸雞翼(NT$50三隻)、一份梅子地瓜(番薯)(NT$20)同埋一份花枝丸(NT$20三粒) 因為炸地瓜(番薯)剛好缺貨要現炸,小酷米就喺旁邊等咗大約5分鐘,喺依大約5分鐘內竟然賣出咗3大盤炸雞翼! 銷量驚人! 小酷米買完雞翼之後立即返去相隔6個捷運站嘅酒店開餐,喺捷運車廂中,我差啲唔能夠原諒自己,因為炸雞嘅香味成為咗全車人嘅焦點...... 有個小朋友問:[媽媽,是炸雞的味道嗎?],當時真係好想搵埞匿...... 梅子地瓜: 小酷米本身好喜歡炸番薯條,冇得傾!最愛依然係佢! 就算經過油炸都依然保留到番薯嘅甜味同濕潤,再加上梅子粉可以減輕油膩感,讚! 花枝丸: 彈牙,有真花枝粒粒。本身冇唸住試,不過見好多人都買,所以試試..... 一試大愛! 炸雞翼: 去到酒店啲雞翼雖然已經凍咗,但外皮依然好香脆,肉質鮮嫩,亦唔會乾、唔會硬,不過熱食應該開心啲...... 炸雞翼傳聞中嘅肉汁可能因為攤凍咗而唔見晒,有啲可惜,決定下次要現場趁熱食!絕不能因為怕喺路邊食雞全翼嘅食相感到羞愧而輸晒啲肉汁...... 另外,雖則係油炸食物,但紙袋上一滴油跡都冇,可見"脫油"程序上花了不少功夫,好棒棒! 文德炸雞 地址 : 台北市文德路66巷10號 (文德捷運站-2號出口) 歡迎LIKE我哋嘅FB專頁,謝謝!台灣追星星手記