第四站 屏東縣墾丁 我今次環島為自己定左一個目標，一定要集齊台灣東、南、西、北四個盡頭，而其中一個盡頭位於墾丁，咁就順道去行下沙灘，叫到此一遊.....其實小酷米唔多鐘意海灘，又怕熱、又唔識游水、而且好討厭啲沙黐住喺身，黐立立嘅感覺.... 所以唔係環島都唔會黎墾丁 我從高雄(左營高鐵站)坐墾丁快線9189到南灣，單程車票:NT$383，來回票:NT$600，雖然來回票計落比較化算，但車程大概2-3小時(唔同班次有所分別)，15-30分鐘一班，一來一回坐6小時真係腰骨都直埋，另外溫馨提示！墾丁公車經常性飛站，墾丁公車經常性飛站，墾丁公車經常性飛站，(好重要，所以講3次)，所以有人會選擇坐計程車出入，我喺車站等車果時就有計程車司機"R"生意，包車入去NT$850而已，可以坐4個人，而且車程都會比較短，1.5小時左右就到，的確直得考慮。 如果你好似我咁獨遊的話，亦可以選擇"泥鯭的"，價格NT$180~280都有，睇個師傅點開價，一般只要你企喺車站，佢地就會埋黎"R"你，可以唔洗預約，但要注意嘅當然係安全問題，墾丁快線講晒係公車公司經營，車上亦有GPS，公車公司及手機APP可以監察行車動態相對較安全(應該係，除非唔係)。 當日我買左墾丁快線來回票，回程時有"泥鯭的" "R"生意，我同佢講我已經買左來回票，佢就話將張回程車飛比佢當車資，叫我上車，我心唸...你點樣同公車公司攞錢呢？旁邊就有個台灣朋友同我講唔好信佢，分分鐘出到市區話唔收張車飛，要我比錢.... 所以大家真係要衡量一下，台灣人好有文化，無錯！但唔包保中間無壞人..... 全台最南面的盡頭 鵝鑾鼻燈塔 之前睇新聞話遊客太多，環境受到破壞，所以要比入場費先可以參觀，但其實入場費都只需要NT$60，都算合理。 入面環境唔錯，有一片大草地，好多人都會帶食物入去野餐，而且因為喺海邊，空氣好，不過依度真係"台灣四個盡頭"入面最多人流嘅地方，難怪只有依個點先收入場費 點擊圖片放大 "遊蕩狗"依個名詞唔錯，其實浪浪們都只係想要個遮風擋雨嘅地方，佢地無惡意就唔好趕盡殺絕Plz... 點擊圖片放大 交通: 坐墾丁快線到總站 南灣轉 墾丁街車橘線到總站即達，或可選搭直達鵝鑾鼻嘅墾丁公車(唔記得幾號)，但印象中好似1.5小時一班，而且3小時車程(制唔過呀~) 下一站係 高雄 歡迎LIKE我地嘅FB專頁，謝謝！台灣追星星手記 第一站: 宜蘭縣 礁溪每日溫泉旅館 & 溫泉蕃茄 第二站: 花蓮太魯閣 & 全台最接近太平洋的"巨無霸"郵筒 第三站: 台東 鄉村藝宿民宿 & 卑南文化公園
