上星期小酷米又出走台北了，雖然今次只係4日3夜，行程唔多，但發生左好多不可思議嘅事，而且出奇地幸運。 30/10(五) 我坐上午嘅飛機去台北，一落機就即刻去酒店放低行李，就趕去天母擺手作市場。天母廣場每逄星期五、六、日都會有假日襯墟，大會將空地劃分兩區，分別係跳蚤二手地攤及創意手作市場。我從來未試過擺手作攤，亦冇咩藝術天份，但最後選擇參加手作攤嘅原因係若果我二手攤嘅貨賣唔出，我應該即場掉左佢？定帶返香港呢？你帶得去二手地攤賣嘅東西都係一啲"食之無味，棄之可惜"嘅物件，掉得嘅就唔會大老遠攞黎台灣掉啦！事後處理比較麻煩，所以就買左一啲彩色嘅膠珠串成手鏈同鎖匙扣黎賣。 其實我一直都好想搵個機會接觸多啲台灣人，希望借擺檔之名認識新朋友，同時，亦想佢地支持一下我一個小小嘅夢想...... 我希望明年可以實踐台灣環島之旅，所以我喺檔攤棟左個牌，放左一筆、一本簿，要求大家過黎喺記念冊留言支持 當日下午4點開檔，點知去到5點多就開始落雨，聽隔離檔嘅朋友講，話我挑錯日子，本身星期五人流就比假日少，加上落雨同埋第2日(31/10)有萬聖節嘅慶祝活動，大家都會留返31號先黎行街，所以預計生意真係會麻麻地，聽完依個消息心情一沉，結果我擺到8點半收攤都只係做左一單生意。雖然得一單生意，但我認為我擺檔嘅初衷已經達到....並且好成功，我成功結識左隔離檔嘅新朋友，成功請(唯一的)顧客留言為我加油。 依一位客人其實當初並冇幫襯嘅意思，純粹睇到我枱面個牌寫住"我喜歡台灣"所以過黎傾計，雖然交談過程短暫，但佢比左好多意見我，又同我講如果想留喺台灣生活，佢可以幫我安排工作同簽證，老實！我堅有考慮過留喺台灣生活，但係...嗯....我依家重係處於15/16嘅位置...... 依次嘅擺檔經歷真係好開心，好難忘，我會將我人生嘅"第一桶金"(唯一一單生意嘅收入)收藏好，只係平平無奇嘅NT$120，但意義已經遠超過NT$120嘅價值，即使我將來去定留，我都會記住依位客人比我嘅支持。 其實星期五創意市場擺檔租金只需NT$400，比起香港嘅租金平得多，如果係"試驗性質"，或者攞人生經驗嘅話都OK，若果你下次去台北都想去天母廣場參觀下或者試下擺檔，建議大家可以簡星期六/日去，除左熱鬧啲之外，攤檔相對都會較多，記得啦~ 擺檔及參觀詳情可參考 : 天母商圈發展協會 / 天母生活市集 - U Travel 台北旅遊 今次喺台北入住一間之前未住過嘅酒店 - 台北皇家飯店 (圖片轉自Agoda.com) 我訂嘅係一人房，所以被安排住一樓(地下)嘅房，雖然間房細左小小，但係夠乾淨整齊。其實小酷米簡酒店嘅偏好除左係乾淨同要有獨立衛廁，重要嘅係房間入面要用白光燈，因為黃燈會令人有種疲累感，我唔想比燈光影響我嘅玩樂心情 第一晚，半夜不時有聽到"泵泵"聲，話晒係一樓有嘈雜聲係難免，亦不以為然，因為其實有聲影響唔到我嘅優質睡眠(自豪)，訓到第二朝7點左右，覺得有啲唔對路，坐起身聽清楚，原來聲音已經進化左，變左"SA SA"聲，而且越來越大聲，越來越急速，我就叫職員睇下發生咩事.... 經過一番討論及抽絲剝繭，估計係假天花上面有隻Mickey Mouse，佢地即刻就幫我安排換房，換到高樓層，間房重大啲添。 雖然發生左依件小插曲，但係從我發現Mickey之後就不斷有好事發生，我覺得佢係一隻會帶來好運嘅Mickey，而且我亦好滿意酒店職員嘅安排，佢地好有禮貌，逐一為事件道歉，並俐落咁解決事件，當初都係因為我今次嘅行程比較趕，所以簡台北車站附近嘅酒店，有機會嘅話，應該會再住，因為我覺得服務唔錯，而且同台北車站零距離，不過...我唔會再住一樓嘅房...Thx！ 歡迎登入Facebook讚好我們專頁台灣追星星手記
