彰化扇形火車庫係彰化縣定古蹟，有啲台灣人鐘意叫佢做"火車旅館"，因為喺以前，食依個火車庫係比啲火車頭"瞓覺覺豬"同埋"休養生息"嘅地方。 小酷米並唔係一個鐵道迷，不過依度環境真係唔錯 ，企喺12條呈扇形排列嘅火車路軌正中間，感覺好特別，一時之間唔係好識形容.... 唔知點解腦袋一片空白，而且眼前影像突然變得鮮明，連腦閉塞都被打通埋，有啲事好似諗通左......(同埋個人突然正經左.... XD) 提返啲資料性嘅訊息先...我去之前有上網查過，車庫開放參觀嘅日子，可能啲網站太耐冇更新過，所以寫左全年無休，其實喺今年年頭開始，車庫逄星期一都會休館，睇到門口張公告，心裡面不禁OS.. 好彩我星期二黎，如果唔係真係跪地(歪腰)..... 另外，依度除左係鐵道迷潮聖嘅熱點之外，亦都係"小資"旅遊人嘅觀光點，因為免費參觀嫁！黎依度坐下、影下相都唔錯.... 不過呢....因為小酷米去台中果時正席暑假，去火車庫當日重要剛好係台中錄得最高溫嘅日子，真係曬到燶，可能企係火車軌果陣時，有腦袋一片空白果種感覺係因為中暑都唔定........ 黎到彰化，當然要試一試佢地嘅特產美食啦~ 行出火車庫門口，就見到好多小食店，第一間吸引我地嘅係佢！彰化古早豆花冰，天氣咁熱，一見到個"冰"字對眼就發光，點忍到口呢? 我地叫左3款，綠豆冰、豆花冰，同埋仙草冰。台灣地道嘅綠豆冰並唔似我地喺香港大x樂加錢配炸雞脾果種綠豆冰，唔係花奶加綠豆沙嘅飲品，而係綠豆沙加碎冰粒撈埋一齊食，夠晒消暑！食落堅透心涼，即刻個人舒服晒，又唔會太甜，而且一碗唔洗HK$8！讚！ (綠豆冰) (荳花冰) (仙草冰) PS. 因為天氣真係太熱啦.. 手機中暑，鏡頭熱得滯，啲相蒙查查，請見諒 彰化特產-肉圓(讀音:媽挽) 圓形、外皮半透明，口感煙韌，中間包住豬肉、沙葛等餡料，再灑上蒜泥及醬汁....(心心眼)第一次見面就成為我嘅新寵兒！上維基一睇，原來唔同地區嘅肉圓會包唔同餡料，睇黎要進一步研究研究先得！ 當地人會將肉圓做早餐或者下午茶小食，而且都會配貢丸湯，可能係當餐飲，求其有野濕下個口就算......個湯真係較為普通左啲，除左有少少藥材味之外，就係香濃嘅醬油味....("醬油味"...嗯...你懂的...) 不過，未必間間肉圓店都用一樣嘅湯頭，下次試下第2間睇下有咩分別先.... 我地沿住條街一路食，重食左好多其他嘅野添... 牛肉麵、麻醬麵、蚵仔煎、肉包子、甜甜圈、滷味....都唔知點解可以食得落.... XD
