¯綠蔭裡 草坡上 讓我胸襟一再展.... 其實今次清境台中旅程最大嘅目的係同可愛嘅羊咩咩作近距離接觸，因為小酷米好鐘意小動物嫁！ 雖然正值暑假，太陽伯伯又好鬼熱情.... 但因為清境峰海拔高，氣溫較低，不時會有清涼嘅微風吹過，所以唔會覺得辛苦，比想像中舒服多。出發前，我上網留意過清境嘅天氣，有網民話成日落雨，但我地喺清境逗留左兩日，so far 兩日都係黃昏時間先落雨，對我地嘅日間嘅活動冇影響，可謂天公做美！但我地好白痴咁睇小山頂嘅低溫，一入夜氣溫就急趺，夏天嘅夜晚都係得15-17℃，街上面，人人都著長袖衫、厚衫，只得我地幾個港燦著住短袖，重不時會有討厭嘅微風吹過，真係"夭壽冷" (台語:攞命的凍) 。 除左天氣，有好多人都會問青青草原入面啲羊咩周圍走，咪好多"黃金"、好嗅...？嗯.....係嘅！只係好輕微，可能喺現場見到啲羊咩實在太可愛，所以忘記"索"清楚周圍嘅氣味，不過啲羊咩好現實，喺青青草原入面好多地方都會發現售賣機，售賣羊咩食糧，每盒NT$10，正所謂"只要一盒糧在手，羊咩就會跟你走"，「咩~你冇買糧就想同我玩、同我合照...？」 雖然羊咩有啲串嘴，但佢地食野嘅時候好斯文，我將食物放喺手掌，再遞近羊咩嘴邊，手心會感受到一股熱氣，然後食物就被吸走，佢地唔會整到你一手口水，亦唔會咬到你，真係好得意呀！！ 入得黎青青草原，當然要睇綿羊秀啦！綿羊秀每逢星期六、日、同台灣法定假日都有公演，演出時間係9:30AM 同 2:30PM 兩場，係暑假期間平日都會加演，不過要留意一下佢地逢星期三休演，如果唔係就白行嫁啦~ 綿羊秀中，令我最深刻嘅一項演表係一班牧羊犬將羊咩從山坡上趕到去舞台則邊嘅圍柵，途中，羊群重會經過觀眾席，真係好壯觀，而且個主持同牧羊人講野又底死幽默，整場show都冇冷場，所以唔好錯過呀！清境農場~清境旅遊資訊網 喺青青草原入面都有美食嫁~ 如果你平時唔怕食羊肉嘅話，建議可以試試羊奶雪糕/雪條，我個人認為冇乜羊羶味、奶味濃郁，而且唔會太甜，連平時唔多食甜品同怕羶嘅小酷爸都話OK，另一樣特產就係鮮羊奶，嗯...依樣呢.....我就有啲怕怕，所以冇試到，留返比各位試完再話我知...XD 原來羊奶除左做食品之外，重可以做護膚產品，有啲重係羊咩咩造型添~ 依隻羊咩香皂好得意，聞落有啲似羊奶雪糕陣味，甜甜地，都幾香，應該好多女仔都會鐘意，不過我未打開黎用，我怕隻羊咩濕水之後好快會溶晒，唔舍得... 堅恨錯冇買多幾隻！因為價錢其實唔算貴，當手信送比朋友又夠特別，就算只係用作裝飾擺設亦可，如果有機會再去嘅話，一定"大手買入" PART 3 要同清境講BYE BYE，出發台中......
