其實喺早幾日小酷米同家人去左清境&台中自遊行，第一次唔係為左追星而飛台灣...(羞) 我地安排第一晚喺清境過，為左方便，我地選擇包車。NT$2,500(坐4人)由台中機場直接送到去民宿門口，雖然比起搭公車或客運貴得多，但就慳左等車、停站嘅時間，同埋轉車時果陣搬行李嘅麻煩。但若果你係小情侶、小夫妻，人數較少，覺得包車唔化算，可以選擇共乘車，同樣喺台中機場送到去民宿都係NT$550。一般由機場去清境農場車程大約2小時左右，但好話唔好彩咁當日因為山上面有車禍，兼夾係假期日子，最後用左3個幾鐘先上到去，司機話從來未見過咀塞車.......(囧) 清境家園觀景山莊 位於清境農場，較高海拔位置，屋前有塊大空地，方便自駕遊嘅住客泊車同埋睇風景，日頭可以欣賞山景同雲霧，夜晚重可以睇星星添！ (利申...張相冇調過色，個天真係好藍.. ^^) 我地BOOK嘅係樓中樓嘅家庭房，剛好被安排入住一間8人大房，4個人住真係約晒闊落，重可以一人一張床......XD 而且下層同閣樓都有電視，唔洗掙睇邊個台...房間睇落好似"有啲年紀"，但整體唔錯，床舖浴室尚算整潔，只係小酷米對果條樓梯有少少恐懼，中間通空，會勾住拖鞋，好無安全感..... (閣樓) (令人無安全感嘅樓梯...) 雖然入住會包早餐，但就款式就普通左少少，都係啲"清粥小菜"，但食唔慣唔緊要，行返出大路就有好幾間食市，重有一間相信係最高海拔嘅7-11，半夜肚餓都唔怕....(題外話...可能係高山種植嘅原因，啲高麗菜(椰菜)食落超爽口，超甜，果朝早我重食左超多添...) (餐廳出入口) 呀！喺依間民宿重有2位可愛嘅PR，小米同妮妮，佢地好活潑，成日跳黎跳去，重會主動聊客人玩，而且小米有個小技能...識得開餐廳對門，佢可以自由出入，所以每張餐枱都有依張字條.... XD (我是PR妮妮..) 民宿老闆娘好好，好主動介紹我地去邊度玩。佢知道外地遊客(特別係香港人)去旅行係爭分奪秒，所以建議安排司機係我地出去玩其間到民宿攞行李，之後再係山腰接我地，方便由山頂一直向下行，去晒所有景點之後唔洗特登返轉頭攞行李，又慳時間又慳腳骨力，想得非常周到！ 另外，民宿同青青草原距離大約一公里左右，老闆娘重介紹左條小路比我地行，沿途都會見到好多好靚嘅山景同梯田，吸收一下芬多精... 喂！唔好比"公里"依個字眼嚇親，其實慢步行都係20-30分鐘左右姐，見到靚景就停低影下相好快就行到。若果你真係唔想行，民宿老闆可以開車送你去，但其實喺香港已經好少做運動，當比個機會自己郁動下，唔係更好咩? PART 2 會分享一下呢樣野......
