拍拖時已經知道奶奶唔係好相處，因為奶奶覺得個仔比我搶走左。有次老公幫手拎一拎我個手袋，奶奶已經不停話我老公，點解要幫女人拎袋？但老公細佬幫女朋友拎全日袋都無問題架喎！佢仲話：媽咪咁辛苦養大你都未試過幫媽咪拎手袋！老公霸氣回應：你老公係你隔離，你叫佢拎啦。XD 好啦，到我地要結婚啦。其實我自己想旅行結婚，但奶奶要擺，咁就順下佢意思意思。本身都打算揀啲負擔得起既婚宴場地，點知奶奶要排場，奶奶就要求要擺酒店，佢話會包酒席，點知比左第一期deposit後，就叫我老公比返條數。隨之所有野都over budget啦。當然人情我地袋返幫補下。 當時未有樓，所以婚後便要和奶奶一齊住。果段日子真係當自己發左一場惡夢算了！可能係我唔好，唔識就佢果一套啦！同奶奶住果陣，我基本上都在房，由於我慣左在房會鎖房門，奶奶都話過我好多次「都係自己人，點解要鎖門？點解唔比我入房？」。有一次，我買左麵包擺係房，但就返左娘家住，奶奶竟然wtsapp我老公， 奶：我幫你食左房的麵包。 我：你入過我房？你點知我有麵包？ 奶：你要多謝我啊，好彩我幫你食左麵包，否則過左期就浪費了。 重點係佢仲搵到我老公啲錢擺左係邊。我絕對懷疑佢係我地房裝左攝錄鏡頭。終於我頂唔順，向老公提出出去租樓住。奶奶當然無咁順攤啦，向親戚們不停數落我呢個新抱，仲喊住同我老公講：媽咪咁辛苦揍大你，仲專登裝修間屋比你地，係咪咁都唔肯同媽咪住啊？你咁對媽咪？媽咪唔想做人啦。 終於都可以搬走了，我亦有左BB，奶奶就話要揍孫。奶奶仲話要照顧我坐月，老公都質疑佢有無能力照顧我，奶奶竟然話：我養到你咁大我會唔識？就算我唔識都可以wtsapp問朋友架。我當然唔制啦，即刻叫老公BOOK定陪月。 最後到生左BB，奶奶當然無幫手揍孫啦，只是得閒當我BB係玩具咁玩。其間奶奶都會上黎我地屋企既。直到最近一次，我買左啲零食同野飲，擺左係BB床下面，奶奶自己上黎我地屋企，竟然將零食野飲拎走曬。自此之後，我就換左大門鎖鑰了。老公都話以前唔覺媽咪咁痴線，而家簡直覺得佢好變態。 其實我已經好好彩，雖然有個變態奶奶，但都仲有個好老公同自己企一陣線！而家基本上同奶奶見面，我都會當佢透明。因為佢係我心中目中係一個懵人！ 其實我都聽過唔少身邊朋友的奶奶既難頂野，發生係自己身上更加深同感受！唔知大家既奶奶會唔會都係咁變態？大家JM不妨分享一下。
