呢篇分享係我第一篇寫既網誌，我本來仲諗緊應該用咩題材作為開始，最後決定分享我既韓式婚紗攝影既體驗同感受。由於係第一次寫blog，請大家多多指教。 我地既韓式婚攝係係廣州到影既，婚攝公司叫S.A. Wedding，係一間韓國公司，係香港都有分店既。初初其實我都睇左好幾間公司，但最後都選擇左S.A. Wedding，一黎當然係D sample效果好好，好自然，加上影室內景多，應該會舒服D，再加上我同關二少都好少影相，室內影無咁多人睇住會自在D。 咁點解會去左廣州影呢?因為佢地係廣州有個好大既studio，將韓國既埸景一比一咁搬到廣州，再請韓國既攝影師同埋化妝師到廣州拍攝同埋化妝，廣州距離香港又近，我同關二少時間唔多，所以就揀左去廣州到影啦。 言歸正傳，我地既婚攝日期係17年2月12日，我地就選擇左分開兩日進行成個流程，第一日就係揀衫同揀場景，第二日就係正式拍攝啦! 2月11日個日我地去到廣州返左酒店check in之後就去左影相既studio到揀衫，一入到studio真係好大，亦有好多衫比我地揀，我地既package係包兩長婚紗，一晚裝同一短婚紗，男仔就有兩套西裝，所有款式都係任揀，睇到我都花多眼亂，但職員都會好有耐性咁介紹，比時間我考慮，最後就試左9套衫，揀左4套，關二少就揀左2套西裝，我地亦都揀左15個埸景黎影相。揀完衫同埸景後，PR Jessie就同我地講解番有咩野要準備，其實佢地既package都好透明，無咩野需要自己準備亦無咩野需要另外加錢，只需要準備番鞋同nubra就得。 到2月12日正式拍攝既日子，真係好緊張同興奮，我地7點半就到左studio準備化妝，由韓國黎既金老師幫我化妝，佢好nice，會同我講解番化到邊，又會耐心了解我既意願，不過其實我好相信佢地既專業，所以都冇咩要求，成個妝化完換埋衫都已經係兩個鐘後，感謝關二少既耐心等待。 跟住就開始拍攝啦，由韓國黎既洪室長負責拍攝，洪室長會好耐心咁教我地擺POSE，每一張相都會希望做到完美，唔會為左要係有限時間影完而隨隨便便，所以出黎既效果先至會咁好。由化妝開始到拍攝完畢都會有可愛既翻譯小姐，仲有幫忙我著婚紗補妝換鞋既助手小姐。拍攝時除左攝影師之外，仲有一個不可缺少既燈光先生，佢地每一個人都好盡責，對我地好似一家人咁，令我地雖然肢體生硬，但成個氣氛好放鬆，可以好放心咁將整輯婚攝交比佢地。而每一次換衫，金老師都會幫我諗一個適合我既髮型，每個髮型都好靚。最後影完後，攝影師會比幾張效果相我地睇，真心覺得影得好靚，好自然。我揀左幾張比大家睇下，好期待睇埋其他既相呀。 P.S. 感謝大家耐心睇完咁長既文，亦借呢個機會感謝S.A. Wedding既每一位，比左一個咁難忘既體驗我地。點擊圖片放大 +3
