1.決定出發日期 由遞交表格至取得簽證,一般需要1個月至1個半月左右。而發出簽證後,需於三個月內入境韓國。所以，由你申請到出發，最長可以相距四個月，最短1個半月可以成行。舉例，如你的預計出發日期是5月1日，最早可以在一月，最遲則於三月中，需要遞表申請。 注意，申請人需要在遞表當日，年滿18歲，未夠31歲。雖則已到30歲都可以申請，但千祈唔好預得太「忟」。由申請至取得簽證需要最少一個月，所以如果你31歲生日前一個月先去申請，佢地係有權唔收你份表格，亦試過有這種case申請不獲接納。 韓國領事館政策常變，最好在申請前到他們的網頁看看。 2.遞表 (Ａ)表格 可在韓國領事館網頁下載，所有簽證都用同一張表格（在此下載http://hkg.mofat.go.kr/english/as/hkg/visa/download/index.jsp）， 正面及背面要由同一張A4紙print出來。在「簽證目的」一項，填上「working holiday」就可以了。連同相關的文件副本，交到位於金鐘的韓國領事館。工作假期簽證，不需要任何費用。要注意的是，交件要齊，同埋全部影印副本，仲 有留意辦工時間。申請詳情及所需文件請參考http://hkg.mofat.go.kr/english/as/hkg/visa/korea/index.jsp (Ｂ)銀行戶口證明 申請工作假期，銀行戶口最少三個月要夠港幣兩萬元。換句話說，你3月15日申請，向前數三個月，即12月15日起，你的戶口就要夠二萬元。建議大家申請前一日先去打簿，再影印。 如果沒有銀行簿仔，只有月結單就要做多Ｄ功夫。因為月結單通常都唔會擇正你申請o個日先截數，所以需於網上銀行Print返由最近一個月月結單截數日至你申請當日（或申請前一兩日）的戶口紀錄。 如果連月結單都冇，得網上銀行，咁齋print網上戶口紀錄就可以了。有Ｄ銀行網上理財，係冇三個月前紀錄的，咁就真係冇法，你要等下個月先申請，又或要問下銀行可唔可以幫你print返張紀錄出來。 哩part的注意事項係，戶口佢地check得都幾緊，一定要申請日（或前一至兩日）向前數三個月，少一日都唔得。而兩萬元係以港幣計，有些銀行的 月結單及網上理財，會將你同一銀行的所有戶口（連同外幣戶口在內）顯示一個港幣的總數出來，我試過，係可以的。我想當年，我人民幣戶口加港幣戶口先剛剛得 兩萬，但佢只睇個總數，就比我過關了！ (Ｃ)Year Plan 哩部份係好多人好關心的問題，其實不用太緊張。哩個year plan，可以用任何形式，以英文或韓文撰寫，字數不限。我個人建議，以word，用point form，逐個月寫清楚你會去邊度玩、參觀什麼地方，就可以了。這部份需要注意的是，如果你寫埋你邊幾個月會打工、邊幾個月會讀書，記得，我們只可打一份 不超過六個月的工作，以及讀一個不超過六個月的課程，如果唔係，要打回頭再寫過。另外，遞交時，要以A4紙print出來，在每一頁的空白地方簽個名。 3.打回頭 基本上，韓國工作假期簽證，一定能成功申請，聽講而家每年的申請人數都未夠200人的上限。但「打回頭」是有機會的，主要原因是銀行戶口資料唔夠， 又或year plan寫得唔夠清晰。通常職員都會同你講有乜野問題要被打回頭，之後會比個email地址你，當你了解過後，可以將相關資料改正，再email返比領事 館，不用再親身上去。（筆者的year plan當年被打回頭三次～ＨＡＨＡ） 4.第一階段審批完成 所有資料交齊，兩至三星期左右，第一階段審批便會完成。你會獲通知，上領事館交機票及保險。 (Ａ)機票 一年期機票，透過agent、旅行社，又或去航空公司買就可以了，濟洲航空、印航、韓亞都是熱門之選。一年期機票個回程日期，不能定在一年後，最多 定到八至九個月後。如，你出發日係1月3日，回程大約只可以定到9月3日左右，要到時再改日期（改日期第一次係免費的）。這是正常程序，只要該機票注明係 一年期，大使館就會接受。 (Ｂ)保險 市面上最多人買的有兩種，一種係豐隆，最貴，HKD$4800，但就包你在韓國睇醫生、住院等費用，門診每次最多claim到HKD$700。另外一種係美亞保險， 平好多，一千八百幾元港幣,但唔包你在韓國睇醫生的費用。前者領事館會接受，後者有人試過唔得。也有另外的如保誠，你要留意，保險必須包門診費用，如果唔係大使館唔會接受。 一般買工作假期保險，要三四日審批，建議大家唔好遞上領事館前一日先 買，預多幾日走棧。以豐隆為例，可以上網購買，之後等一星期佢會將保單寄到你府上，如果你趕住要，可以至電保險公司約時間親自上去拎。份保單記得要帶埋去 韓國！claim唔claim到錢靠佢～claim錢方法，同樣以豐隆為例，需要在看醫生當日起一個月內，填寫有關表格，連同單據及醫生證明（醫生紙）， 寄回保險公司審批。 5.第二階段審批完成 機票及保險都冇問題的話，一星期後，就完成第二階段審批，領事館會通知你，拎護照上去做最後手續。最基本要注意係，護照從出發日期起要夠半年啦，唔係冇得上飛機～ＨＡＨＡ～ 6.領取簽證 三日後，你可以上大使館取回簽證，簽證會貼在你的護照內頁上。在簽證發出起的三個月內需要出發。 ～完～祝大家成功！ Copyright © 2013 阿妙韓國食記
