春天除左潮濕之外, 仲係繁花盛開嘅季節。香港盛開嘅花品種多, 各個公園同屋邨都成為攝影天堂。今次 Kongirl 就帶大家去到長沙灣元州邨既勒杜鵑花走廊, 影下相之餘, 仲會帶大家係長沙灣遊走, 發掘唔同食店 ! 位於元州邨嘅勒杜鵑花走廊最初並唔係咁靚, 直到近幾年先開始變得咁茂盛, 吸引好多人嚟影相。可惜嘅係從高空望落去, 中間斷開左, 但絕對唔會影響係花走廊入面影相。點擊圖片放大 +5 影完相之後當然要醫下肚啦 ! Kongirl 精選4間食店, 當中有正餐同小食, 相信可以滿足到大家嘅要求 1. 桂記順興隆荳品廠 桂記順興隆荳品廠位於順寧道, 下午3、4點呢段時間就最多人, 近乎逼爆全間店。一場嚟到就當然要叫「全餐」啦 ! 所謂嘅全餐即係豆花、豆漿同煎豆腐。荳品廠鋪面後面就係工場, 保證唔係買出面嘅貨。 所有豆製品都十分滑溜, 而且豆味香濃, 真係好想再 encore ! 煎豆腐煎到微焦, 脆脆地嘅外層包住滑嘅豆腐, 真係食唔停口; 加埋店內提供嘅辣醬就仲惹味 ! (Kongirl 最刷得個排, 可以一次過食2碗豆花, 飲3杯豆漿同1碟煎豆腐, 可想而知有幾好味 !)點擊圖片放大 地址: 長沙灣順寧道451號鋪 2. 富林御麵食品 唔好以為 Kongirl 叫你去買生麵返屋企煮, 呢個鋪頭除左賣粉麵之外, 即有賣腸粉、燒賣等小食, 價錢仲好相宜, 最適合當下午茶。腸粉夠滑之餘, 仲可以加自己鍾意嘅醬, 份量剛剛好之餘又唔會太飽。 地址: 長沙灣順寧道順輝大廈地下 (投注站再行前少少, 近保安道街市) 3. 金園茶餐廳 除左小食外, 長沙灣最多嘅相信係茶餐廳。金園最出名嘅就係蛋撻同菠蘿包。菠蘿包面個層皮好脆, 加埋大大個鬆軟嘅麵包都係$4.5, 好味之餘仲要好抵食! 另外必點嘅係蛋撻同熱奶茶。只要到2點左右, 茶餐廳就會賣新鮮出爐蛋撻, 每日仲要有幾轉, 拎得出去好快就賣完。坐係餐廳入面, 只要見到兩道大門打開, 你就知道又有蛋撻出爐, 仲要離遠已經聞到蛋香味。 蛋撻一個$5.5, 仲貴過個菠蘿包? 蛋撻個蛋好香蛋味, 仲要好滑; 加埋個酥皮直情係 perfect match ! 雖然係貴過個包, 但都物超所值! 當然唔少得就係一杯香滑奶茶啦 ~ 想食飽d 都有唔同茶餐選擇架 ~點擊圖片放大 +2 地址: 長沙灣青山道314號鋪 4. 一心日本料理 最初係長沙灣永隆街開鋪, 名命為達人日本料理。後來生意愈做愈好, 擴展到係附近嘅元州街開鋪, 係區內幾有名氣, 同時亦係同區少有嘅日本茶廳, 最近改名為一心。 每日下午都提供唔同餐, 當中有飯、拉麵、壽司定食、便當等等。個人首推魚生飯, 魚生片新鮮之餘, 飯量亦足夠, 而且有水準保證。想食日本菜又唔想行到西九龍中心咁遠, 不妨試試 ~ 地址: 長沙灣元州街324號鋪 (萬寧旁) 下次 Kongirl 再帶大家周圍搵野玩同搵野食 ~ ^^ —————————————————————————————- 想知多d 香港有咩好去處同有咩餐廳推介, 就痴實我地女孩像我 Kongirlike me 啦 ~ FB: http://www.facebook.com/kongirlikeme Blog: http://jmc.hksyu.edu/jour395/w15p2/ instagram: kongirlikeme
