經常係葵芳遊走嘅 Kongirl 最近終於得閒去試試德國菜。Berliner German Bar & Restaurant位於葵芳新都會廣場, 方便大家行完街去醫肚。唔好以為德國只有香腸同鹹豬手, 其實德國菜式都仲有其他唔同種類嘅選擇。 德國式雜菜沙律配紅菜頭, 洋蔥, 蕃茄, 溫室青瓜及香脆松子仁 配上獨有醬汁, 加上鬆脆嘅松子仁, refresh 之餘十分開胃 ! 煙三文魚水瓜柳脆薄餅 平時覺得煙三文魚有種怪怪地嘅味道, 但配埋水瓜柳同一條條火箭菜, 層次更為分明。同時, 亦因為加左火箭菜, 清新之餘亦能夠中和煙三文魚嘅油膩感。加上超薄同鬆脆嘅餅底, 食多塊都唔會覺得好 heavy。 肉腸拼盤配燒薯及酸椰菜 食德國菜又點少得食腸呢? 一個拼盤內有幾種唔同嘅腸, 可以話一次過滿足曬咁多個願望。記得要點埋個 mustard, 開胃之餘亦能夠中和油膩感。 秘製德國鹹豬手配香滑薯蓉及酸椰菜 侍應一放上枱嘅時候, 豬手嘅份量大到嚇親我! 廚師將豬手燒至外皮香脆, 包住嫩滑嘅豬手肉, 連在座嘅姊妹都忍唔住食多幾件。 餐廳內有唔同嘅擺設, 而且位置寬敞, 適合三五知己傾計。當晚Kongirl同3位姊妹食, 個個都食到好飽, 仲要傾到人地收鋪先走。 Berliner German Bar & Restaurant 地址：葵芳新都會廣場5樓531-540號鋪 營業時間：11:30 – 00:00 —————————————————————————————- 想知多d 香港有咩好去處同有咩餐廳推介, 就痴實我地女孩像我 Kongirlike me 啦 ~ FB: https://www.facebook.com/kongirlikeme Blog: http://jmc.hksyu.edu/jour395/w15p2/ instagram: kongirlikeme
