香港人真係好鐘意去旅行，就以過去的重陽節長假期為例，竟然有117萬人次出境，當中有91萬人次北上，外遊數字真係唔講得笑，唔知而家大家去旅行時，仲會唔會幫襯傳統旅行社？定抑或係透過網絡平台搞掂？疫情後回到傳統旅行社工作的在下Koala，早已深明「適者生存」呢個道理，係依家呢個年代，仲願意透過傳統旅行社購買旅遊產名既客人仍然存在，不真係愈來愈少，作為中間人既旅行社，提供的產品唔只係貼心既服務，仲有旅行社既溫度，同埋一次獨特的旅遊體驗。 前排應客人要求要親身到旅行社交收，我就好似以往一樣(疫情之前)，買左份外賣早餐，係預定時間前半個鐘返到Office，歎住咖啡準備迎接客人，呢種奢侈真係好難得，經過既同事都覺得我好 Chill 咁（哈）！客人準時到達，簡單打過招呼就開始我既個人表演，主導整個過程。由於辦理機票同埋酒店入住券等文件需時，我一邊同客傾計，一邊做工作，過程入面未有出現Dead Air，一個鐘內就搞掂晒所有手續，證明在下功力未有減退。係呢個看似平凡既一日，令Koala回想起以前係旅行社工作既點點滴滴。作為一個資深旅遊從業員既Koala，專長係計劃機票行程，主要工作就當然係透過面對面/通訊軟件/電話/E-mail接待客人，親自為客人安排行程同解答問題，處理各種繁瑣既細節。多年以黎，旅行社可以話係一個人與人之間連結的橋樑，我地唔單止係Sales咁簡單，仲係值得信賴既專業旅遊規劃師(Travel Consultant)，甚至係朋友。我地同客人之間既互動，充滿了人情味，互相增進左唔少知識，同時建立深厚既信任關係。近年隨住Online Travel Agency (OTA)同各大網絡平台既興起，智能手機既普及，全個世界都變得唔同左，客人親臨旅行社購買旅遊產品，真係已經好罕見。疫情過後，好多人習慣左係網上處理事情，雖然好似慳番唔少時間，令效率大大提高，不過人與人之間既接觸就減少左，呢種面對面既交流亦漸漸消失，線上平台固然係方便快捷，但就無辦法取代人同人之間既互動同信任。如果有得選擇既話，作為客人既「你」，仲會唔會選擇花多D時間，享受一場人性化既旅遊體驗呢？Koala有陣時覺得，「人」呢個元素係旅遊體驗入面係唔可以缺少既，係任何時候，每個人都係度扮演緊佢地既角色，透過人同人之間既互動，就可以產生好多意想不到既新體驗。旅遊血淚史 #16伸延閱讀旅遊血淚史 - 多謝公司請食飯！旅遊血淚史 - 我要多謝吳美珩！旅遊血淚史 - 108天流浪世界旅遊血淚史 - 上錯飛機入錯房？
