不經不覺,返左學已經半年,第一個Sem成績終於係上兩個星期出左,月初既Mid-term Test亦告一段落,得到比預期好的成績,算是個意料之外。抖左個令星期,又再回到交功課既日子‧有過之前兩科做Individual Assignment既經驗,今次做Group Assignment因為有分工變得更加輕鬆,加上而家讀書有好多IT輔助,比起上世紀方便得多,透過Whatsapp同Google Docs工作和做功課,都成為大趨勢,只要大家夾得到同演繹得好,應該都會順利渡過。經歷過一年零九個月NGO的山城工作,以及大半年的全職炒散,隨薯過份Flexible的時間,除左既定的返學和Part time出Job,生活已經無晒規律。近期多左返旅行社Office做野,但就唔多係尖沙咀開餐,只因旺區Lunch Time人多價格亦比較高,除非約左同事,否則平日已經唔想去多人既地方,假期更甚。為了減低時間成本,星期一至五放飯地方再次由大角咀回到深水埗,位於福榮街的小店Supreme Steak & Grill主打牛排,亦有各種意粉和日式拌飯供應,由於食物水準不錯,故成為在下近期的開飯熱點。因為Office搬到尖東,連接南昌、土瓜灣、何文田和尖東站的屯馬線,取代了繁忙的荃灣線,成為返工使用的路線,所以間中都會跨區開飯,可以試多D其他區域的小店。 位於福榮街(深水埗段)的Supreme Steak & Grill,餐廳有點低調,位置更有點不起眼,記憶中對上一次幫襯(亦是第一次),是跟NGO同事共晉牛排晚餐,眨下眼已經係兩年前的事了,某天在社交平台上看見餐廳晚市排餐薯條無限Refill,令在下再次在Lunch Time時段光顧 Set Lunch Menu共有兩頁,午市除了意粉丼飯咖哩,同樣有排類供應,債格從HK$60起跳而且水準不錯,算是深水埗區的Affordable Luxury,這陣子已習慣平日午餐當早午餐,加上胃容量早在NGO訓練有素,飯餐成為了在下的不二之選 餐廳樓底甚高,空間感十足,室內設計簡單,Setting組合性強,用餐環境尚算不錯 免費餐飲可選汽水或咖啡,亦可加錢配花茶和特飲,人(熊)到中年的Koala,每次都會點一杯熱咖啡,味道還不錯! 美國安格斯牛肉粒拌飯,是在下暫時試過最喜歡的Set Lunch選擇,牛肉粒肉質軟腍,而且相當滋味,最喜歡個飯有大量蔬菜,粟米青瓜和甘筍仔都很甜美 某天帶同家人一同前來用膳,平日12時多到達,可以直入唔洗等位,都係Koala選擇餐廳既加分位(對食客而言) 是日不想食飯,故點了個阿根廷香草醬鮮蝦意粉,蘑菇和蝦仁都夠爽口,唯獨香草醬比例過高,令到味道有點過咸 用餐當日因為工作上出了問題無乜胃口,但是飯總要吃,爭扎左一陣,決定點呢個邪惡既低溫慢煮無激素豬腩肉拌飯,希望可以「以毒攻毒」,來一個絕地反彈,這個無激素豬腩肉真係唔講得笑,成塊放入口好美味好Juicy,最後多得兩位好友相助,問題已經解決 起初以為呢個低溫慢煮安格斯牛腩飯係用比較Mild既日本咖哩,原因係個Set Lunch Menu好多日本元素,點知食落就發覺有D料到,口味和辣度傾向印度,好彩我都食得到 這個低溫慢煮安格斯牛腩,牛腩就有少量脂肪,肉質亦較腍身,都是好吃的,由於咖哩有點辣度,配菜紅蘿蔔未能發揮中和作用,對於只能接受BB辣的Koala來說,試一次便夠 最近一次前來,決定要對自己好D,食番個肉味十足既安格斯級封門柳,肉質鬆軟,配上黑胡椒醬,薯條十分酥脆好吃,晚市更有無限Refill 是日點了個五成熟(Medium)的封門柳,牛排烤得很香,原來封門柳Hanger Steak是指位於牛的橫膈膜的肌肉,顏色比較深,是一個刁鑽部位 睇番Supreme Steak & Grill個門面又真係幾低調,正所謂高手在民間,只要食物有水準,價錢又合理,就自然吸引到食客架啦!在下Koala就係其中一個,最有趣係,呢張相係響4月份拍攝,聖誕裝飾仍在(每日都是聖誕節),哈!Supreme Steak & Grill地址:深水埗福榮街161號永邦樓地舖伸延閱讀賞味香港 - 長沙灣的港式大牌檔 榮發茶餐美食賞味香港 - 長沙灣的泰國味道 泰道