想不到在「葵涌百慕達三角」覓食的日子,延續了接近半年才完結,秉承在下一貫遲找數(遊記)的作風,哈!數數手指,原來在下已經為葵涌山城寫上了十多篇「賞味香港」,作為第15篇,亦是最後一篇,今次就為大家介紹下位於和宜合道上的金森林,一家感覺比較麻甩既餐廳,午市有多款飯餐提供,包括多種口味的煎肉餅和以雞為主題的"十二道雞味",保証食客食得飽,所以深受體力勞動工人歡迎,包括當時工作極需要體力勞動既Koala。不知從何時開始(應該係當時份工開始),每個工作日都可以消化一整碟碟頭飯,食量之驚人,搞到我自己都有點害怕,假如沒有工作上的體力勞動,再配合閒時既跑步鍛鍊,在下的體重才能維持,但隨著胃口增加,喜歡食好西既Koala仍然好鍾意食野,直至離開山城,工作崗位上的轉變,身形再次加碼,加上人(熊)到中年,再次提醒我自己要好好鍛鍊身體。 Throwback番「40歲後留港Working Holiday」體力勞動的日子,就算返工前有食早餐,經歷完上午一至兩輪上落貨後,感覺好似做完幾Set gym,除非係大熱天時戶外工作,否則未到中午,個肚就會自然發出不受控制的打鼓聲響,所以成日恃住消耗得多,就要亂咁去食野,午餐食番個風沙黃金煎肉餅,都可以毫無罪惡感 係「葵涌百慕達三角」返工,位置雖然有點隔涉,港鐵又唔到,係葵涌山城上食飯,Set Lunch一般從四十幾起跳(2022年價格),所以係呢段時間係真係儲到錢架! 正所謂「小店就是任性」,星期日係金森林既定休日,對於當時需要輪班工作既Koala,假期搵食係少左好多選擇,重溫照片,發現每次Order既肉餅午餐都有小小出入,因為係小店開餐,係好睇當日老闆同員工心情,有時白飯可以變菜飯,無湯又可以送湯 避風塘煎肉餅,加入了很多的炸蒜,夠晒邪惡!煎香的肉餅混和了肉汁外脆內軟,佐飯一流!喜歡主菜以外還有合適份量的蔬菜,出街食都可以補充一下纖維 所謂黑松露煎肉餅,其實都只係加左黑松露醬係境肉餅上面,提升了肉餅的味道,感覺又High Class D,當然,最緊要係個肉餅要煎得好啦~ 咬開肉餅天見功架,肥肉比例唔算好多,肉汁豐盛,係熱氣左少少,但香港地普遍食客都鍾意食香口野,尤其是係年輕人 某次和同事前來,同事點選的上湯雲吞雞,呢個Set繼續以份量取勝,味道亦都不錯 上湯雲吞雞配上菜飯和湯,以HK$45的價格而言,真心覺得十分豐盛 還記得首次前來光顧時,是因為同事推介這裡的海南雞飯,那時正在計劃想寫一篇有關海南雞飯的Blog,最終只在Instagram上發表了相片,齋睇賣相,可見金森林既海南雞飯(HK$45)相當抵食,海南雞的份量之多,是有一點點誇張,最重係無骨,哈! 在和宜合道上就有幾家以金字頭命名的餐廳,包括在下未光顧過的金和林和金椰林,由於這裡位置鄰近城門水塘,幾次到訪金森林,除了在附近工作的勞動人員,也有不少行山友光顧,證明呢家餐廳有一定吸引力金森林地址:葵涌和宜合道202號誼發大廈地下15號鋪伸延閱讀賞味香港 - 葵涌山城 街坊食店 小上海賞味香港 - 葵涌 有口福 牛什專家 越南河