《Kitokito市場 (きときと市場)》行下行下原來都就快6點都係醫肚要緊富山車站入面有個「きときと市場」，裏面有各式各樣餐廳、手信店同藥妝舖 富山比較出名/多遊客試嘅餐廳都可以係度揾到好似白蝦丼飯 / 迴轉壽司 / 富山黑拉麵 / 冰見燒肉 / 韓國料理等點擊圖片放大 ----------------------------------------------------------------------------《壽司玉 (廻る富山湾 すし玉)》呢晚我就選擇左係「きときと市場」一間Tabelog 3.5分，網上都好多好評嘅迴轉壽司 - 壽司玉 基本上係5點後都預左要排隊架啦聽到前面都唔少廣東話 / 國語，本地人都多嘅我6點去到大概等左4個字就入到去鋪頭面積唔大，大概有20個單人位 + 4張卡位都係環繞師傅工作區域 碟仔同杯都可以係迴轉帶揾到餐廳主要以平板電腦點餐，而且配備圖片，亦都有中英翻譯非常方便唔識日文人士 初到貴境當然要品嘗下富山灣名物 – 螢光魷魚同白蝦我叫左呢款有齊富山灣特產蟹、螢光魷魚同白蝦嘅「富山滿盛」￥770 蟹肉，蟹鮮味唔夠，食唔到甜味，亦都比較冰凍，似係未灘夠 第一次食螢光魷魚，係富山灣真係非常出名嘅海鮮，係好多日本餐廳都未必成日見到。咬落去去好爽脆，上面少少芥末醬同魷魚個咸味都幾夾 白蝦甜味都足，口感係屬於軟糯。外層用昆布取代壽司都係好特別做法，雖然口感上都仍然做到好似紫菜咁有微微薄脆 之後叫左份雜錦天婦羅配茶碗蒸「天ぷら盛合せ」￥550呢個好有驚喜炸魷魚好彈牙，炸粉都好厚薄都好適中炸蝦雖然炸粉厚左少少，但成隻都好酥脆，裏面蝦肉炸青椒好好食!!!! 炸粉薄，味道好甜之餘，辣味又唔會太攻茶碗蒸蛋滑但唔夠蛋香，裏面有塊鯖魚肉帶少少咸香同微腥，底部蝦仔肉霉，白果就好綿爛 海膽壽司 ￥770一碟有2舊不過1舊腥1舊就好甜，相對地品質未算好穩定 扇貝壽司 ￥385呢個好好食，扇貝肉厚彈牙又夠鮮甜 吞拿魚3貫拼盤 (まぐろ三種盛り) ￥660呢個性價比我覺得係幾高中拖羅、赤身、長鰭吞拿魚壽司各1件中拖羅壽司油份都算豐富，亦無筋，帶好微微油甘味長鰭吞拿魚壽司無乜味，有筋，不過始終長鰭吞拿魚所以係油份ok，呢舊wasabi師傅落得重手左赤身壽司比較失望，有筋之餘無味，完全無好嘅赤身應該要有嘅甘酸味 逢星期一至五全日都係免費任飲用蝦頭熬煮嘅麵豉湯就係鋪頭最角落汽水機隔離，自己去裝湯 Overall黎講我覺得呢間壽司店表現中規中矩有個別壽司表現係真係幾好，但都有個別below average不過見網上面普遍讚賞都比較多，可能係我臭手姐而且價錢上都唔貴，大家都可以放心食係北陸地區Total有4間分店富山站同金澤站應該對大家都方便廻る富山湾 すし玉 (富山駅店)https://goo.gl/maps/1QFGNE1rUhPJWHe48--------------------------------------------------------------《富山MAROOT(富山マルート)商場》如果大家想係富山站附近行街最好行應該都係站隔離嘅MAROOT商場 MAROOT商場其實都唔大，樓高4層裏面都有無印/JINS/ABC-Mart/Uniqlo/藥妝店/Loft/Porter呢類行下食方面選擇都唔少，海鮮/日式洋食/中菜都有上次係仙台食過東山牛舌，呢度都有分店 都有個細超市不過8點就收檔，要買生果就趁早題外話，車站附近都真係無比較多選擇超市，所以大部分旅客都係依靠MAROOT呢個超市 其實真係唔算特別好行純粹富山站附近真係無乜像樣嘅大商場尤其夜晚係富山其實無咩好做，就唯有靠個商場仔消磨下時間不過個商場(除食肆外)都係收夜晚8點一到夜晚8點商場收檔，我就返酒店浸下浴啦浸浴個陣仲識到個香港朋友大家仲係裸體狀況下吹左陣水，交換下旅行心得再夜少少就食埋個酒店拉麵宵夜
