Hotel Icon The Market 飄香榴槤下午茶 作爲一個榴槤控一直都好想試 Hotel Icon The Market 出嘅榴槤High Tea見到超多Youtuber都狂讚又話D24 貓山王 D101 講到天花龍鳳而且話大部分食都係用榴槤製成真係吸引死我 適逢母親節身爲孝子就緊係帶埋都係榴槤狂熱分子嘅母親大人一齊去High下Tea 我提早一個禮拜打電話去訂亦都要求想要近窗邊職員都好好安排到比我另外要預繳HK$200作爲按金 下午茶3點開始好多人2:50左右已經到 一埋座就已經見到有個假榴槤同一杯雪糕係枱面 然後侍應會陸續送上裝係三層架嘅餐點利申小弟係港女，一送到就已經瘋狂打卡 <自家製D101及D24榴槤雪糕> 基本上係榴槤雪糕 上面再擺一pat榴槤蓉係上面 會見到雪糕好滑，唔係完全固體狀但又未到溶雪糕方面 榴槤同奶味我覺得平衡得幾好雪糕最主要味道來源就黎自pat榴槤蓉，超creamy同好夠榴槤香 提提大家 杯雪糕係任食架！！唔食多幾杯真係隊唔住自己啦 之後睇返我地三層架餐點底層全部係鹹點，而上面兩層都係榴槤糕點、茶點同貓山王榴槤肉我會逐一介紹！ 餐廳職員建議我地由最底開始食起 不過我地第一樣就係先食最頂個兩條蛋捲先唔係普通蛋捲啊，係榴槤味蛋捲職員建議可以蘸個榴槤雪糕一齊食 我自己係無蘸雪糕下咬左一啖蛋捲都有榴槤味，不過唔重就好似平時買一罐罐唔同味果種程度 <忌廉蘑菇脆米餅> 蘑菇幾香而且無將所有蘑菇切碎/打蓉，保留返蘑菇本身少少咬口米餅相對無咩特別，夠脆但唔夠香 <素肉丸配咖喱醬> 呢個真心令我好驚喜我本身唔好素肉，亦都唔係食素嘅人但今次個素肉丸係口感上真係令我有錯覺以爲自己食緊肉丸咬落去有汁，我估係來自菇類咖喱醬我個人覺得係敗筆，完全無香料味，似平時快餐店個隻 <黑松露蟹肉多士> 煤氣味好濃，我唔敢肯定係咪好事啦同我以前係外國食個d係有分別 如果唔寫蟹肉兩隻字，我真係完全feel唔到食緊蟹肉一梳梳甚至一絲絲口感完全無曬，蟹肉味欠奉食到完全只係個調味 塊多士都唔得唔夠脆有少少硬 <吉列椰菜花配鮮茄蛋黃醬> 吉列椰菜花炸得幾香口就算攤左陣都無油溢味吉列椰菜花本身已經好夠香反而個鮮茄蛋黃醬就變得可有可無而且都係得蛋黃醬味，感覺上無鮮茄存在過 <煙三文魚沙律多士> 煙熏味夠，而且有淋上橄欖油所以魚部分做得ok唯一敗筆都係多士部分 係咪睇鹹點睇到悶呢即刻開始我地重頭戲先!! <榴槤斑蘭千層蛋糕> 每層都好分明係斑蘭蛋糕同榴槤斑蘭醬層層叠斑蘭係榴槤面前完全無失色，味道依然好突出兩個主角都配合得好好 <貓山王榴槤布甸> 布甸榴槤味唔重，幾乎食唔到主要係靠上面Pat榴槤蓉我個人就麻麻地個布甸，個口感太綿滑，似羊羹無個種堅挺得黎好滑溜口感 <D24榴槤椰子糯米糍> D其實係代表durian 數字就係唔同品種就好似日本士多啤梨都有好多唔同品種名 上面少少金箔就裝飾用啦，如果唔係點收你貴d糯米糍外皮都唔會過厚，椰子味都有少少不過作爲餡嘅D24榴槤蓉 我就覺得個味唔夠出有少少比同樣係濃味嘅椰子搶左風頭 <D197榴槤芝士泡芙> 金箔依舊係裝飾泡芙外皮好淋，餅皮味都比較弱咬落到除左榴槤味都仲係榴槤味，芝士好似消失左 <抹茶荔枝D24榴槤卷> 好明顯個卷蛋皮係抹茶整啦而荔枝部分我估計係加左係中間榴槤醬 增加口感不過榴槤真係太犀利，基本上成舊野又係得返榴槤味lolWhere is 荔枝!!!! <金榜榴槤芝士蛋糕> 先忽略上面d白朱古力花花同忌廉我覺得下面個榴槤芝士蛋糕係做得好出色個餅底好香牛油味蛋糕芝士味同榴槤味都好balance口感夠挺但又少少綿 但點解要加白朱古力花花同忌廉啊……忌廉過多啦，完全破壞曬個蛋糕口感白朱古力花花要上面個朵得啦…兩大朵味道太重，口感都過多妹仔大過主人婆啦 <馬來西亞直送貓山王榴槤> 食大件定細件就真係好睇你運氣我其實全餐飯最期待就係呢個啦…貓山王啊!!!! 金黃色肌膚，飽滿體態，綿滑身軀食落去真係無得輸甜到真係好似浸左糖水，而且細味品嘗就會食到少少苦堪稱完美 平時街市買個d青尼 寶石球 大細釘真係行埋一邊啦 <烏龍茶啫喱> 最後先食呢個係純粹等我除下口臭，緩和返個味道烏龍茶夠濃，又有d回甘食左一大堆榴槤最後食呢個烏龍茶啫喱真係夠曬清爽推薦大家擺最後先食 <英式傳統鬆餅> Scone我就無食到啦，當刻太飽打包返屋企塞比屋企人食 每位都包一杯野飲好似我叫茶的話就會一壺連茶包上，飲曬可以再幫你加熱水 -----------------------------------------------------------------------------------------------埋單兩位就HK$678另加一 (再-200按金)我係poly舊生就有85折，但講緊就算折完其實都要6百幾 如果你問我抵唔抵呢我又好老實講真係唔太抵當然啦 去得4-5星酒店high tea都預左貴，環境同服務都要錢 但我個人唔會再去第二次...寧願真係去高檔生果鋪買個靚榴槤係屋企開住冷氣慢慢嘆會開心d 食物方面鹹點個part真係好普通質量質量，質未夠，量亦唔係取勝之處隔離酒店做緊high tea任食添 甜品部分，我覺得存在最大問題係主次唔鮮明例如榴槤卷、泡芙，榴槤作爲”主”, 完全蓋過過曬其他味道，完全無埋”次”呢樣野又例如榴槤芝士蛋糕，太多”次”，反而對”主”嘅榴槤芝士蛋糕喧賓奪主 我會形容今次high tea係一個好特別體驗品嘗到用榴槤製作到好多唔同款式食物不過我傳統人 都係鍾意食原隻榴槤多d
