5/1 日本三大橋 – 錦帶橋 & 日本三景 – 宮島(嚴島)(錦帶橋 — Ueno星鰻 — 宮島 — ばくだん屋辣沾麵)錦帶橋旅程第二日係一個心情麻麻嘅一日第一個原因係今日天色好一般，天陰、密雲第二個原因係小弟病左！其實第一晚個陣已經開始流鼻水去到第二日起身已經覺得個人唔夠精神，鼻水不斷流，但都唯有頂硬上，啪左粒感冒藥就出發第一個行程係被譽爲日本三大橋嘅錦帶橋錦帶橋位於岩國市，搭JR要係岩國站落車，搭新幹綫就要係新岩國站落車兩者落完車都要轉巴士比埋個巴士時間表大家望下其實岩國站出發係班次好密，而新岩國站就反而比較疏，所以有pass嘅大家要自己遷就http://www.iwakuni-bus.com/timetable20171001/route/1001visitors.weekday.pdf (平日)http://www.iwakuni-bus.com/timetable20171001/route/1001visitors.holiday.pdf (假日)另外其實有個叫做錦帶橋周遊券嘅Pass(1540円)包岩國站--錦帶橋巴士來回、錦帶橋來回過橋費、岩國城纜車來回及入城費可以係岩國站西口一出嘅觀光案内所度買如果好似我係新岩國出發，就無得買呢個Pass不過都可以去到錦帶橋巴士站觀光案内所買另一款錦帶橋觀光套票(940円)包錦帶橋來回過橋費、岩國城纜車來回及入城費單程新岩國 - 錦帶橋車資係350円岩國 - 錦帶橋車資就係300円我呢一日就搭左08:26新幹綫落新岩國轉08:47前往錦帶橋嘅巴士 刻意提早左幾分鐘去排隊同埋大家記得要望清楚自己要搭邊架新幹綫留意埋自由席係邊幾卡，一般都係最前/最後幾卡因爲部分JR pass都係只係包自由席，包括我個張 不過原來呢個鐘數都無乜人搭新幹綫 然後就開始食我嘅早餐係7-11買左呢份我最最最愛嘅照燒雞沙律蛋三文治同一包蘋果汁呢個三文治我真係好中意，每次去日本都一定要食個雞好入味，加上材料號豐富，唔會得一pat醬，完全唔膩 由於車程好快，眨下眼就已經到新岩國站一落到大堂其實已經會見到巴士站，就係面前呢一個 同時間大家都會見到–落雨啊！！！！我個心都碎曬去睇靚景先黎落雨，即刻心裏面咩粗口都講曬明明琴晚再三check天氣都係話多雲巴士係我打開遮嘅同時瞬間就埋站我即刻9秒9衝過去上車所以無影到架巴士係點，不過其實都係一架普通巴士個顯示牌會寫住“岩國站”同“錦帶橋” 係後門一上車，有IC卡就嘟卡，無就記得攞整理卷落車個陣係前門落車，有IC卡就再嘟卡，攞整理卷嘅就記得望下卷上面個號碼然後再擡頭對下顯示牌個號碼，下面個3/4位數就係你要比嘅車資無散紙點算啊？將錢擺落司機隔離部機，記得係寫住硬貨兩替和紙幣兩替嘅入錢位，就會幫你唱錢你唱1000円就會比返1000円散銀你，無食到你車錢，所以記得要另外再比車錢膠箱係比你入車錢同整理卷一落車就會見到個觀光案内所可以買錦帶橋觀光套票 然後望下對面......就係錦帶橋啦！雖然周圍落住雨，但都無阻我興奮心情啊 先唔急住去行橋，周圍行下望下成條橋先加上周圍霧氣好強，雖然無陽光照射，但就令到環境有種迷幻感覺，更加好似置身係幻境 無論從咩角度睇，錦帶橋都好有懷舊味道加上周圍建築唔高，又富有舊日本風味成個環境其實都令人放慢腳步點擊圖片放大 正式去行橋啦我自己就無買到任何套票，因爲天色比較差，上到岩國城都無乜靚景睇單買錦帶橋來回過橋就500円買完記得keep住張飛，因爲你由對面返過黎都需要用返張飛一入場就要你小心睇路 錦帶橋其實係係一條木造拱橋橋梁橋梁係由五座拱橋組成，除左橋墩用石製成，其餘橋身都係木頭歷史非常悠久，並且參照過杭州西湖橋梁興建方式 不過老實講，都係遠處望條橋正好多企係橋度反而無咩感覺行左過對面，大家會見到一間雪糕店 呢間雪糕店最出名係有一百種味道基本上你諗到而又可行嘅味道大部分都有唔知香港唔稀有嘅榴蓮、山竹味有無呢再行前少少就會見到吉川廣家公像少少知識，吉川廣家係日本戰國時期嘅武將 其實香吉公園再行入少少就係纜車站不過我既然唔搭就無謂過去啦，落雨濕濕 係另一邊影錦帶橋其實都好靚如果係4月同11月去我相信一定會靚爆鏡因爲錦帶橋係著名櫻花同紅葉觀賞地黎點擊圖片放大 +2 周圍行多陣之後就啓程前往另一個日本三大如果大家走個陣係去岩國站就去1號巴士站，如果返新岩國站就去3號其他照片： 廣島縣美食：《うえの》 Ueno星鰻店去到宮島口站第一件事就係去醫肚有好多人都推薦去宮島上面嘅牡蠣屋，但我就無太大興趣因爲小弟本身對蠔其實麻麻地，要我食蠔餐就真係免啦反而星鰻卻係我一樣好想食嘅食物所以我選擇左位於宮島口站前著名うえの Ueno星鰻店呢間星鰻店真係好出名，幾乎無時無刻都要排隊我11點半去到，結果排左30分鐘先入得座同埋如果你堂食，記得要係門口個玻璃窗口攞號碼籌，再走過去左手邊趟門入去等位明明影低左個大門口，但揾唔返輻相入到去等位區其實都真係好多人等而且座位唔多，大家要眼明手快啦日本好多食店都係唔會搭，所以我係一個人坐四人枱......但明明就有空嘅單人位，搞到我好尷尬我已經試過好多次呢d經歷 我就叫左價值2000円嘅穴子飯(上)，其實即係大星鰻飯無錯啊，係日本穴子魚其實就係星鰻係海鰻其中一種，外觀相似，但仔細睇就會發現唔太相似而味道上就等我轉頭介紹啦講返價值2000円嘅星鰻飯，我只係比左1000円就食到點解嘅？點解嘅？點解嘅？點解嘅？記唔記得我係廣島機場買Pass個陣送左本Fun Pass Hiroshima記唔記得我講過呢本Fun Pass Hiroshima入面有好多食店coupon而其中一間就係うえの提供1000円食到價值2000円嘅星鰻飯 (已經取消此優惠)你order食物個陣show本野比店員睇，店員就會知你想叫呢個而且呢個coupon可以用3次，換言之如果你三個人黎，就可以叫3個呢個Set啦 比大家望下呢個Set有醃漬菜、一碗麵豉湯同一碗星鰻飯黎個陣好貼心為大家蓋上，令我更加期待打開個一刻 一打開個刻真係嘩一聲飯上面有好多塊顔色比較淺色嘅星鰻星鰻上面醬汁唔多，唔會好似平時蒲燒鰻魚咁上面有大pat醬うえの將星鰻烤得非常適中，望顔色就知道無過火 咬落去其實同平時鰻魚真係好唔同口感比鰻魚為爽，原因在於肉質比較扎實另外，由於醬汁較少，所以本身肉味好突出而且燒烤功力犀利，另外表層留有少少脆脆地我甚至中意呢個多過平時蒲燒鰻魚飯方面就係平時日本珍珠米，粒粒分明之餘唔會過黏不過醬汁可以多返少少，食到後尾無汁撈飯另外分量對於成年男士恐怕爭左少少啦不過唔緊要，搭船入宮島繼續掃街！店鋪座位唔多 所以等位都好正常
