五ノ神製作所 呢一日Lunch我就選擇左新宿另一間同樣好出名既沾麵--五ノ神製作所 之前已經聽聞過五ノ神製作所每到12-2pm同6-8pm都排曬長龍 而且遊客比起風雲児、無敵家少好多，多數都係當地人 但係Tabelog都係有3.79分架，主打係蝦湯沾麵 JR站行去大概5分鐘多d而新宿三丁目行去就記得係E7/8出啦，大概都係行幾分鐘就到 一到步首先第一件事要係門口排隊 然後排到咁上下就會有職員示意叫邊幾個可以輪流去買飛 如果當中有你既，等前面果個返到條隊你就可以入去買飛，然後再出返黎原先個位繼續排 所以無叫你就唔好去買飛啊，千祈唔好好似我咁柒啊 我出發前見到有個台灣blog話先去買飛，之後再排隊 我一到步就走入去買飛，結果比個美女店員請我出去 柒到喊 好在我12點到人都唔算多，大概得十幾個人排我前面 不過呢度翻枱速度就無風雲児快 接近既人流，我就等左45分鐘 因爲一早收左飛，所以一坐低等1-2分鐘就有得食 第一橫行淺橙色既係原味蝦湯沾麵 第二橫行偏紅色既係味噌蝦湯沾麵 第四橫行橙色既係番茄蝦湯沾麵，亦都係最受歡迎既 每一款蝦湯沾麵都有4個選擇 我由左手邊開始解讀： 正常 / 加蛋 / 加多d肉 / 加蛋又加肉 店家提供左紙圍裙同濕紙巾 有需要你地可以去買飛個部機隔離攞 另外要水的話，第一次都係要自己去部機隔離攞杯，但再斟就可以斟枱面上個壺水 我就要左番茄蝦湯沾麵加蛋又加肉 1180Yen 其實都唔平...... 但我必須同大家講係物超所值！ 大家望下個沾麵，分量十分之多 店家既並盛係520g, 比起坊間270g多左250g 所以女士們會比較吃力不過店家好細心，如果女士覺得並盛太多就可以要小盛340g再會額外送你野，比你自選要蛋要菜定多d肉 呢間我認爲比較fusion 因爲太麵上會有一pat綠色醬 好野黎架！係平時意大利粉個d青醬，比你撈埋d麵食 另外又有塊法包比你點汁食 不過以上呢兩樣在我而言都只不過係小點綴 因爲真正令我驚喜係個湯 個湯雖然有少少番茄酸甜味，而且仲真係有幾粒車厘茄 但絲毫無蓋過蝦既鮮甜味，甚至比起平時蝦湯仲要厲害 番茄酸甜味同蝦味互相映襯，而且超級夾就算就咁都唔會覺得好重口味 不過油左少少 另外個湯入面有竹筍，切成三角形 夠爽口又入味 而入面除左有平時常見既叉燒之外 更加有兩舊雞，都好嫩滑 叉燒就正常，都係無敵家叉燒正d 蛋方面如果再流心d就好啦 不過就無乜味，你浸下個湯就會好正 最後係個麵，兩個字--彈牙 而且掛湯能力超高 食到最後就問店家要熱水 加落去個湯度直接飲 正！ 呢間我係超級推介!!!!因爲蝦湯沾麵本身已經唔常見，今次仲要係番茄蝦湯沾麵 個味道同平時風雲児、無敵家d重口味好唔同 但又比大勝軒個清淡口味更加吸引 如果要我排我心目中最愛 本身排第一既六厘舍.....sorry 你要讓位 而加我最愛係五ノ神製作所！ 其次六厘舍 風雲児 無敵家都好中意 但唔中意無敵家要排1-2hrs
