《 德島拉麵 [ 麵王 ] 》 我其實呢一日過得都好辛苦 點解？我依家開始講啦 我稍作休息一陣，大概夜晚7點鐘就出去行陣 我首先就當然係去sogo行 因爲唔去sogo都無乜地方去 眉山同阿波舞我都安排左第二日先睇 呢個都係我一個安排失當嘅地方 等到講第二日篇幅先話比大家知點解失當 咁岩sogo其中一層做緊食物推廣 集合左日本各地出名嘅食品 點擊圖片放大 望左陣 大概7點半行上去muji 點知店員話我知已經收鋪 我無check清楚，以爲收8點 結果又無野行 我呢一刻都唔知去邊好 d商場都已經閂曬 德島又無大型supermarket 唯一一個係sogo樓下都閂左 (所以大家要買日用食品就去便利店啦) 我只能做嘅就係去食dinner 我之前都講過係德島會食兩餐德島拉麵 今晚就食其中一餐！ 係麵王嘅德島拉麵 德島拉麵特色係在於湯底濃郁嘅醬油豚骨湯底 而且唔係用叉燒，而係用豬肉片 今次選擇嘅麵王係德島縣一間好出名嘅拉麵店 而我第二晚會食另一間都係超受歡迎嘅德島拉麵 麵王係德島站附近 7-11轉彎就會見到 7點半食個陣人流唔算多 記得先去買飛，然後就排隊 500Yen個款就係傳統德島拉麵啦 等左一陣就入得 入面作爲大概20個左右 由於未入座前職員已經會收左你d飛 所以你一坐低好快就有野食 我就叫左碗 德島拉麵, 一碗竹筍, 一碗白飯, 再加隻流心蛋 我超級中意食日本嘅竹筍 擺落拉麵真係好正 而且有免費辣芽菜 好正！！！ 我一個人夾左接近半罐 點擊圖片放大 講返拉麵 湯底係真心重口味，但唔係油膩個種，而係鹹淡味 唔建議你就咁飲曬 有d人會加生蛋落去，等個湯淡少少滑少少 但我就無咁做，因爲我唔太中意生蛋 麵好彈牙有咬口 不過我始終中意太麵多d 但幼身好處在湯好容易夾雜係麵與麵之間 肉片真係好嫩滑，而且醬油味好入味 但得3-4塊唔夠喉 而食完麵就加飯落湯度 係當地人好常見嘅食法之一 撈埋d湯就易入口好多 大食嘅朋友不妨試下呢種食法 因爲一碗麵真係唔多 出到黎見到好多人 最後去水果店買埋士多啤梨就返歸 個陣係20:15嘅事情 點解我話呢一日過得好辛苦 係因爲呢一日我突然有種莫名奇妙嘅寂寞感同孤單 一個人坐係張床度唔知做乜好 我從未試過一個人去旅行會有呢種感覺 可能本身個人已經唔夠精神 所以個腦sort sort地 但好在之後幾日都無再出現呢d感覺 麵王 係德島拉麵中超受歡迎既一間之一，價錢又平，而且係正德島站隔離，無敵方便 https://goo.gl/maps/vuRYJvxc4hT2
