25/5 鐵路都市 點解叫鐵路都市？ 因爲呢一日行程係去參觀鐵路博物館同不斷來回搭JR係新宿、涉谷、原宿同池袋。 由於係京都無去到鐵路博物館，所以我發誓係東京一定要去！ 所以我之前已經決定刪減我呢一日嘅Shopping時間，換取去鐵路博物館。 雖然好多人都會話東京鐵路博物館，但其實鐵路博物館並非位于東京都内，而係位于埼玉縣埼玉市大宮區。 要去博物館，幾乎99%嘅人都會選擇乘坐JR前往，因爲最方便。 首先可以乘坐JR/新幹綫前往大宮站，然後出閘跟住指示去到新都市交通伊奈線搭一個站，就直接去到門口。 而由於今日要乘搭多程JR，所以今日買左張JR東京市内1日Pass<東京都市地區通票>，只需要750Yen，就可以係東京都市指定範圍内任搭JR。 最遠可以去到前往埼玉必經嘅赤羽、臨近迪士尼嘅葛西同靠近羽田機場嘅蒲田站，覆蓋範圍基本上涵蓋整個東京都市，基本上搭夠4-5程已經輕鬆回本。 而我地今次係板橋站已經啓動呢張卡，因爲我呢d師奶當然要慳得1蚊得1蚊！ 如果由板橋直接去鐵路博物館，需要573Yen；如果我用Pass係赤羽出閘，然後用IC卡入閘，費用會係487Yen。 我只不過要浪費多一分鐘，就可以慳88Yen，來回慳176Yen，兩個人就係352Yen！ 既然平時都咁多人係上水出閘再入閘，去到日本都無咩所謂。 因爲我地計過呢筆慳左嘅錢再加上之後會用到嘅車程，絕對回本！ 記得要乘搭非埼京綫前往大宮，因爲埼京綫好多站要搭好耐。 如是者我地利用呢個方法去到赤羽轉湘南新宿綫去到大宮，再轉車去到鐵路博物館。 鐵路博物館係門票價值1000Yen，比起京都果個平200Yen。 門票好得意，係一張卡。起初以爲可以自己keep，點知到最後原來要歸還，所以無影到相比大家。 一行入去博物館轉右，已經見多好多列車模型。 裏面好多列車都係以前行駛過，絕對有歷史價值。 而且不同時代嘅列車都有，款式各異，有舊有蒸汽式、鍋煤式，亦都有新款JR列車同新幹綫模型，滿足鐵路迷所有願望！ 中間係一個轉盤，我印象中12點個陣就會有展館職員吹鞍，惹黎一大班觀衆睇。 有d特別珍貴嘅列車都用玻璃箱蓋住，唔允許遊客踏入。 不過鐵路博物館有d失望係無真新幹綫睇，連車頭都無。 二三樓係d遊戲室同展覽室。 其中二樓有個展覽室每一個鐘頭就會有一次Show，而個show主要係簡介JR旗下所有列車。因爲全程日文，好多我都聼唔明，所以我專心睇模型算。 係二樓同三樓，有個小遊戲地帶。 我特別推薦個度，並非因爲遊戲特別好玩，相反有d無聊，而係個度有塊大落地玻璃可以望出去新幹綫嘅軌道，可以望到新幹綫行駛。 我坐左2X分鐘望到4、5架新幹綫風馳電掣，超級high！ 我係鐵路博物館都逗留左個半鐘-兩個鐘，之後都依依不捨離開，前往赤羽再轉乘其他綫去涉谷。 記得個搭車App教你點搭你就點搭，因爲日本交通好有系統，App教嘅方法永遠係最快。 我地第一站係涉谷。 而落車第一件事就係去醫肚！呢個旅程我地品嘗左幾款拉麵，唯獨有一款係香港都好出名但又未食嘅，就係一蘭拉麵。 我自己當年一蘭係銅鑼灣開店個陣已經去朝聖過，覺得普通，所以刻意黎日本試下本尊真面目。 有留意開我遊記嘅人應該都知我個人偏愛濃味湯底、粗同硬麵。 而一蘭採用嘅係幼麵，雖然唔係我杯茶，但食上去其實更滑，同湯頭更match。 其實一蘭無論從湯底、麵條定特製醬料都好神秘，從來無公開過秘方。 所以好多人都唔知一蘭拉麵究竟係點形成。 先講湯底，我會形容爲超濃郁，而且因爲係九州博多代表，所以都帶有少少鮮味；赤紅醬料辣辣地，配合拉麵都好夾； 叉燒應該係用上梅頭肉，咬落去都好淋，好容易入口。 而另外，一蘭拉麵面頭有一陣油，聽聞其實係用作保持溫度。 但其實層油係整碗拉麵我最唔中意嘅地方，可能因爲我個人對太油膩有d反感。我飲左幾啖湯我就已經頂唔順，唔可能再飲。 不過見隔離個朋友就話好正，全部飲曬。 之後上網睇好多blog，對一蘭都係褒貶不一，可能我就係覺得普通個批啦。 不過同香港比，無論湯底濃稠度、麵條煮嘅手法，日本都明顯略勝一籌。 然後就開始我嘅涉谷之行。 呢一日天色唔係幾好，街上行人人數明顯少左，趁仲未落雨就快d行下。 不過因爲本身係大阪已經買左好多服裝，黎到涉谷見到好多相同牌子就自然無咩興趣。 而且我對日牌興趣不大，所以大家一直推崇嘅涉谷我行左一陣就算。 不過留意翻，呢度有兩間一蘭，大d果間附近一次過有齊曬兩間日本著名100Yen店--Daiso同Can☆Do，而且寶物好多，一定要行啊！ 跟住下一個景點係原宿。 真係好抱歉因爲之前手快快del曬係原宿嘅相，接過而家無曬所有原宿車站同竹下通門口嘅相。 一出JR站，已經見到竹下通多人好暈，人山人海！ 行到入去真係好逼....明明唔係假期，點解都可以咁多人！ 我地慢慢行，沿途都係賣藥妝、服飾、可麗餅同其他飾物爲主。 如果你問我男仔岩唔岩，我會答你潮童應該會中意。 呢度Target好明顯係女生，飾物、服裝都係女裝爲主。 呢度沿途都好多賣可麗餅嘅地方，而且每一間都好多人排，而餐牌都好接近。 我係其中一間買左個芝士蛋糕士多啤梨可麗餅，芝士蛋糕其實好細，但好多士多啤梨，中學雪糕都好軟滑啊。 最緊要賣比我個d姐姐都好正xdd。 另外，我都試左呢個，黎自北海道嘅長條形泡芙！ 呢個泡芙真係厲害，離遠已經聞到好香牛油味。 同一般泡芙唔同，Zakuzaku嘅泡芙呈長條形，而一般泡芙就係類似球體。而且我地平時食到嘅泡芙係鬆軟，但Zakuzaku呢個泡芙係非常之脆而且牛油味好重。 入面嘅卡士達醬好冰涼，配合暖呼呼而又脆嘅外層，真係邪惡到不得了 OMG！！真心推介必食！ 不過由於竹下通真係適合少女多d，所以我地好快逃離到新宿！ 人地有套新宿事件，我地都有套，不過係新宿買錶事件==" 去到新宿，其實我地都係抱住求其四圍行下就算，因爲要買嘅野其實都已經買得七七八八。行下行下，我地行到Big Camera，一個專賣電子儀器嘅大型電器店。 因爲友人一直想買G-Shock，而知道日本平，所以都特意去睇下。 去到個陣我朋友即刻已經睇中左，準備比錢個陣，我幫佢上網search左Big Camera Coupon。 因爲通常呢d大型店鋪都好大機會有coupon比外國人用。果然不出我所料，比我揾到張93折Coupon！雖然看似唔多，但都係個句“慳得1蚊得1蚊！” 不過雖然寫住臺中旅游博覽會，但其實我地香港人都用得！可惜去到今年6月30號就到期。 不過唔緊要，我另外幫大家都揾到張7月30號先過期嘅Coupon，但就得94折...sosad 而最後我係友人瘋狂游説嘅情況下，又破左少少財，買左隻價錢都可接受嘅錶。 利申好耐都無帶過手錶，就算帶都係帶d Cheap野。 所以我買之前考慮左好耐.......仲耐過我係大阪藍天大廈上個條扶手電梯(平遊日本第六章)！ 之後行左幾個大商場，係Gap買左幾條Underwear，再係muji掃左好多文具翻香港。 好快就已經夜晚8 9點，行到都無力，先醒起原來未食dinner。 又同時發覺今日無帶旅游書出街，唔知食咩好。我朋友就提議不如無敵家啦。我本來想拒絕，因爲一到步個日我已經食左。 但個日落機朋友唔舒服，結果自己係酒店休息，而我當日其實係孤身隻影走去無敵家嘅。朋友未食到無敵家唯有圓佢心願。 結果我又走翻去池袋，又排左一個鐘先入到去。 今日我就叫左本丸麵800Yen。 Total兩塊肉，同我上次感受一樣（請參閲第7章)。 拉麵上嘅紫菜印上歡迎字句，不過就有d驚食落肚。 麵條依舊好彈牙，而且好多葱花令到湯更香。本身豚骨湯底都已經好濃稠，味道似熬左好耐，而非香港味精拉麵。 而且湯底唔會過油，鹹度又適中，配合竹筍一齊，何其美妙。 總結7個字：肉好，湯濃，料實在！ 食完呢餐，我地就翻酒店。 返酒店途中當然要去Supermarket買下宵夜。 過埋今晚，預示我地即將離開日本啦！好唔捨得...... 不過點都估唔到一路以黎嘅順風順水，竟會係聽日先黎發生最預想不到狀況.......
