23/5 星期一 唉,話咁快關西之行已經要完結,真心好唔捨得啊! 不過唔緊要,因爲下一站東京! 因爲前一晚一早Pack好曬行李,所以一起身食埋早餐就即刻出門口啦! 唔知大家有無發覺我係大阪有個好出名嘅地方一直未去,亦未有提過提及過呢? 比d提示大家啦,呢個地方其實位于速浪區,係日本橋、難波個頭架。 無錯啦.....相信好多人都估到就係黑門市場~ 我刻意將黑門市場擺係最後一日,係因爲黑門市場好乾淨,就算拖住喼就唔怕污糟。 而另外,黑門市場位于日本橋,行完之後步行過難波搭車去機場都方便d。 頭先都講過,黑門市場好乾淨,地上污跡幾乎無乜。 同樣作爲街市,日本街市靚過香港個d幾多。 其實黑門市場本身係作爲日本一個賣海鮮或食品爲主嘅街市,只不過後來越來越多游客光臨,然後開始著重游客生意,所以發展爲景點。 結果多左好多食肆、企理左、多左藥妝店進駐。 老實講,去之前已經聽過好多朋友話失望。 我呢一日因爲買左一張地鐵同南海電鐵聯合出嘅優惠飛,一程任何地下鐵站搭去難波站+一程難波至機場空港急行列車(相反都得)都係1000Yen咋! 我個日本身如果松屋町去難波/日本橋都要180Yen,然後去機場個程920,加埋都1100Yen,所以又省左100Yen啦。 去到黑門大概11點,而我地去東京個程飛機係4點機,所以1點過d要離開黑門市場。 我先搭去難波,然後係難波行過去,其實都好快,10分鐘内都到左。 如果日本橋嘅朋友仲好,一出地鐵出口就見到。行入去就係啦。 不過我地又係衰,遲起身,搞到參觀呢度時間縮到短左。 我地周圍兜下圈,望下生果同刺身。 然後入左間食章魚燒嘅鋪頭,order左六粒兩個人share。 日本章魚燒普遍同香港有好大分別。 首先係外層,香港章魚燒會燒得實d,而大阪嘅就好比較軟身淋d。而且爲左節省成本,香港個d都係好厚皮,而日本個d好薄。 料方面,日本每粒章魚燒都有一大粒章魚,而香港個d我會稱之爲章魚沫。 醬料就一樣啦,無咩特別。 之後我地就理所當然行入黑門市場比較出名嘅黑門三平,求其攞起盒壽司就去比錢。 咁樣一盒壽司12件盛爲1800Yen(~HKD120)。 咬落去的確比較肥美,而且好嫩,尤其吞拿魚最好食,而三文魚則最後。 中間花枝壽司都唔錯,算爽。 整體其實真係幾好,唔怪得咁多人食。 不過講真,論新鮮都算新鮮,但未到你會嘩嘅地步。 你會滿足、點頭,但唔會驚訝。 其實黑門市場仲有好多吹出名野,例如豆漿、咖喱飯、神戶牛等,大家不妨試下。 但我對黑門市場嘅評價會係值得黎,但未有驚喜。 好多人話會逗留幾個鐘,但我個人認爲一個鐘左右就夠。 大概12點半我地就動身去難波求其行下個商場,無耐就去搭車。 去機場嘅方法同我由機場黎難波一樣,頭先都講左,所以唔再多講。 然後一上火車就瞓到落車。 ---------------------------------------------------------------------------------------------------------- 黎到呢度,就到我由大阪出發去東京啦。一下環節將會同大家講下由關西/大阪去東京可以有咩方法啦。 1. JR新幹綫。新幹綫算係比較普遍做法,因爲可以由大阪/京都/神戶直接坐到去東京/上野。大阪朋友會係新大阪上車,一直坐到東京站/上野站。價錢方面就係13620Yen(自由席),兩個半鐘就到。優點係市區上車市區落車,缺點係貴。 2. 巴士。價錢就3500-5000Yen不等,視乎日子而定。時間方面大概8-9小時,好多人會選擇夜晚搭,慳翻日住宿,係車度瞓埋過夜。不過舒適程度就......優點平,缺點坐到Patpat都痛。 3. 飛機。呢個係我最後選擇嘅方法。大家都知飛機海鮮價,而我就比較好彩遇到平機票。我睇左日本國内d航空公司同國際性廉航,最後見到Jetstar 連稅連乜咁都係4799Yen,就算加埋去關西機場+成田出市區大概2000Yen,都係7000Yen内,價錢上勝過新幹綫。而時間方面,就一個半鐘頭。計埋去機場、出市區,total大概4個鐘就夠曬(國内綫可以一個鐘前checkin就得),時間都勝於巴士。 而我今次因爲都唔想浪費全日,所以選擇飛機。因爲我唔認爲個半鐘值6 7000Yen。 ---------------------------------------------------------------------------------------------------------- 因爲廉航關係,停泊係T3(多數比廉航用)。然後一直跟住指示行就到T2準備搭車。 同樣地我地並無選擇JR,因爲有另外一樣更適合我地慳錢人士嘅列車。 京成電鐵嘅其中一款Access特急。 呢款車由機場去到日暮里/上野都係1240Yen,官網自稱50分鐘,但實際上我搭左成個鐘。而另外Skyliner快15分鐘,座位係高級野,但就要2470Yen。 而更平嘅京成本綫就1030,不過慢成20分鐘左右。 我回程搭京成本綫,感覺時間好慢長。 橙色就係我要搭嘅Access特急。 基本上車設計同平常列車一樣,無特別。 由於我住個度位于臨近池袋嘅板橋,所以我去到日暮里個陣就轉成JR去帶池袋轉另一條綫去板橋。 而東京JR絕對複雜,所以我第一章教嘅App乘換案内絕對用得上。 池袋好逼,上車個陣發現原來平時放工時間金鐘、九龍塘、太子d人其實都好斯文。 係日本,放工時間d人會完全推入去車廂,我明白咩叫逼到好似沙町魚,幾想大大聲爆粗! 幾經辛苦先去到板橋,而我地住嘅地方就係JR站隔離嘅APA板橋酒店。 其實APA係日本連鎖酒店公司,係日本各處都有酒店。 本來我地想揀鄰近新宿、涉谷個頭,但實在太貴。 而Airbnb都唔平,而且好多高評價嘅都比人book左(我兩個月前訂)。 而APA板橋酒店都係好辛苦先book到最優惠價,唔包早餐其實都要成HKD638.... 真心都唔係平。不過見都算係市區,而且交通好方便,附近又有supermarket。 下圖係我地間房,真心唔大,擺曬行李之後,可以行嘅位少之又少。 不過算啦,住左8晚民宿住下酒店都好,唔同體驗。 安頓好都已經8點幾9點,由於日本夜晚可以行嘅野少之又少,而且我都唔係愛蒲之人,所以打算出去食個晚餐就返黎休息。 我呢個愛麵之人,今晚第一餐就當然選擇左東京數一數二嘅無敵家! 無敵家全日本得一間分店,位于池袋。 距離JR站都只係5分鐘内,好近,係正松屋隔離。 話明出名,係日本幾乎所有出名食肆都要排隊,無敵家當然走唔甩。 我地去到個陣已經排曬長龍,超過8成都係遊客。 但我地慕名而來當然要排,而結果足足排左1個鐘有多先入到。 我揀左碗辣つけ麺(沾麵)1000Yen,我要左暖麵而非凍嘅麵。 成份黎到,見到麵好多,而且湯都濃郁,而三塊肉仲要超厚! 另外本身有一個完整半熟蛋,然後再用無敵家官網嘅coupon另外送多半隻半熟蛋。 由於沾麵嘅湯底都係比較重口味,所以都唔敢直接試,唯有夾起幾條麵條蘸落湯度一齊食。發覺看似好油,但原來係屬於肉嘅油脂,好香。 而且湯入面有蒜粒、肉粒、蔥花同海帶,令到湯更加突出。 雖然寫住話係辣,但其實完全唔辣,係好多香港人都可以接受到嘅程度。 整體黎講確實出衆! 而且我特別中意無敵家嘅太麵,即係粗嘅,特別有咬勁,浸落湯度更容易沾上湯汁。 去到最後加埋店方提供嘅拉麵湯汁,整成一碗濃湯,輕鬆飲落肚!Oishi~ 唉 真係好多肉,返香港要減肥(點知返到香港繼續放任自己.....) 食完之後再行下附近藥妝店同驚安之殿堂,發覺東京物價的確普遍貴過大阪。 好彩好多日常用品都係大阪買左。 行左一陣就完成左今日行程。 因爲食得好飽,所以決定由池袋行番酒店。 如果行小路,其實都係20分鐘多d。 但因爲太夜又人生路不熟,所以決定行大路,結果用左半個鐘左右。 途中見到Lawson 100Yen店,結果入去買左d野飲同杯麵做宵夜同聼朝早餐。 所以就無去到酒店附近個間好大Supermarket Maruetsu。