22/5 星期六 大阪購物行 因爲前排都係觀光行,一直都無咩時間買野。 臨近最後一日,點都要買野啦!而事實證明,一日買野完全唔夠 今日我首先要去嘅地方係一個鶴見outlet。 鶴見outlet係屬於三井不動產公司旗下一個outlet,規模比起其他outlet要細,店鋪數目都只有53間,少過好多大規模outlet足足一半有多。 不過呢度仍然吸引左好多人黎!原因有3個: 1)位于大阪市内,地下鐵直達 2)不少運動店駐扎在此,Nike/Adidas/Puma/Under Armour/etc...... 3)價錢十分親民 由於呢度運動牌子好多,被稱爲運動outlet。 所以好多想買運動野嘅朋友都會前往呢度買,而非Rinku Outlet。 呢個旅程我去左兩個outlet,一個係大阪鶴見outlet,而另外一個係位于關東成田附近嘅酒酒井outlet。 大阪鶴見outlet規模細好多,但運動牌子售賣嘅貨品平好多。 不過呢層當然要得益於鶴見outlet多數售賣嘅貨都比較舊款,而酒酒井outlet都偏新款。 不過酒酒井outlet嘅詳情就交番比東京之行篇講啦。 而有人問我,點解唔去Rinku outlet啊,臨近機場仲方便啦。 其實主要因爲Rinku outlet店鋪同東京酒酒井outlet好多重疊,而且酒酒井outlet仲多d品牌適合我。所以就無謂重復去outlet啦。 再者,兩個禮拜前先有朋友去過鶴見outlet同Rinku outlet,話番比我知鶴見outlet價錢平dd,而rinku outlet選擇多d。 我就當然價錢爲主,同埋費時重復去,所以就決定鶴見outlet! 去鶴見outlet需要搭地鐵去到門真南站,由2/3號出口出,再步行5分鐘就到。 我list下d比較受我地年輕人歡迎嘅品牌啦。Nike/Adidas/Puma/Levis/Timberland/Quicksilver/Under Armour/Beans/Seiko。 其實呢個場都有G-shock鋪,但價錢唔算抵,可以唔洗係度買,東京之行教大家平買C-shock! 今日行程我又買左一張pass,不過其實係地下鐵一日Pass 600Yen(假日版),如果係平日版就要800Yen啦。 用呢張pass可以一日内任搭地下鐵,對於今日打算去門真南,再去心齋橋,然後殺去梅田,最後再番松屋町嘅我地真心抵到爛! 話咁快只係20分鐘多d就由松屋町去到門真南,一出地鐵站基本上就會見到Outlet。 入到去其實好似一個商場,鋪頭相連住,個人感覺幾好行,其實由A鋪去B鋪唔洗行5分鐘啦。 其實以前有Muji,人流仲多。不過2015年初就關門大吉,可惜可惜.... d野真心好平,唔買就真係可惜!不過我亦到做左個錯誤決定.... 相信大家都知運動牌子棉褲係香港其實賣好貴,而我係鶴見outlet呢度只不過用左1900Yen(HKD135)就買到!應該要買多d,唉! 而呢件Nike外套,我都只不過用左2900Yen(HKD200)就入左手,fit曬我。 你話係咪超級平呢! 買呢件外套個陣,考慮左好耐。因爲Nike鋪買滿5400Yen就額外再有8折,但我呢件外套只係2900Yen,唔夠5400Yen,所以苦惱左好耐買唔買多條長棉褲。 係我苦惱緊買咩嘅時候,有一位香港後生仔黎問我介唔介意一齊搭單,因爲佢都唔夠5400。 就咁我地就成功搭單,而且亦令到我留下遺憾(東京之行最後一章話比大家聽)。 不過大家留意,Nike不設退稅,無論你買幾多萬,都無得退稅。 而另外因爲成日都做運動,所以都買左件運動衫,打排球之用。 Taobao次貨連運費都要7 80蚊啦,我呢度都係1500Yen,兌返都係100蚊港紙。而我個fd就係Asics買左對跑鞋,又係平到嘔。 睇下,好popular嘅Timberland高筒boot都只係13300/11900Yen。 不過呢,如果你問我,rinku、鶴見二選其一會去邊個好d? 就要視乎你旅程會係點。 如果你好似我咁由大阪玩到東京,就絕對係鶴見,然後搭多個關東outlet。 但相反,如果你單純關西之行又想慳時間,其實可能rinku會更適合。 因爲rinku係比較全面,各類牌子都有,選擇多好多。 而鶴見就真係偏運動居多,可能年輕人會適合,但女士們、太太們就No La。 呢個地方你地預3-4個鐘左右就可以行完,因爲確實規模唔大,而且店鋪好集中。 所以我地由11點行到2點半左右就走,不過走嘅原因係因爲我地要趕住住食蟹道樂! 否則我呢個Sporty肥仔仲可以係呢度繼續血拼!!!! 因爲book左3點蟹道樂本店(本店真係號Full,其他店就稍微好d)。 話明平遊日本,要平遊就當然食Lunch啦!我地叫左個萌黄餐(3888Yen) 首先係水煮螃蟹。 叫得水煮,當然係食熟蟹本身蟹甜味。 上呢個水煮螃蟹時,會附上一碗醋,比你點蟹。 我分別試過點醋食同唔點,發現唔點醋食其實無咩甜味,呢點令我有d失望。 我認爲如果蟹係靚,應該要食得出本身鮮甜味,呢個有但好弱。 反而點醋食個甜味又出左黎,好特別。可能係刻意用極端味道帶出本身甜味 之後就係螃蟹刺身。 生蟹其實我第一次食,因爲真係好怕唔新鮮。 呢個擺落口,ok,有甜味,而且好嫩滑,可以點Wasabi又得。 我就純粹點少少殺菌。 不過唯獨有一舊有少少血水....我惟有當係新鮮啦,就ignore左個舊。呢點要改進! 螃蟹茶碗蒸。 呢味係我最愛,蛋好嫩滑,配合買蟹肉一齊,不單有蛋味又有蟹甜味。 整個配搭就好Match 螃蟹天婦羅。 其實得三舊,粟米芯、秋葵同蟹棒。 因爲我個人唔中意秋葵,所以點都會有偏見。 而粟米芯、蟹棒炸出黎,都只不過係普通貨色,無咩特別。 食完會諗:下一道幾時上? 之後就開始主食來臨,首先係焗蟹肉通心粉。 呢個都係我真心推薦,因爲Cheese味超濃郁,每一啖都配合蟹肉同Cheese一齊入口,嘩..... 然後係蟹肉釜飯。 提供兩種食法,一種係就咁擺落碗食,另一種就係整成茶漬飯。 我就當然兩樣都試啦。 就咁擺落碗食其實都已經好正,因爲本身蟹肉都甜,飯底應該擺左少少味增醬,因爲"不"飯個陣,講底個d飯有顔色,而且唔係飯焦個仲,係有明顯咸同味增味。 而另一種整成茶漬飯,就係淋上店家比嘅清湯上飯度,再擺埋漬物上去,好似我地中國人湯飯咁,感覺都好清新,相信主要係清湯發揮功效。 而味增湯就係用紅味增整成,不過好咸,好扣分。 而最後甜點部分就係雲尼拿雪糕。 雪糕同碗相信一開始已經雪到好凍,因爲店員會即場沖綠茶淋上雪糕,但雪糕無溶,碗都係仍然凍,可想言之本身個碗同雪糕有幾凍。 不過綠茶太苦,就算配合雪糕,甜味依舊無辦法mix埋苦澀味,比苦澀味搶曬風頭。 每一樣其實分量都唔多,加埋一齊勉強都夠飽。 其實你問我呢個lunch set值唔值3880Yen,我會覺得當中名氣同進食環境都包含其中,不過我都好理解。 正如平時買t-shirt,件衫多左隻鷹、鳥、羚羊、tick等都比起純色tee貴100蚊啦。 呢一餐食左一個鐘頭多d,所以我地都事不宜遲,趕過去梅田行街。 之前都講過日本商店好早閂門,基本上9點就閂,所以食到4點幾嘅我地趕到死.... 真係可以拍番套真人show "購物奇兵" 因爲我想買鞋,所以先去左ABC mart。 梅田total有3間ABC mart,每個特色都唔同。 位于Hep Five隔離果個款色最潮,而其他兩間就比較平民d。 我地三間都行曬,最後係Yodobashi Camera Multimedia Umeda入面嘅ABC mart買左一對adidas新款鞋(香港都未有呢隻色),而我朋友都買左對birkenstock涼鞋。 但因爲行鞋店已經浪費左我地好多時間,個陣已經成7點幾。 因爲之前係心齋橋都已經買左少少GU同uniqlo,所以我地係梅田都費時行,直接殺去Lucua 1100呢個比較高級shopping mall購物。 其實去之前我已經有心水要行邊幾間,皆因我都只不過係年輕人,都係想買d休閒服飾爲主。 而係Lucua 1100裏面有兩個平價休閒服飾品牌我好中意,一個係old navy,另一個係forever 21。 Old Navy其實係Gap子品牌,價錢稍比Gap平,但質料一樣,一樣地麻麻。 但因爲Old Navy d衫 design偏類似AE個仲show牌子之餘,都有其他圖案。 呢一日申請做會員即場有9折,而且費用全免。 精明Charles當然即刻申請,結果輕鬆9折到手。戰利品就唔影啦,無咩值得好影。 而我同朋友係Forever 21都買左d衫同褲都好平。 而且我係道頓掘睇中嘅無我碼棉褲,呢度都有,好開心! 而且我都去左GRAND FRONT OSAKA呢個上一篇讚高級嘅商場,果然好高級。 我地4個半鐘行左成個梅田購物區,你都知我有幾趕呢!!! 所以最後我就一袋二袋番屋企Pack行李,準備下一日離開大阪前往東京!!!!!!!