21/5 星期五 大阪周遊卷之行第二日 相信睇左上一篇嘅朋友都知道我第一日已經回左本身大阪周遊卷嘅本！ 不過作爲精明嘅香港人，當然要繼續用盡呢張神一樣的傑作啦！ 不過呢一日我地刻意放慢腳步，因爲連日黎嘅行程真係令到我地都身心疲倦。 所以呢一日全日都係以行行企企爲主。 好多人都知女性好中意着和服，因爲好靚。 而我地男仔其實都係好想試，但係同女仔比較，男裝實在十分普通、款式少、顔色唔艷麗等等。 所以多數都係女士試和服，而男生就費事洗d無謂錢啦。 不過其實大阪有個地方可以比你粗着30分鐘和服架！ 男仔要留意啦，都係200Yen咋！不過話明粗着就當然比較hea，得個神髓啦。 我講緊咩地方？就係大阪今昔館(600Yen)啦！ 大阪今昔館其實有d類似歷史博物館咁，將舊時大阪街道情況實體呈現出黎。 呢個館10點就開門，而且試和服要排隊攞籌。 我上網見d blog話要早d黎排隊，結果係我10點半黎到，籌已經排到1點。所以你地明白點解要早d排隊啦.......點擊圖片放大 大阪今昔館主要係睇呢d啦，影下相咁。 其實大部分人主要黎嘅目的都係想試下和服，而我都當然唔例外。 所以最後我係失望而回！ 因爲今昔館唔算大，所以好快就行曬。 之後我地就搭地鐵去到東梅田，然後步行去下一個景點--梅田藍天大廈 空中庭院展望台(800Yen)。 由東梅田一直行到梅田站再行到去Grant Front Osaka呢個甚爲高級嘅商場地面有個水池，對面就會有條隧道。 一穿過隧道，就會見到藍天大廈。 個水池就係咁嘅...... 去到藍天大廈會有好清晰指示牌指引你上去展望台information centre。 呢個就係藍天大廈外觀啦。 搭升降機上到35樓，然後轉左手邊，有一條奪命電梯等緊你！ 因爲小弟真係畏高，所以我猶豫左5分鐘先決定上去。 我一路搭上去，雙手一直捉到個扶手實一實，因爲條電梯係凌空設計！！！！！！ 個幾十秒好似過左幾十年咁，好難挨，好想唱翻首煎熬...... 上到39樓就係入口兼手信售賣店。 不過d手信行到爆，d野同出面百貨公司一樣。| 所以一樣都係直接比大阪周遊卷d服務員姐姐嘟一嘟就上得去。 我地一下子就上到最頂.....OMG 嚇到我爭d賴尿囉！！！ 今次真心堅離地，感覺好危險，而且真係好高，望到好遠嘅位置，連天守閣都望到！ 我個fd不斷行黎行去影相，而我就步步爲營，一步一驚心..... 好唔容易行左一個圈，我即刻去翻有瓦遮頭嘅地方，安全感即刻翻曬黎！點擊圖片放大 +2 其實撇除太高令我恐懼之外，呢個地方真心一定要去。 我上網見好多post都係夜晚先去，睇盡大阪一切燈火。 不過各有個好，日頭去睇野清楚好多，整個環境更深刻印在腦中。 逗留左半個鐘頭，吹下風，然後就再次經歷多次地獄級電梯落翻35樓，轉電梯去翻地面。之後就去左一個大家意想不到嘅地方--位于肥後橋站附近嘅大阪市立科學館(400Yen)。 從肥後橋站行過去大概需要10分鐘内。 點解我會去呢個地方？明明香港都有科學館啦。 咁因爲小弟就懶係學術性，想參觀下d有趣野，而我朋友又係science熱愛者，所以都去下。點知去完覺得又真係幾有趣、好玩！ 大阪市立科學館展出最多係有關磁力原理，好多游戲、影片都係圍繞磁力。 而另外Gravity引力都有好多游戲，見好多小朋友都玩得樂而忘返。 而我地都足足係度用上左一個鐘頭！ 不過，講句公道説話，都係香港科學館好玩好多xd。 行翻去地鐵站，我地再繼續搭地鐵去之後嘅景點。 我地係本町轉車去到大阪港，講到呢度相信有做過資料搜集嘅朋友都知我準備去邊！ 我準備去嘅地方就係另一個著名分手魔咒摩天輪，亦係琴日提過嘅天保山摩天輪(800Yen)！ 高達112.5m嘅天保山摩天輪係世界上最大嘅摩天輪(已經被打破左)，不過聽聞好快要比另外一個同樣位于日本大阪而即將落成嘅摩天輪取代其位置。 我琴日挑戰左一次摩天輪，我覺得自己個膽都好似大左！ 因爲下午嘅關係，所以都無咩人坐，好快就直接上到去。 而且因爲都成5點，開始準備日落，成件事都變得好美好。點擊圖片放大 跟住之後，我地做左一樣好白癡嘅野，我地利用張卷搭左一次船。 隻船(Captain Line)係由海洋館對出碼頭開去USJ，同樣地係大阪周遊卷包來回(1300Yen)。我地搭5點鐘船去USJ，大概15分鐘就到達。 咁夜先去USJ？No La，純粹黎打下卡姐。 其實本身Plan去大阪都好想去USJ，但發現因爲行程太Full，塞唔入USJ，所以都擱置左。不過I don't care，因爲我都去過好多地方嘅主題樂園。 去到影左幾幅相，兜左個圈我地就搭JR出翻最近嘅地下鐵站。 我地無用到回程船票係因爲下一班船係6點半，而當時仲只不過5點45分，所以就索性搭JR算。 不過留意翻6點半係最後一班船啊..... 我地搭到去弁天町，然後轉乘地下鐵，前往一個好少人會去到嘅地方--住之江公園。 去個度嘅原因，係因爲上一篇其實都提及過大阪周遊卷包左兩個溫泉，一個就之前提及過，另一個就係位于住之江公園，叫做SPA住之江(650Yen)。 不過呢個就唔提咁多，因爲十分普通，以爲自己去左企理澡堂。 總言之，如果兩選其一就一定係我上一篇介紹過位于天神橋筋六丁目嘅速浪之湯啦，個度無論乾淨程度、位置、新淨程度都好過住之江公園呢個，而且呢度好多老伯伯...... 不過上一篇好似無講，提提大家，只要係大衆湯/溫泉，身上面有紋身都唔可以進入。(不過好似修立左話無問題) 浸完溫泉其實都已經成7點。 因爲實在太肚餓，所以就係附近Family Mart買左d麵包、飯糰、關東煮開餐，輕微醫治下個肚，先再翻心齋橋行街。 (題外話，其實日本便利店好多野食都好好食！) 點知一番到心齋橋，我又餓起上黎。不過可能真係呢排太chur，所以攰到無曬胃口。呢個情況下，唯有求其入一家家庭餐廳(薩利亞d fd)。 不過因爲又餓又攰，所以無影到相，而且食不知味 食完就求其走入uniqlo、GU、呢d行左個圈，終于頂唔順要翻去休息。鐵人終于倒下。 ----------------------------------------------------------------------------------------------------------有d會疑惑，點解要浸兩次呢d Cheap Cheap溫泉、玩兩次摩天輪、去咁多觀景台做咩。 其實唔同觀景台睇到嘅事物都好唔同。 係梅田見到嘅係好多高樓大廈，而且居高臨下飽覽遠處風景，望到嘅係大阪的繁榮 而係通天閣望到嘅，係屬於通天閣自己嘅歷史、同四周嘅樸素環境 而摩天輪係因爲香港可以乘搭摩天輪機會並不多，而且要同人地share同一卡，咩意義都無曬。 反而係日本，我夜晚搭一次的，日頭搭一次，所睇風景絕然不同，感受到的亦異于彼此。 而cheap cheap溫泉反正送嘅，不用白不用！ 而且我都無時間去和歌山呢d比較遠嘅地方浸sosad ---------------------------------------------------------------------------------------------------------- 今日行程： 大阪今昔館600Yen + 展望台800Yen + 科學館400Yen + 摩天輪800Yen + 船750Yen(因只乘搭單程，所以計一半) + 溫泉650Yen = 4000Yen 再加埋琴日3100Yen........total係7100Yen！！！而張pass係3000Yen 換言之，我賺左4100Yen，而且未計d交通費wo！ 所以結論係大阪周遊卷一定要買！！ 我建議 1) 大阪今昔館 2)兩個摩天輪 3) 藍天大廈空中庭園展望台 4) 速浪之湯 5) 心齋橋道頓堀觀光船 6)天守閣 7)通天閣 其他就自由選擇啦！ ---------------------------------------------------------------------------------------------------------- 下章就係我超級趕頭趕命嘅shopping之日啦！
