前兩章都講到住嘅地方係美國村啦(想知道住嘅地方係點就睇返第一章啦)。 而係美國村/難波可以點出發去京都呢？ 其實都有好多方法嘅。 1. JR列車。 先前往大阪/新大阪站，轉成前往京都站嘅列車，記得有快速就搭快速，因爲唔洗站站停，住梅田者基本上都會選擇呢個。(大阪站-京都站 560Yen/33mins) 2. 阪急電鐵。 阪急電鐵都算係好popular由梅田前往京都嘅鐵路選擇。 一張一日pass僅僅要比700Yen，兩日pass都只不過1200Yen，十分划算。 而且呢個pass最吸引人嘅地方係可以直接前往嵐山及河源町，對於春秋冬季有興趣去嵐山嘅朋友無疑係好實用。 3. 近鐵列車。 好多人以爲近鐵係for去奈良，其實近鐵覆蓋率都好大，基本上去奈良、名古屋都可以坐近鐵。 雖然可以係難波坐去京都，但相信都唔會有人咁做，因爲真係慢到離曬譜…… 所以我都不作多介紹啦，想慢遊鐵路者就自己揾資料啦。 4.新幹綫。 有錢人/鐵路愛好者應該點都會試。 不過都要係新大阪站上車。 如果閑日搭就選擇自由席啦，1440Yen/15mins，一定有位。 的確好快，而且坐得好舒服。 我自己都搭坐一次，不過我當然純粹鐵路愛好者，而唔係有錢人 5.京阪電鐵。 呢個方法相信唔多人知道，要多做資料搜集先會發現。 講真，我一開始都無發現，但突然映入眼簾，我眼都發光。 首先係價錢，600Yen/1Day; 1000Yen/2Day 任搭，一個字抵。 其次係沿途落車站，會途徑清水五條(步行清水寺10分鐘)，衹園四條(步行八坂神社5分鐘)，伏見稻荷站，神宮丸太町(步行京都御苑10分鐘)。 雖然都要行，但我個人認爲10分鐘步行距離其實可以接受。 總站有兩個–淀屋橋、中之島。從心齋橋前往淀屋橋只需要兩個站。 不過平係有代價，付出嘅就係時間。從淀屋橋去祇園四條要48分鐘，比起搭阪急電鐵由梅田去河源町慢大概五分鐘 而且急行列車班次唔算密，所以一定要教好時間出發。 而希望能省則省嘅我，當然今次就選擇左呢個方法。 ———————————————————————————————————- 18/5 星期三 京都古廟之旅 因爲住airbnb，有曬爐具，所以呢一日早餐就係屋企玩煮飯仔。 而煮嘅野食就係購至日本比較出名嘅平價超級市場-玉出。 呢個超級市場真係好平，單個裝烏冬、拉麵都係19Yen！我買個陣都爭d以爲自己睇錯lol。而且飲品都有好多種選擇，2L綠茶/玄米茶都係140Yen左右(不過後尾發現Lawson 100Yen店仲平) 而且玉出有好多日本本土食物，都好適合做手信。 食完早餐，我地就出發去新大阪，呢個我地四日裏面都未去過嘅地方。 下，搭京阪電鐵唔係要去淀屋橋咩，點解去左新大阪架？？？？點解嘅？點解嘅？ 因爲我地去程決定試下搭新幹綫，作爲鐵路迷點都想搭一次。 一早教好時間，去到買埋飛就岩岩好上車。 新幹綫真係好快，快速JR要用半個鐘，而新幹綫 只係要15分鐘就到，而且好定，座位都好舒服。 本來我地呢一日行程打算去最新起嘅鐵路博物館–>錦市場–>金閣寺–>二條城–>返回大阪。 但點知搭新幹綫途中發現鐵路博物館星期三閉館，不過心慌慌唔係老港孩嘅習慣，即刻調整行程，錦市場–>金閣寺–>京都御苑–>京都站行街。 本身想去埋二條城，但行完金閣寺之後腳已經好痛，可能呢幾日行得太多，所以直接去京都站行下有冷氣嘅地方，有d可惜無去到。 一到步首先去買京都巴士一日卷，500Yen，評價爲超級無敵好用。 好多地方好似鐵路博物館、金閣寺、銀閣寺、京都御苑、京都大學呢d無鐵路直達，要靠巴士。 而京都巴士9成路綫都係劃一230Yen一程，所以搭夠三程巴士已經回水。 而我回嘅水，夠我買多張卷啦。 呢張卷係京都站巴士總站、地鐵站、甚至向巴士司機都可以買。 不過穩陣起見都係地鐵站買埋啦。 因爲係地鐵站counter買，會送一份路綫圖比你，標明A去B要搭咩綫咩站落，好清楚。 因爲我實在太大食嘅關係，所以去到京都個陣已經好餓。 所以事不宜遲立即出發前往錦市場揾食。 去到錦市場，老實講，吸引力並非如此大。 好多小食其實重複又重複，而且乾净程度無大阪黑門市場咁好。 所以我行左個圈就決定去揾京都好嘅拉麵店！ 我同友人上網揾左個十大京都拉麵，其中一間係錦市場附近，係正四條烏丸個度，叫做"加藤屋"。 加藤屋位于小巷裏面，少d眼力都揾唔到。我都揾左兩個字先見到。 其實整體感覺都好有feel，令我期望度大增。 加藤屋我去個陣唔覺有中文menu，但餐牌都有圖片，所以都選擇得好輕鬆。 我揀左碗叫裏面有味增同太麵兩個字嘅麵，無論麵咩size都係一樣價錢，都估到我幾開心啦。 我叫左個大盛，係第二分量大嘅。 拉麵係太麵，即係粗麵，煮完之後都有d咬口，係我杯茶。 上面鋪滿芽菜，建議留到最後食，吸下d油份同湯底味道。 煮之前會問定你要唔要多d芽菜，你搭"more""no"就得。 其實都比左好多肉，肉都有分兩種，一種係肉粒，另一種係肉塊，味道都一樣。 肉塊相對入味d，但肉粒就可以撈埋麵條一齊食。 好啦，輪到要講一碗拉麵最重要嘅湯底啦。 呢碗拉麵湯底相當特別。首先講明湯底係用大骨同鰹魚熬成，飲落去都好清楚飲到呢兩種味。而且因爲我個碗有味增，所以多左一股鹹味。同我呢個旅程所嘗試到嘅拉麵完全有好大分別。 而且特別係，呢個湯底有好多油，就算撈混個湯同d麵都係充滿油份，所以飲落去其實感覺唔太好，不過撈埋d麵就還可以。 而另外，我試到我個碗湯底有小小燶味，不過好輕微。 我試過我朋友個款湯底，同我叫嘅一樣，不過就無燶味，但就一樣咁油。 所以可能我個碗煮湯個陣稍稍失手。價錢平，撇除得我先有嘅燶味，其他方面都ok，而且食客其實源源不絕。 食飽之後就出發去金閣寺，係拉麵店行一分鐘就已經見到巴士站。 因爲金閣寺都係半上山，所以都要成25分鐘左右。 不過傾下睇下都好快到嘅。一去到又見到好多好多學生…究竟d學生洗唔洗返學架@@ 我地急急腳買飛400Yen，張飛設計得好似一道符，都幾特別。 入到去金閣寺，人山人海，水瀉不通。 尤其以普通話居多，反而後生香港人就好少，可能對呢d古老野無興趣挂。 去金閣寺一定要影翻張金閣寺相啦！ 打下卡都要啦。金色外層，顯得格外高貴，而且係陽光照耀下，更顯得閃閃生輝。 如果我係龍友，一定狂影相。 而我係金閣寺都投下左100Yen同一個5Yen為自己祈個福。 點解係100Yen？因爲個度寫明要樁香，就自覺地投下100Yen。 作爲一個有修養嘅廢青當然照做啦。 而另外5Yen就係用黎向神明參拜。 因為日語中，5Yen發音同ご縁(go-en)很像，代表緣分、結緣。 參拜個陣手上面唔好攞住其他野，口訣為：「拜、投錢、拉鈴、拜拜拍拍拜」。 係賽錢箱前先向神明鞠躬，然後將錢放入賽錢箱，再搖動鈴鐺； 然後敬禮2次、拍手2次，拍完後雙手合十，向神明講出願望； 許完願後，再敬禮一次，就完成整個參拜流程。(附上小弟祈福圖) 金閣寺唔算大，一個鐘頭基本上已經可以行完。 不過入面有好多御守(我地平時會叫護身符)賣，大家都可以買返d比身邊人，祝福下大家。雖然好快就行曬，但作爲世界文化遺產點都應該去下。 參觀完金閣寺都差唔多3點，原來時間過得咁快…. 要提提大家，好似鐵路博物館、京都御苑呢d其實5點左右就已經Close，所以大家要早d起身。 之後我地事不宜遲立即前往京都御苑。搭巴士都係20分鐘左右就到達。 京都御苑其實好大，要圍繞行一個圈都好辛苦。 而且係石仔地，行得都好辛苦。 要參觀京都御苑要注意一樣野，要入去御苑首先要有準可證。 準可證可以係御苑隔離比較隱蔽嘅中心申請，不過因爲門票真係好有限，我地呢方面無做資料搜集，結果發現18 19號都全部full曬。 正當我地失望準備走個陣，有兩個外國人突然入黎話要退翻兩張飛，話另外兩個同伴唔舒服唔黎。 我就當然直接問個鬼佬可唔可以讓比我地啦，結果經過一番手續，最後都有得入去！！！ 不過入面嚴禁拍攝，我想偷偷地影下環境，但點知電話又無電….WT_！ 入面好靚，好多擺設，而且好自然，無比人一種好人工化嘅感覺。 居然免費，就當然值得一去！所以大家記住要早一日黎攞定飛先。 唉 我都知自己好肥！又樣衰，所以唔比大家睇。點擊圖片放大 唔知個兩粒咩黎呢…. 我地係同志社大學個邊出翻黎，因爲都行左好耐… 所以都想休息下。所以又去左松屋食少少野，飲翻一大壺冰水先！ 講真，其實日本d連鎖店真係好多選擇，點都唔厭。 雖然味道唔講得上話絕妙，但勝在抵食夾大件，味道又ok。 不過抖左一陣隻腳都仲係痛到飛起，所以取消左原本打算去嘅二條城，改爲行街買手信。 用巴士返返去京都站，係有冷氣嘅地方果然舒服好多。 行下supermarket，又行下手信店，買下綠茶野。 其實本身都有打算落去宇治食抹茶野，不過同樣因爲太想休息最後擱置，希望下次有機會再去！ 題外話，張京阪電鐵pass係可以去埋宇治，衹要係中書島轉另一條綫就得！ 行完京都站d商場之後順便影左幅京都塔就走佬啦 我地搭巴士去到最近嘅京阪電鐵站-七條站，然後好似平時搭開觀塘綫嘅大家係旺角上車搭去油麻地咁，搭去總站坐煩特急列車返出去大阪。 我地係本町落車，因爲要前往我地晚飯地點-宇奈。 呢個唔係地方名，而係餐廳名。 宇奈其實係一家連鎖居酒屋，夜晚好多人飲杯酒，吹下水，食下燒物。 不過其實宇奈最出名係鰻魚飯！ 因爲價錢平民，質素高檔。最平嘅鰻魚飯一碗都衹不過500Yen，有一塊鰻魚。 不過都因爲係晚飯，我都好肚餓，所以叫左個800Yen+100Yen多飯，上面有三分一條鰻魚。 鰻魚汁好香，而且好多，夠曬送飯。整體感覺食緊1800Yen，而非800Yen。 食完大概都9點幾，因爲真係要休息，你見我講左幾次腳痛就知啦…. 所以就直接翻屋企。 不過返屋企之前當然要去玉出買d宵夜先啦~有便當、炒麵、壽司呢d揀，杯面都一大堆任你選擇。 而我最後就買左包烏冬同一包即食咖喱返去整撈烏冬..正 而友人就話要試下日本d公仔麵。 然後我地都買左d雪糕當甜品，又補充翻d野飲，就完成今日行程 而呢一晚都成爲第一間屋最後一晚。 ———————————————————————————————————- 不經不覺原來呢篇寫左成3千6百幾字，希望繼續有動力寫啦！ 如果大家有咩疑問都可以係下面問我，我好樂意解答你！ 如果想支持下我，都可以係下面留個Support比我啦^^ 或者支持下我其他Post都得
