係第一章都講到我呢四日會住嘅地方會係美國村,即係靠近難波站。 所以我選擇第二、三日先遠離大阪市,配合我買嘅Pass首先前往神戶! BTW,記得係睇嘅同時支持下老港孩啦。 得閑就留個言比我,等我都有多把勁打字啦。 因爲今篇都打左接近三千字啦,相信之後都會係.... --------------------------------------------------------------------------------------------- 16/5 星期一 神戶之旅 呢一日天公不做美,出發前已經見到個天陰陰地,都心知不妙。但都無辦法啦!香港人怕d乜! 不過因爲遲左起身,所以索性放棄Breakfast,直接黎Heavy brunch。 見到附近有間金龍拉麵,而且得立食(無得座),反正金龍拉麵都算出名,見幾有風味就試下。 但其實小弟好耐之前已經聽聞過金龍係一間充滿極端評價嘅拉麵店 泡菜係我自己落嘅,而個度泡菜、辣韭菜都係任落。 不過強烈不建議落泡菜,因爲個酸味有d破壞湯底本身的咸濃味。 本人作爲食家(不過係廢個種)當然第一口就試下湯底 湯底係用大骨熬成嘅湯,十分之濃,甚至可以話太濃..... 不過因爲小弟重口味,所以都可以接受。 不過應該會有唔少人好抗拒,因爲真心濃,不過就無一蘭咁油膩。 啊,唔記得左講我揀左係¥600個款 而同¥900差別在於後者d肉多到我數唔到,而前者就有6小塊,麵大小幾乎相等。 食完就出發去神戶啦! 有好多唔熟悉關西交通嘅朋友都以爲坐JR/新幹綫去神戶好方便。無錯,如果搭JR其實時間上都算快。不過如果由JR難波站上車去到神戶JR"三ノ宮"站,其實係要成¥710! 所以計數精嘅我當然唔會咁老襯啦! 我係Plan行程嘅時候一早發現有一張由阪神電車出嘅"Hanshin Tourist Pass" 呢張Pass其實不論住難波定梅田嘅朋友都好值得買。因爲呢張Pass係可以西代--難波/梅田呢段路綫内任搭!而且只需要¥500!!!!!元町、三宮、甲子園呢d比較著名地區都可以使用,岩曬大家 我由難波出發去到三宮大概係40分鐘左右。 不過記住,如果你係難波出發,就一定要搭快速急行列車先可以直達神戶三宮啊! 去到神戶三宮一落車,因爲一開始睇旅遊書見其實神戶玩嘅野其實唔多,所以都打算Hea行。 一到步我地先行左去Sogo兜下圈。 由最頂行落去,無咩特別,一般大型百貨公司啦。 不過當我去到最低個層--食品部,我眼都發曬光! 有熟食、生野、麵包、飲品、刺身、牛等好多野食賣啊。 而且有好多檔都有得試食。 我就當然事不宜遲走圍行啦。 行左一陣就見到大判燒。 中意食紅豆嘅我當然不能錯過。 你睇幾多紅豆!!都只係¥70咋.... 同香港某Foodcourt常駐賣大判燒個間簡直兩個級數。 行番出去路面個陣已經發現落好大雨,搞到咩mood都無曬.... 最後好辛苦去左個商店街行下 不過商店街都算好長,都花左我一段時間。 不過好可惜因爲落雨最後都無去到睇摩天輪、地震博物館呢d,希望下次有機會再去! 可能有d人好疑惑點解我無去北野異人館。 因爲老實講,要我比錢去睇d歐亞建築簡直浪費我金錢時間 香港赤柱、尖沙嘴一大堆呢d建築。 所以作爲香港人,我唔認爲有咩必要去(利申 此立場只屬我個人意見 並不等於北野異人館唔好!) 神戶之旅尾聲,我去左南京町食左三個肉包.... 都話我好大食架啦!都真係好juicy!曹家包子館 而返到難波,落雨情況更加可怕..... 別無他法,惟有係地下鐵站隔離嘅大阪之王將求其食啦。 呢度樓面4個Waiters,有3個都係内地留學生,所以叫野食好方便。 我叫左個上海回鍋肉餐(¥790),而我朋友就叫左碗普通拉麵加4隻煎餃(~¥700)。 整體味道還好啦,不過不失,唔太特別平。 我會寧願去松屋食碗牛肉飯囉.... ---------------------------------------------------------------------------------------------------------- 17/5 星期二 奈良與鹿 原來個天好中意我架!知我呢日會去奈良撚鹿,所以就即刻出太陽,hi天.... 有好多唔熟悉關西交通嘅朋友都以爲坐JR/新幹綫去奈良好方便(Sor我懶,直接C&P就算)。無錯,如果搭JR其實時間上都唔算好慢(¥560/45mins)。 不過如果你無買JR pass的話,我更建議你搭近鐵,同樣難波上車(¥560/36mins)。 不單只時間上少左,你去撚鹿、春日大社都行少兩步。無需要我多講大家睇地圖都明啦..... 一到步因爲都已經係中午,所以立即出發去搵志津香... .點知撞正個日休息...sad到爆。 唯有求其入左間係志津香隔離得日文名要上樓梯嘅日本餐廳。 裏面全部都係年輕女士擔任侍應、廚師,不過食物都有一定質素。 食物清一色以麵食爲主,設有湯麵同冷麵。 每個set都有兩個柿葉壽司、一個甜品、麵食同果汁。 麵點落d混合薑末、蔥同豉油,味道好match,同時都好清爽。 柿葉壽司上面個魚我從未食過,不過一早已經用鹽腌過,好咸香,無需要點豉油就可以食。(¥1450) 食飽飽之後就正式上路....撚鹿啦! 我同朋友先向東大寺方向行,沿途見到好多小學生... 佢地戴住帽好cute啊,我呢個怪叔叔都忍唔住偷拍左兩張。 沿途都有賣特色小食攤檔 (醬油燒丸子 100Yen) 好辛苦先行到入東大寺,買到飛.... 但老實講,我認爲宏偉就宏偉... 但比起京都個d神社吸引力其實低d。 如果想慳錢嘅朋友絕對可以係外圍睇就算。 不過當然呢座寺都有自己特色,係用啡色作爲外墻,更添古典味,而且都好大。 而其實之後都係同鹿親近下,周圍行下,無咩話值得要講嘅地方。 比多d相大家睇下啦。 不過現場所見真係好多鹿,所以大家唔洗驚睇唔到,一定多到你話"呢度都有咁多...."。 而且其實鹿並非單純集中係Google map上"奈良公園"呢四隻字果個area,基本上由黃色大馬路打後嘅綠色area都會有好多鹿。 點擊圖片放大 不過有幾點要注意 1.因爲奈良公園面積都好大,由近鐵行去東大寺再去春日大社然後折返近鐵需要時間都好多,腳骨力要有番一定程度。所以大家加油。驚安之殿堂有d散裝休足,可以買黎用下,咁就唔洗焗住要買18塊。 2.雖然摸鹿好興奮,但其實最後克制自己。因爲鹿被人摸得多,身上獨有嘅氣味就會慢慢消失,影響鹿自己日常生活。 3.鹿餅隨處可買,價錢一樣無需格價。不過小心一大堆鹿湧埋你面前搶你d鹿餅。 4.鹿餅要比就比,唔好調戯d鹿,因爲畢竟半野生有兇性。 好多地方都有賣雪糕,我就要左白桃雪糕(¥300)。 奶味比較重,我個人比較喜愛水果味重d。 而我朋友叫左綠茶雪糕,反而綠茶味都濃。 而另外奈良比較出名就係圖二嘅小食--杵草餅。 我就當然去左最出名嘅中谷堂買啦,一舊就¥130。 外層係用佐賀糯米同愛媛縣蓬草新芽(青汁常用粉末) 杵成 嘅餅皮,然後入面就係包紅豆,再裹上一層黃豆粉。 味道上其實都幾特別。因爲一開始以爲係綠茶餅皮,但咬多兩啖又唔似。 可能女士會中意多d,我見好多買嘅男士都無乜表情,但而女士就多d話好味。 不過紅豆真係多,呢樣要讚。 我自己對呢個餅皮無乜喜悅之情,純粹紅豆蓉做得幾好,無加好多糖漿。 其實¥130一舊,試下無妨,反正味道因口味而異。 夜晚-神座拉麵 奈良大景點並唔多,所以我刻意留左夜晚番去心齋橋行下。 同樣地利用近鐵返回難波,然後前往道頓堀 久仰大名嘅神座拉麵。 旅遊書上面話總店最多人朝聖,但去到反而比較隱蔽嘅總店人更少。 我地就當然一支箭咁走入去賣飛然後坐好! 首先講湯底,用豬骨熬成,但並無熬到乳白色,反而混合醬油,做成豬骨醬油湯底。 另外,湯底在淋上麵之前會係鑊上面加上好多白菜去煮,令到湯底清澈清爽之餘又有蔬菜香味。 同金龍有好大對比,但呢個普遍接受度應該會高好多,而且無咁油膩,唔會好口渴。 最後我連湯都飲曬。 其次,麵係屬於爽嘅,亦正中我下懷,而且分量好多。 肉都毫不吝嗇,好多肉。 不過蛋就稍微失望d,寫係半熟蛋,但咬完落去都已經係7 8成熟,可能係擺係湯裏面已經一段時間。 不過overall真心好食,而且價錢都係¥700-¥900呢個Range,值得一試 點擊圖片放大