寒風來襲呢個星期咁鬼凍緊係要食熱啲，聖誕新年黎到當然要食好啲，牛魔王既我今次要食盡美日韓牛先夠本。 見大埔店新開好近就去到，店面同好多分店一樣都係分左兩邊，一邊係食炸雞一邊就係韓燒，門口有個地圖仔講全球分店地方。 點擊圖片放大 +6 望落去成個場既感覺都幾寬敞，同埋都幾光猛，大枱上面用木板隔開左兩台都可以有番個小私隠食飯，聖誕仲有裝飾。 點擊圖片放大 +3 先黎左韓式前菜，有泡菜豆芽等等，唔少得係燒烤用既醬汁，另外一坐底店員就會倒蛋液同加泡菜，食韓燒既其中一種樂趣就係食爐邊蛋。 點擊圖片放大 見到呢個牛魔王既套餐真係好吸引，《韓冬主題二人套餐》($688)，一個餐就包含哂三塊150g既美國西冷、1++濟洲韓牛同日本和牛。先由美國牛食起，係三塊之中最厚身既一塊，食落肉味都出較為有咬口。 點擊圖片放大 1++濟洲韓牛一燒落去啲油香加上滋滋聲真係流哂口水，韓牛自從出國之後都好受歡迎，牛味濃香灑上少少鹽已經好食。 點擊圖片放大 +3 最後不得不提塊日本和牛直情大到舖滿個爐，和牛真係高質，油脂分佈均匀，入口既時侯油脂大爆發加埋超嫩口，三塊入面最愛呢一塊，呢個價錢食到三大塊牛真係夠抵食。 除左牛之外仲會提供左少少既菇類同埋翠玉瓜，輕輕咁燒一燒佢食，清清地可以一解之前食咁多牛肉既油膩感。 點擊圖片放大 +2 甜品有薑餅人雜莓雪花冰，食完個韓燒真係熱辣辣，就算天氣凍食個雪花冰都唔會覺得好凍，個薑餅人唔係得個樣，食落真係有好香既薑味。 點擊圖片放大 飲埋杯暖笠笠既肉桂蘋果茶，入面真係好足料，一飲落去熱辣辣之外個肉桂味都好出，仲有好多既蘋果粒粒係入面。 店名：新麻蒲 BBQ 地址：大埔安邦路9號大埔超級城B區2樓287-295號舖 即刻入去Like & Share埋我地既其他頻道: Facebook: KJFOODLIFE飲食玩樂地圖 Instagram: KJFOODLIFE Openrice: KJFOODLIFE 歡迎合作或查詢: Email: kjfoodlife@gmail.com 餐牌:
