25/5出發啦!!第一個目的地係越南胡志明市。 我地選擇去澳門撘viva macau，因為香港直飛胡志明太貴啦。但由澳門飛只係800幾蚊(包tax)，加埋船票，1000都唔洗，好抵呀! 其實如果早多幾日訂，600幾就得，最衰我地個時怕豬流感，遲遲都唔訂．．．無啦啦俾多2舊水。 viva macau：http://www.flyvivamacau.com/en/ viva macau除左去胡志明外，仲會去悉尼、日本等，都係好平。我地個日撘7:05am班機，所以凌晨3點就由屋企出發去上環。 雖然好眼訓，但興奮心情蓋個睡意呀! 哈哈 好快就去到澳門機場，由碼頭撘的士去機場約MOP 50，澳門機場唔係太大，早1小時去到就OK啦! 如果坐早機，最好食定野先去，因為食肆無咁早開門。 由澳門去胡志明市約2小時，不過依2個鐘都過得幾辛苦，因為機艙好乾，搞到眼乾、口乾、喉嚨乾．．． 依到係胡志明既新機場，好光猛。因為我地一早在香港做左Visa，所以就唔洗同人迫做落地簽證，好快就過到關。 因為suki個backpack無rain cover，惟有用個膠袋頂住先啦，哈哈，趙姑娘無聊地為個袋扮靚，我地之後稱呼佢做wilson。 在越南，可以用美金既，但撘巴士、食野、買街邊野都需要用越南盾，在機場唱錢都幾高價，不妨唱多少少。 唱完錢，我地就周圍搵一架"152巴士"去鬼佬街(pham ngu lao)，但搵左好耐都唔見個bus stop，其實我有一刻想放棄上的士，因為好大雨、backpack又重，但佢地3個都好堅持，所以我都不能放棄呀! 最後在內陸機機場出面終於見到152啦，但好奇怪架巴士一路開一路上落客，司機只係開慢少少但唔會停，上車都有d難度，但都幾刺激呀!哈 每架巴士上面都有一個服務員負責收錢，我地同佢講左想去鬼佬街，佢好似明，咁我地就好安心傾下計啦，傾傾下，後面突然有把聲問：「你地想去邊呀?」原來同車有一個華僑，佢好好人，話會叫我地落車，又介紹下胡志明市有咩好野食。越南人真係好好人架，之後我地都遇到好多好心人。 鬼佬街係guesthouse集中地，亦都係day tour，同埋過境巴士集合點，所以住係依頭好方便。搵guesthouse時，最好睇幾間，格下價。最後我地住左TiTi，一晚好似要USD 14，雖然GH主人對我地愛理不理，但環境唔錯，同埋地下係佢地屋企，所以治安幾好。 住越南既GH，有一點要注意的，因為GH主人會要求keep客人護照，如果想護照跟身，去之前就要Copy定護照有相個頁+visa個頁，佢地係接受副本既。
