第2日7點幾起身，因為join左day tour去湄公河(Mekong river)，我地係join 「Sinh Cafe」，睇網上資料話依間公司信得過，所以就揀佢啦! 因為我地去既時候唔係旺季，所以早一晚book都有位，但有人話旺季就要早幾日，唔知係未啦！ 佢位於鬼佬街，附近都有好多travel agency，有時間當然可以格下價。今次Tour的支出約USD 10/人，包玩＋食＋交通，由9am玩到5pm (連撘車時間)，物超所值，我地4個都玩得好開心！ 早餐：熱狗，唔係人間美食，但會食到製作者的心意！整熱狗的女仔好有心機放靚條腸、加醬！夾4個包都用左6、7分鐘，你可以話佢無效率，但我欣賞她的認真。後來，我地發現越南人整食物係好認真，每一個步驟都唔會hea，令人感動！ 旅遊巴好舒適，導遊開車時介紹下湄公河，不過好似無乜人聽，得我地俾反應。由鬼佬街至湄公河既車程約3小時，我好似訓左2次就到．．．哈哈，依個trip亦訓練我一坐車就訓既本領，不過返到香港又無左依個能力。 落左車，導遊（我地叫佢做偶像）講解行程，不過我顧住周圍望，只聽到有椰子糖食，哈哈。 suki同詩話相中個男仔似Rain，但我同雪都覺得唔似，後來仲懷疑佢係其他旅行社的臥底．．．．因為佢同景點的職員好熟咁。 我地第一個活動係坐船遊湄公河，欣賞河畔景致，好寧靜，好relax。我地見到好多keroro船。 有船家捉魚，佢地好nice，會同我地say HI，我地見到有d人會在船上訓吊床，十分寫意。 上岸後，去睇人整米紙，偶像好落力示範，你見佢搖得輕鬆，但我地試就覺得好重，每日做１００下，應該可以送走byebye肉。 玩完有得試食，幾開心！我地當然唔執輸啦，都幾好食，但我地無幫襯，哈哈。 行多2步開餐啦，好肚餓！！！！！Set lunch只得一個，加"食送"另計。 碟頭飯，凍冰冰豬扒＋春卷，但出奇地，我覺得好食！但個飯既size仲細過一個月餅.............................................................真係會食得飽????? 惟有飲湯頂住先，青瓜魷魚湯，nice!!!! 好清好甜無味精! 蕉飽肚，但可惜佢係皇帝蕉，咬2啖又無，食完大叫：好肚餓呀！開餐期間仲有好多狗黎問我地拎野食，但佢地都好識相，知難以退，哈哈．．．．．我地真係愛莫能助。 食完飯，應該當食左飯，之後再出發，一路行一路叫肚餓，個天都可能聽到，唔想亡我地，又有得擺野入口，有青檸蜜飲，檸蜜飲得多，第一次用青檸，味道好好！ 飲完野，有馬車坐，第一次坐馬車呀！ｄ馬唔知係未會一路行一路去大便呢？佢地整左個袋裝佢地ｄ屎．．．．人會跑到嘔，莫非馬會跑到痾。 我地個馬車哥哥，佢成日都陰陰嘴笑，好似聽得明廣東話。坐馬車好開心，雖然知道只是一個旅遊活動，平日當地人應該唔會用馬車，但膚淺既我地，真係坐得好開心，哈哈，途中拋下拋下，我地就嘩嘩嘩，馬車哥哥又陰陰嘴笑．．．． 坐完馬車，又見到成枱生果，我地都不禁講：「嘩，又食呀！」不過我地絕對食得落，哈哈。食生果之餘仲有越南傳統音樂聽，好relax。 又飲又食又玩，已經好開心，但戲肉在後頭，待續。 －－－－－－－－－－－－－－－－－－－－－－－－－－－－－ Suki小貼士： 1.因為SIGH CAFE TOUR以越南貨幣收錢，你都可以比美金，但個對換率係低D (~US$1=＄16800)，所以記住唱定錢先去平D. 2. 水果餐之水果會因應季節而改變, 因為睇佢地介紹的相係有楊桃的。 3. 怕臭的朋友坐馬車時記住唔好坐第一個位，因為會對住成袋屎。
