我地梳洗下之後都1:30啦，下午的行程就係去柬埔寨皇宮同埋國家博物館。依2個地方都係係河邊果一邊!! 無錯，即係我地之前黎果度!! 經過岩岩「汗的教訓」之後，我地緊係唔會再行返去啦!!! 我地好無骨氣咁用左$2搭tuk tuk去返河邊酒吧街附近搵野食先。 我地決定獎勵下自己的堅毅，所以去左一間琴晚經過見到幾靚但因為貴(aroundUSD3-7一個餸)，而唔捨得食的餐廳度食!! 間餐廳我地叫佢做「薄lock」 (PONLOK)，哈哈哈哈!!! 果度係食d正宗柬埔寨菜/中柬fusion菜，樓高2層， 2樓的露台位有得睇河邊景，不過就無冷氣!! 我地去到差唔多2點幾，過左食飯的高峰時間，成間餐廳得我地4個客... 所以就全部侍應一齊黎招呼我地啦!! 間餐廳好正架!! 全部侍應都係著裇衫西褲的年輕男子@@ (對於我地依4個如狼似虎的中女黎講真係一個好地方， YEAH!!!!) 佢地的服侍好慇勤，又貼心... 四圍有D烏蠅飛飛下， 佢地會用筷子夾住張紙巾係幫我地係側邊撥黎撥去趕走D烏蠅，哈哈哈哈!! 由於我地實在太肚餓，所以叫左好多野食(樣樣都幾好食)，仲叫左啤酒舉杯慶祝tim!!! 當中最好食的係一個有米粉撈埋一齊食的沙津同埋柬埔寨的傳統湯。柬埔寨的湯係好似冬蔭公咁的酸辣湯，不過清好多，無椰奶的，好夠酸，加魚最好食。我同SZE從此就愛上左柬埔寨的湯，次次食飯都會叫黎飲架!! 食得七七八八之際，d侍應居然搬左4碟柬埔寨甜品出黎，雖然我地對依個安排好滿意，但果時真係好飽食唔落， 唯有打包拎走。埋單USD40，係我地咁耐以黎食得最豪的一餐，不過絕對值得。 (但臨走時就落雨啦！我地發現柬埔寨，一到下午3,4點就會落一場大雨，然後就會涼涼地，都幾舒服。) 食完之後我地就行去皇宮啦。其實係河邊一眼就可以望到一堆金色建築群同國皇張相。我地只係需要沿住皇宮的外牆一條直路咁行搵個入口，但都行左好耐，因為個入口好唔顯眼，好似一間屋的門口咁大，真係會好易miss左，要睇清楚d。一入到去就要係個繳款處到比錢入場(大約$6.xx)。 ＜＜俾錢中 要一提的係去皇宮為左表示對國皇的尊重，係要著有袖的衫，及膝的褲同埋唔可以著拖鞋!!!!!!!! 仲有你會見到好多導遊會企曬係度，問你需唔需要佢帶你遊覽，我地無要到，因為要比錢的，大約USD3.... 入到去，見到好多一幢幢金碧輝煌的尖頂建築物，雕刻全部都好細緻，我地開始見識到柬埔寨人的雕刻功力。每個建築物上左樓梯之後，入門口之前要先除鞋 (所以建議大家不妨著襪去，因為個地下都唔係好乾淨)... 每間建築物入面都會擺放左一d 佛像、藝術品又或者皇室擺設比遊客參觀。 期中有個叫「銀殿閣」的地方 ---閣內全個地板都係用銀板鋪成， 聽到依度我地都以為一定會好壯觀，好燦眼，但不知是否因為遊客太多，工作人員怕地板會受到破壞，所以全個銀地板都用了地毯鋪著... 好失望!! 不過係d 地毯中間有些空隙都會露到少少銀地板出黎，仲有閣內有一顆會變色的寶玉同一座有好多寶石的佛像可以睇到... 係一座座金色的建築物中間零零舍舍有一間建築風格好唔同的灰色小屋，叫做「拿破倫三世閣」，相傳係拿破倫三世送比國皇的禮物。 之後，我地去到一個許願既地方，問當地的學生，佢地話可以在葉上寫願望，用水淋葉又可以洗滌心靈。我地都有make a wish! 好可惜的係我地遊皇宮的時候係岩岩落完大雨，天色都仲係好昏暗，如果有太陽照落d 建築物上面一定更加靚，金光閃閃!!! 成個皇宮唔算好大，不過都有唔小路仔可以比你行入去，左轉右轉咁，行行又可以去到好似後花園的地方，果度有一個吳哥窟模擬仔。我地因為趕時間，無行得好深入，都係走馬看花咁行左一圈就走啦.... 出黎之後，我地心中有一個疑問：究竟國皇係唔係真係住係皇宮入面的呢? 因為行完一圈我地都唔覺有一處地方係「閒人免進」、「遊客止步」、「皇宮重地」咁架wo... 真係一個迷!!! 離開皇宮已經差唔多係下午4:15，我地仲要趕去下一個景點 --- 國家博物館。 國家博物館係皇宮隔離無幾遠，行大約10-15分鐘就可以去到，係一幢磚紅色的建築物，入場費USD3。柬埔寨的國家博物館內主要擺放左吳哥窟遺址內曾被人破壞或盜去的石像、石雕同石碑，所以如果你係先去吳哥窟再去國家博物館的話，就可以看到吳哥窟內那些缺失了的部分。 除此之外，館內亦有其他柬埔寨不同時期的出土文物，好讓遊客多瞭解高棉的文化歷史。雖然不像其他有錢國家的博物館豪華和設備齊全，但其實它自有另一番味道。博物館是開放式的，沒有冷氣但有天然光透入黎，外面的花園有個蓮花池，整體感覺很寧靜，很舒適... 只怪我地太遲黎啦 (博物館5點閂門)，如果唔係係館內慢慢行下睇下，都幾寫意。 P.S. 由於館內不准拍照，我地都無影相，無得同大家分享。 之後我地就返左酒店，因為好累都無咩點食野就沖涼訓覺，點知臨訓之前居然見到電視播緊泰國的青春偶像劇，仲要係大結局!!! 我地比個男主角有型的髮型吸引左，係度睇... 女主角好似angelababy！雖然我地之前一集都無睇過，但已經估到曬D劇情，一來因為佢地D節奏好慢，勁多回憶，二來個故事係經典偶像劇模式：白馬王子落難失憶愛上平凡率真女孩，哈哈!! 我地邊睇邊笑，仲拍底左同另外2個同伴分享tim!!! 睇曬都成12點，但我地又無訓，因為今日發生左一段小插曲，話說去博物館途中有個小女孩和他的弟弟向我地乞討，我地無比錢佢地，跟住佢地就指住我地手上打包的食物示意我地比佢地，我地亦比左。 依件事居然比我同kit拎左黎傾，當晚就「行善的價值觀」作出左深入的討論，傾到好夜，都話我地個人有深度架啦!!! 旅行的確可以令人反思。 第2日就係成個旅程心靈最震撼的一段啦!!! 待續...
