第二日我地未夠8點就起身，因為我地約左tuk tuk司機Rain 9點鐘出發。未出發食個早餐先。 我地去左之前講果間背包客馳名的Capitol GH度食 (係我地GH隔離)，地方係就係污糟左D，不過上菜幾快同D野都幾好食，尤其係炒蛋，價錢約USD$1.5-3。 牆上貼左車程表，可以見到每日都有好多班車來回金邊同暹粒，仲有船搭，交通都好方便。 食完行返去我地GH門口，遠遠見到Rain已經係門口等緊我地 (我地之前仲擔心佢因為我地唔住佢介紹的酒店而失約tim!!! 仲同成日係GH門口兜客的「煙屎牙」伯伯約好如果Rain唔黎就幫襯佢，哈哈哈哈!!) 不過我地真係多慮，個度的tuk tuk司機都好有交帶，有早無遲，好緊張自己的appointment!!! 講下我地個tuk tuk司機Rain先。佢生得唔係好似柬埔寨人，有d似非洲人，矮矮的， 黑黑實實。個人好熱情，最緊要係英文好，易溝通。不過佢部車就細左d咁啦。總括黎講我地都幾推薦想去金邊的朋友仔搵Rain架!! (不過唔好幫襯果邊d tuk tuk司機的介紹，除左間黑店之外，Rain的介紹係遲d又會令我地失望!!) －－－－－－－－－－－－－ 上左車，我地就直駛我地的目的地---S21監獄博物館(又名波布博物館)。S21係赤柬統治時期(類似中國的文化大革命時期)係金邊的一所集中營，原身為一間學校，改建後用以集中屠殺「犯人」。 15000個被拉入S21的人，除了少數的20幾人之外，全部人都係獄中被毫無尊嚴地虐待至死!!! 原本充滿笑聲的地方可以一轉眼變左做充滿慘叫聲的殺人場，真係好諷刺!!! S21係一條後街入面，不是太起眼，外表似一間荒廢左的校舍。柬埔寨政府無刻意改建S21，保留左佢的原貌。可能有些人會話佢只是一間有幾張舊相的爛學校，但我地可以話比大家聽，30年前，15000個無辜的柬埔寨人就係係你處身的依個地方喪生，原原本本的S21先可以比到大家最真實同活生生的感受... 入場費唔記得係USD3定5。繳費處仲有不少關於赤柬時期的書，VCD同Postcard賣。 你仲會見到一個「不淮笑」的警告牌，不過放心，大家一定唔會比人捉，因為你無可能笑得出... S21呈U形，有A，B同C座，每座有3層。一入到去有一D歷史簡介，大致係講述當年由波爾布特(Pol Pot)統治的赤柬推翻了朗諾政權，入主金邊，開始了柬埔寨人民最黑暗的4年，政府為了創造所謂的完美社會主義國家，以好多個好似S21般的集中營，大量屠殺他們口中的「政治犯」，人數竟多達2百萬!!! 相信大家也看過由骷髏骨砌成的柬埔寨地圖(現在己拆掉)，可想而知當時受害者之多!!! 另一個展版列出當時監獄的「規則」，荒謬之至令人齒冷!!! P.S. 建議大家如英文像我們般爛的話，不妨帶埋電子辭典去(認真的)，雖然以一般英語水平絕對能明白大部分展品內容，但因為我地係一塊展牌都無錯過，當中難免有些內容會miss左/唔明... A座係一間間獨立囚室，有當年囚犯的照片掛在牆上，地上牆上甚至還留有他們的血跡... 心很痛... 行完A座頭2層差不多10點，就去另一座3/F睇紀錄片。紀錄片每日10:00同15:00播映，片長約45分鐘。 以一個愛情故事講述出當時柬埔寨人點樣比人沒收所有財產，要到鄉下強迫做苦工、家庭要解體，分男女住集體宿舍，夫妻相聚要先取得批准、仲要日日擔驚受怕，怕比人捉走的非人生活。映片後段有繒畫S21內圖畫那位畫家(他是少數倖存者，他也有把自己畫進畫中)的訪問。如果大家有興趣，不妨預好時間去睇，可以多d了解下依段歷史。 B座有好多好多張囚犯的相，每人有一個號碼，你望住佢地就會係度諗依幅就係佢地的遺照，唔知佢地果時係度諗緊咩呢，有些人係相中還是會有笑容的... 一個個無助的眼神，置身其中，我地4個都好靜好靜... 之後就陳列左好多不同刑具同施刑時的圖畫。睇住一幅幅殘忍的畫面同字句，我地真係好激動好嬲，依d係人黎架，點解要咁樣去折磨佢地，點解落到手!!!??? 我地睇到眼濕濕...人真係可以好醜惡!!! 另一層大家可以睇到有另一系列的展牌，展示出當時的政治進程還有人民的訪問，同埋一首道出當時柬埔寨人生活的詩。 另一座外圍布滿鐵絲網，入面係一個個單人囚室，細到只可以容納一個人，囚犯們不見天日，在這狹少的空間中消磨掉最後的生命... 離開S21已經係3個鐘頭之後，出面陽光普照，S21其實一D都唔陰深恐怖...但我地心情已經好沈重，Suki仲話起「雞皮」起足3個鐘tim... 不要聽信別人說什麼「S21不值一看」的傻話，它是柬埔寨一段最深刻歷史的見證和縮影...直接影響柬埔寨現時的發展，不要錯過! 行程下一站係殺人場(Killing field)。當日係S21殺唔曬的人就會比貨車一車車運走送去Killing field活埋，大批大批咁處決，一日大概處理300人!! 我地上左Rain果架開得好謹慎(慢?)的tuk tuk，踏上左當日果班受害者同一條的不歸路... P.S. Killing field比較遠離市區，車程約30分鐘，如果大家包tuk tuk司機一日去埋依度，就可能要貴d，我地包Rain係$12/13(無咩點講價)... 另外，一路上沙塵好大，大家記住要帶口罩!! Killing field入場費$2。中間有一座白色塔，擺放左死者的屍骨... 其他地方就係一個個坑洞，有大有細，旁邊有牌介紹當時活埋人數... 側邊有一啡紅建築物就係一個小小的陳列館。 期間有3個小男孩在鐵絲網外說要給我們帶路 (應該係前面間學校的學生)，佢地3個係依個殺人場外好開心咁唱住D外國流行曲，比我的感覺有D怪呢... 雖然赤柬的禍害仍然存在至今，但慶幸赤柬的陰霾好似並無留在這班孩子的心靈中!! Killing field唔似S21咁多野睇，不過我地覺得有時間的話不妨一到，又係另一番感受。 赤柬的領袖在今年的2月被公審了，雖然什麼懲罰也彌補不了他們往日的暴行，但一切總算有個了結。我地衷心希望柬埔寨的所有人生活得愈來愈好，希望佢地好好加油!!!! 願世界和平 (係就係「行」D， 不過係真心的!!) ------------------------------------------------------------------------------------------------------------- 我地話，完成這趟心靈衝擊之旅之後，下午就係另一個心靈衝擊之旅啦 (仲要衝擊埋個荷包，去Shopping!!) 哈哈哈... d衝擊真係一浪接一浪... 待續...
