今日係我地用ANGKOR WAT PASS最後一日，行程好簡單，去女皇宮＋水底浮雕。 但路程較遠，由市中心出發去女皇宮，大約要45分鐘至1小時車程，所以tuktuk司機一般都會要求多少少錢。 沿途盡是田野，風光明媚！！坐Tuk tuk真係好舒服，清風送爽，舒服到要閉目養神！ 爽完，落車就覺得今日天氣異常翳熱，都幾辛苦。而Suki亦開始唔舒服啦，沒精打采。 女皇宮(Banteay Srei)：用粉紅色的砂岩所建造，歷久常新，雕刻清晰，可以睇到當時既人既雕刻技術。 點擊圖片放大 +6 真係雕得好靚！ 依幾個雕像應該係新加既，原本既可能已放在博物館。雖然有少少格格不入，但俾人睇到當時既真實環境。 參觀完女皇宮，我地再向水底浮雕出發，車程約30分鐘。 落車後，suki仍然覺得唔妥，需要休息一下，所以我地將佢交俾Ah Ly照顧，我地三個自己上山啦。 水底浮雕(Kbal Speana)：又稱千陽河，我地去拜會1000個林迦（Linga，代表男性的陽具)。 全程1500米，平路當然好快行完，但因為係山路，加上有少少崎嶇不平，有時要手腳並用先爬到上去，所以我地都用左35分鐘行上去。 行依個山唔同行香港既山，依到無石屎路，但都會開闢左ｄ路，令到大家知道正確路向。 沿途景色好靚，空氣好，又有風，所以都唔辛苦。 我地３個人為免走失，定時報數，１、２、３，齊人就繼續行，哈哈。 隔一陣就會有路牌顯示仲有幾長路程。 我地在山上遇到３個在上海工作的四川姑娘（上圖），同其中一個一路行一路傾下四川、香港、上海、柬埔寨既野．．．．講到有ｄ氣喘。除左有上海姑娘一齊行山外，仲有幾個柬埔寨年青人尾隨我地。 我地仲見到琴日相識既馬來西亞人，傾左一陣又say byebye。 終於到。圓柱體個d就係林迦啦。 不過影下相，逗留左15分鐘就走啦，因為突然刮起大風，雲又開始積厚，我地覺得會落雨，所以早走走著，否則落山就會有危險。我地都叫埋四川姑娘一齊走。 落山的路都有林迦，仲比頭先多。 呈正方形既係優尼(Youni，代表女性子宮)。 落山既路唔太清晰，但好彩撞返個幾個柬埔寨年青人，佢地原來係黎沖涼。佢地好好人，指示我地落山既路。 佢地之後仲追到我地，我地就跟住佢地行既路行，無咁崎嶇，行得舒服ｄ，佢地一路行仲一路唱柬埔寨話既廣東歌，好似係陳慧嫻既，但唔記得左咩歌名。 個天仲好藍，但天有不測之風雲。（續）
