13 JULY 2015(MON) 好多人都會覺得八月生日嘅小朋友總係好似唔多著數，因為八月時放緊暑假，要提早係放假前開生日會。 雖然早左成個月，不過計我話有得做小主角就已經係好開心事，最緊要係有得玩呀嘛~ 當小小豬學期初睇見學曆表顯示七月份會同埋八月小朋友一齊開生日會時，佢就會每一個月開完生日會放學時同我講佢會七月開生日會，期待左都差唔多一年，到左今次成為主角之一，佢又點會唔興奮呀！ 係尋晚仲好乖乖咁主動幫手包小禮物送俾同學仔呀~ 其實開頭我都冇打算送小禮物，不過前幾日小小豬問我有冇準備禮物，又話同學仔收到禮物會好開心，總之就係一輪甜言蜜語，最後我都為佢準備一份小小心意，等佢同佢啲同學仔都開心下啦！ 今日除左係生日會之外，仲係小朋友嘅園會，各級嘅小朋友都會表演一番。為左隆重其事，一向愛豬如命嘅老公又點會放過睇個仔呀，所以就請左一日假去睇小小豬表演！ 為左霸靚位，我地真係坐左係禮堂都兩個鐘等小小豬嘅出場~ 終於都佢地表演啦，開頭一見小小豬行去前面，仲以為有好位置~ 點知唔夠半分鐘，老師就捉走左小小豬，原來細細粒嘅小小豬俾安排企係後排，真係少啲眼力都睇佢唔到呀~ 唉....超級極度失望，因為整個表演只有一首兒歌時間(一分半鐘都冇)，再加上小小豬全程企係最後排，真係完全搵唔到佢，到睇到少少時就已經跳完，真係........無言！ 不過完成表演之後，生日月份小朋友家長可以入去同小朋友一齊影相唱生日歌都可以滿足返我心靈上嘅失落~ 戴左生日帽嘅小小豬明顯係與平日唔同，好似會心微笑咁哦~ 到同學仔向生日小朋友祝福時，佢真係好興奮，唔洗引佢都笑得好燦爛呀~ 唱完生日歌，我見小小豬企定定老師前面，我仲以為佢心急想食蛋糕，但原來係生日小朋友要幫手送蛋糕俾同組小朋友呀~ 點擊圖片放大 哈哈哈...完成任務就可以食啦~ 依個時候我地家長都要離開課室了，雖然今日嘅表演真係令我何其失望，不過見到小小豬開生日會時咁開心又如此合作，所以都算啦....只要小小豬開心，我就滿足啦！ MY FACEBOOK~ MY INSTAGRAM~ MY WEIBO~ MY E-MAIL~ 其他博客區 ※※ SINA ※※ ※※ MyBB星級Blogger ※※ ※※ 熱新聞專欄 ※※ ※※ 博勢力 ※※ ※※ She.com ※※ ※※ WeShare ※※ ※※ theZtyle ※※ ※※ U-Blog ※※ ※※ SeeWide ※※ ※※ BlogSpot ※※ ※※ BK Milk 親子語 ※※
