14 MARCH 2015(SAT) 哈哈哈...大家估唔估到小小豬拎住依三個膠箱做咩呢？其實成件事要由兩星期前講起~ 話說兩星期前我地三口子去左吉吉島行街街，行過12蚊店當然又入去八卦一下。就係咁...佢地兩父子就帶左三個膠箱返屋企，仲霸左我廚房一個角落~ 其實依排佢地兩父子嘅STORY-TIME係講緊有關環保嘅故事，再加上之前我地去參加啲嘉年華會都玩過啲環保遊戲，所以小小豬都對藍廢紙、黃鋁罐、啡膠樽有一定認識，就係因為依個原因，佢地兩父子就建議買幾個膠箱返嚟，小小豬仲話自己係環保大使添！ 依個環保大使又真係做得到，因為佢由擺左膠箱嗰日就已經識得將回收廢物擺返係正確嘅小型回收膠箱入面啦！ 藍廢紙~ 黃鋁罐~ 啡膠樽(哈哈哈...買唔到啡色膠箱，寫個字仔分別左先啦)~ 儲滿左啲回收物就拎落去屋苑大回收位置啦~ 小小豬仲要自已倒入啲回收箱度呀~ 點擊圖片放大 坦白講，廚房係我作戰嘅地方，地方都已經唔係大，仲要擺多三個膠箱係度真係唔係好方便。 不過，環保係要由細細個做起，既然小小豬願意又肯作出配合，所以我係應該俾支持同鼓勵佢，等佢養成依個環保習慣都係一件非常好嘅事呀！ 小小豬已經非常習慣左依個回收方法，每日都會幫我地檢查有冇放錯，有時見我地準備拋垃圾時會主動幫我地處理添。 其實唔止小小豬，我同大肥豬都習慣左啦，實行三口子齊齊做，為環保出一份小力啦！ MY FACEBOOK~ MY WEIBO~ MY E-MAIL~ 其他博客區 ※※ SINA ※※ ※※ MyBB星級Blogger ※※ ※※ She.com ※※ ※※ WeShare ※※ ※※ theZtyle ※※ ※※ U-Blog ※※ ※※ SeeWide ※※ ※※ BlogSpot ※※ ※※ BK Milk 親子語 ※
