17 FEBRUARY 2015(TUE) 小小豬放假，趁我地銀咭人仕可以入場，當然都要入去迪迪尼玩一轉啦！ 今日小小豬仲變身成為小白，佢依個打扮醒唔醒目呢~ 其實我地張全年証係上年十月已經續左，不過當時正係屋企最忙嘅時候，所以一直都冇入過去。大大話話都有成三個半月冇入嚟玩，所以小小豬一入到樂園就勁興奮，仲話佢負責帶我地去玩哦~ 係迪迪尼一片Queen Elsa及Princess Anna之下，小小豬依一身Olaf打扮真係好突出，沿途都吸引到唔少目光，亦好多人讚佢可愛添。 唔知係唔係因為多人讚佢，攪笑嘅小小豬話：我今日係叫小白，你地唔好叫我個名啦，叫我小白啦！(佢仲唔肯除件小白衫添) 小白當然要去搵公主同皇后啦，不過同真人見面就真係冇可能，因為我地晏左入場，冇晒見面預約証，不過同依兩個影就仲原汁原味啦~ 唉...依個傻仔有邊度去呀？第一時間就當然係帶我地去小小世界啦！今日可能係假期，又加上新年將至，所以園內都有好多人(當然內地人多啦)，我地排左差唔多30分鐘先上到船呀~ 難得可愛小白裝，當然要影返張相啦(如果小小豬肯多少少笑容就好了)~ 玩完小小世界剛剛好就係第一場巡遊時間，由於我地晏左少少，所以一直都搵唔到位，原本我地都只係企係第二排睇，係依個時候有一位好好嘅女仕，佢叫囡囡坐埋少少，迫迫地咁讓左一個小位俾小小豬，等佢可以舒舒服服咁SHOW呀~ 巡遊例必要出去玩下，同啲哥哥姐姐互動下啦~ 點擊圖片放大 睇完巡遊又到排隊時間，今次當然係全園至勁嘅馳車天地啦！咩叫做見到自己鐘意嘅嘢雙眼發光？睇小小豬一上車個樣就知啦，佢真係好愛渣車車呀~ 叫佢同我地影相時又唔見佢開心笑，緊係啦...因為佢心急要出車呀~ 依個小小豬真係好鐘意渣車，佢一開車就超級興奮，仲玩到唔願落車啦~ 排隊都排到攰，小小豬竟然話肚餓，所以我地就去左火箭餐廳醫肚。 時間剛剛好，我地出嚟時就見到巴斯光年出嚟，所以就可以好快咁同巴斯玩遊戲啦~ 點擊圖片放大 +3 之後我地去睇3D MICKEY，真係估佢唔到，平日唔洗點排嘅地方，我地今日都要排半個鐘先可以入場，邊個叫小小豬鐘意睇，作為慈父母嘅都冇法啦~ 真係話咁快又到第二場巡遊時間，小小豬真係好鐘意睇巡遊(其實佢係鐘意出去玩嘅過程)，依次係佢主動話要睇，所以我地又去睇啦~ 點擊圖片放大 佢有幾唔捨得個巡遊隊伍？睇佢差少少跟埋入去就知啦~ 聽到排隊人仕話係新年版DUFFY，當然即刻跟隊啦！點知排左半個鐘到見到公仔出嚟先知原來唔係，有少少失望添… 整定我同DUFFY & SHELLIEMAY冇緣了！ 不過同新年版公仔影都唔錯啦~ 點擊圖片放大 +2 唉...同唔到大嘅DUFFY & SHELLIEMAY影，同細細個嘅影下頂當先啦~ 新年有春天佈置，有好SWEET SWEET嘅MICKEY & MINNIE，當然又要影下啦~ 今日玩最後嘅一樣遊戲，又係小小豬至愛嘅飛碟~ 玩完遊戲我地就去醫肚，食飽飽之後就去返大街等睇夜光巡遊啦~ 今次係小小豬第二次睇光影匯，明顯比上次係投入多啲，不停揮動佢支光影筆呀~ 哈哈哈...又難怪小小豬咁鐘意，因為成個節目都係好正，靚人、靚車、靚衫、勁音樂同跳舞，唔好話小小豬，我第三次睇都仍然覺得好興奮呀~ 點擊圖片放大 +7 係快樂嘅地方啲時間真係過得特別快，睇完光影匯我地就走啦，真係有啲好唔捨得走，因為今日都唔算玩得好多嘢！(冇法啦...實在太多人，排隊時間仲多過玩嘅時間) 不過唔緊要，嚟緊三月又有銀咭日，之後又有復活節假期，實行可以密密帶小小豬玩餐飽呀！ MY FACEBOOK~ MY WEIBO~ MY E-MAIL~ 其他博客區 ※※ SINA ※※ ※※ MyBB星級Blogger ※※ ※※ She.com ※※ ※※ WeShare ※※ ※※ theZtyle ※※ ※※ U-Blog ※※ ※※ SeeWide ※※ ※※ BlogSpot ※※ ※※ BK Milk 親子語 ※※
