15 OCTOBER 2014(WED) 曾經係泰國餐廳食過一次椰汁斑蘭糕之後就愛上左，不過之後就好少地方見到有得買(或者係我少去行街所以見唔到)。早排係網上無意中搵到個食譜，所以就試吓跟風整整佢啦！ 哈哈...我個製成品賣相都幾靚呀~ 開頭我都以為整嘅過程好複雜，一層層唔同顏色好似好難咁，但原來其實都幾易，我個人認為最難都係完成後清洗用具嗰個步驟呀！ 材料： 木薯粉 200g、粘米粉 29g、椰漿 200g、砂糖 150g、水 200g、斑蘭香油 2茶匙~ 將砂糖加入水以中慢火煮至溶解~ 之後加入椰漿拌勻後放涼~ 木薯粉和粘米粉過篩~ 然後拌入椰糖水中攪勻，最好就分四次加入，咁會易啲拌勻呀~ 粉漿分以比例6：4分為兩份~ 在多的一份粉漿中加入斑蘭香油~ 粉漿處理好就可以準備放入矽膠模，我自己都有好多矽膠模，不過好多都係淘寶買返嚟，平時用嚟雪吓啲冰甜品就話冇所謂，不過要加熱的話，唔多唔少都有擔心個安全性。所以最後我都係IKEA買左啲可加熱嘅矽膠模，咁就可以食得安心啲嘛~ 先將模具放入鑊度蒸3分鐘，以用作預熱模具，咁一陣甩模時就會易好多呀~ 先倒一層斑蘭粉漿入已預熱的模內蒸3分鐘~ 跟住倒白色粉漿蒸3分鐘~ 把兩種粉漿重複交替至用完~ 最後一層蒸15分鐘，咁就完成啦~ 待糕放涼後甩模，就可以食得啦~ 由於我分粉漿唔太平均，所以斑蘭色係多啲，所以有啲糕都只可以做到三層，有少少美中不足添。 味道方面又點，我個人覺得都唔差，可以食到好香嘅椰汁味同斑蘭味，真係嗰晒我。不過大肥豬話今次就有八十分，因為就覺得韌左少少，食唔到煙韌嗰個口感，如果可以軟返少少咁就應該會好好食。 等我繼續努力研究吓，下次一定可以整出一百分好味嘅椰汁斑蘭糕呀！ MY FACEBOOK~ MY WEIBO~ MY E-MAIL~ 其他博客區 ※※ SINA ※※ ※※ MyBB星級Blogger ※※ ※※ She.com ※※ ※※ WeShare ※※ ※※ theZtyle ※※ ※※ U-Blog ※※ ※※ SeeWide ※※ ※※ BlogSpot ※※ ※※ BK Milk 親子語 ※※
