13 AUGUST 2014(WED) 今日我地三口子真係有口福，因為得到帝都酒店公關姐姐邀請，去佢地旗下嘅2+2 Cafe食自助晚餐。佢地主打係生蠔，真係啱晒我同大肥豬呀~ 老實講，其實我對帝都酒店印象都唔算太深，只係知道係沙田新城市附近。不過原來2+2 Cafe都好有來頭，仲拎啲美食獎，所以都非常期待呀~ 哈哈哈....我先安頓好佢地兩父子，之後就周圍八卦吓有咩食先~ 整個自助餐係分為兩部分，近接待處嘅一面就係甜品部，所以一行入Cafe就已經見到唔同種類嘅甜品啦~ 公關姐姐提我地一定要試啲蛋糕，睇見啲蛋糕都已經覺得好靚呀~點擊圖片放大 +6 除左依啲大件蛋糕之外，仲有啲細細件放係雪櫃入面呀~ 即叫即整嘅梳乎厘~ 仲有自助式嘅班戟機~ 當然唔少得豆腐花啦~ 生果款式就好似少左啲啲啦~ 我去過幾間酒店，都係第一次見同時間有兩個品牌雪糕可以選擇，真係啱晒我依個雪糕怪呀~ 另外，我都係第一次見有爆谷同夾夾糖，真係啱晒啲小朋友呀！不過我覺得啲爆谷唔多熱同已經淋左唔好食，如果可以即叫即整的話，咁就非常正啦~ 行完甜品位置，就走返入內廳，睇吓有咩好嘢食先！ 熱盆方面都算多，雖然都算係啲大路食物，不過勝在有唔同種類，總有一款啱食嘛(唔好意思，因為我之前掛住影甜品，所以熱盆好多都俾人拎左大半，所以我冇影到相，同埋.....我其實食自助餐時係好少食熱盆呀)~ 點擊圖片放大 沙津吧款式都算多呀~ 冷盆款式都多哦~ 點擊圖片放大 +3 仲有即叫即整嘅壽司同刺身呀~ 自助式任食汽水同茶~ 當然唔少得今次嘅主角...生蠔，即叩即開，仲係你面前沖洗。每人每次排隊只可以拎三隻，不過咁都好，起碼有限制，可以保持新鮮又等各位食客都可以享用到嘛~ 點擊圖片放大 +3 哈哈哈...做完實地記者，又係時間開餐啦！ 第一個目標當然係生蠔啦~ 雖然啲生蠔看似就細細隻，不過個味道都唔錯，好鮮甜仲冇乜海水味，我同大肥豬整晚加埋都食左差唔多有四十隻，真係何其瘋狂的一次呀~ 之後就食刺身，不過可能係我地拎嘅時候個位唔太靚，所以好似唔多肥美，不過都覺得好新鮮~ 之後就不停食，依度都只係我地食嘅一部分，因為我地掛住食同排隊拎生蠔，所以好多時都唔記得影相呀~ 點擊圖片放大 +4 由於之前公關姐姐叫我地一定要試蛋糕，所以我每一款我都有試。我覺得啲甜品又真係唔錯，食落唔甜之餘仲好味，尤其係個士多啤梨奶凍同埋個椰汁千層糕，我仲食左五件添呀！ 小小豬當然就係最鐘意食藍莓蛋糕呀~ 哈哈哈...其實係我未去做記者之前，我地已經為小小豬準備好啲食物，佢又食炒麵又食炒飯，都不知幾滿足。就係小小豬食飽飽嘅時候，待應姐姐就為小小豬送上圖畫紙同顏色筆，等佢可以有啲細藝之餘，又可以等我同大肥豬可以安心咁食，真係一個唔錯服務呀~ 點擊圖片放大 小小豬見我地成日行出去拎嘢食，佢又話要一齊去，所以就帶佢去行一轉啦~ 最吸引小小豬嘅地方當然係夾夾糖啦~點擊圖片放大 同我一樣係雪糕怪嘅小小豬又點會放過食雪糕嘅機會，今次大肥豬仲破例俾佢食兩杯呀~ 點擊圖片放大 +2 整體上今日依個自助晚餐我地三口子都食得非常滿足，我地三口子都食到脹卜卜咁離開，真係好耐冇試過可以食得咁瘋狂啦！ More information : Website：http://www.royalpark.com.hk/hongkong/chi/dining.html Facebook：https://www.facebook.com/RoyalParkHotelHongKong
