近期最Hit嘅全新好去處，愉景新城 D.Park多元智能學習樂園，今日有機會嚟呢度先玩為快！ 【呀劍萬帥facebook專頁 http://www.facebook.com/kimfamilytraveltips】 我哋由屯門搭60M直到愉景新城落車，都係半個鐘頭多D！ 愉景新城裝修過之後呢個全新面貌，我都係第一次到此一遊！ 一入到門口就發現呢個紙板迷宮，以下是參與「全球最大硬紙板雕塑迷宮活動」詳情(消息截至22/4/2016) (最新消息：凡於D‧PARK愉景新城之商舖消費，星期六, 日或公眾假期, 憑每張有效的當日機印$100 或以上發票, 即可參加全球最大硬紙板雕塑個迷宮一次, 每次10 分鐘) D.Park都幾聰明，自己創造幾個動物角色做佢哋呢個學習樂園嘅吉祥物 但係唔知點解我覺得佢哋9成似樂意動物餅D動物....... 再行入去見到MI SUPERRUN「多元智能兒童全能跑」，佢係一個充氣遊樂設施，今日嚟嘅時侯仲未有得玩，不過依家一至日都開放啦(留意的開放時間，詳情在最後有介紹) 嚟到今次多元智能學習樂園嘅主場地，就係D Central Park中央公園 不過喺我排緊隊嘅時侯等我介紹吓今次呢個咁複雜嘅多元智能學習樂園啦 其實佢主要劃分咗四大區： (1) D‧PARK愉景新城( L1) Whale Garden鯨魚花園 $0(免費) (2) D‧PARK愉景新城( L1) D Central Park中央公園, 分為兩個旅程 a) 多元智能玩具公園體驗旅程 $50 (四、五及星期日) 價錢已包括一大一小 b) 多元智能運動體驗旅程 $20 (平日)、$30 (周末及假期), 價錢已包括一大一小 (3) D‧PARK愉景新城( L2) Amazon Academy亞馬遜學園 多元智能音樂及歷險旅程 $50 (平日)、$60 (周末及假期)、成人每位$30 (4) D‧PARK愉景新城( L3) Kiddy Place 愉快天地 多元智能邏輯及語文體驗旅程 $20 (平日)、$30 (周末及假期) 價錢已包括一大一小 所謂「多元智能」其實係分為「運動智能」、「視藝智能」、「音樂智能」、「人際智能」、「語文智能」、「自然智能」、「自省智能」、「邏輯智能」這八大項 首先在中央公園內的兩個旅程「多元智能玩具公園體驗旅程」及「多元智能運動體驗旅程」其實係喺同一個地方進行同埋幾乎冇分別！所謂「多元智能玩具公園體驗旅程」其實只係多咗其他唔同玩具及設施，如果因為咁要加多$30(平日)我就覺得冇必要！所以只需要參與「多元智能運動體驗旅程」$20 (平日) 就好夠好抵 不過我都俾大家睇吓「多元智能玩具公園體驗旅程」開放時段啦 星期四 A) 3:00pm-3:55pm B) 4:00pm-4:55pm C) 5:00pm-5:55pm D) 6:00pm-6:55pm 星期五 A) 12:00nn-12:55pm B) 1:00pm-1:55pm C) 3:00pm-3:55pm B) 4:00pm-4:55pm C) 5:00pm-5:55pm D) 6:00pm-6:55pm 星期日 A) 12:00nn-12:55pm B) 1:00pm-1:55pm C) 6:00pm-6:55pm (即係話逢星期日3:00pm-5:55pm這3個時段會變番做「多元智能運動體驗旅程」) 呢一篇網誌主要介紹( L1)D Central Park中央公園，下兩篇會介紹( L2) Amazon Academy亞馬遜學園及( L3) Kiddy Place 愉快天地，至於( L1) Whale Garden鯨魚花園因為今天突然關閉(於網上也沒有公佈)，所以就介紹唔到，唯有下次再去！其實佢係一個有蓋露天公園(我廢事拎人相，大家google就會睇到！) 「多元智能玩具公園體驗旅程」網上預約 https://goo.gl/6vGs8W 「多元智能運動體驗旅程」網上預約 https://goo.gl/C7NwPr 登記完之後, 會有電郵通知(不過如果前一兩日預約，佢哋未必覆得切), 以下係佢email回覆嘅內容： 「感謝閣下的查詢。閣下完成網上登記後，請於一星期內親臨L1中央公園付款，以完成預約程序。」 咁係咪要正日去之前專登搵日落去俾錢先叫完成預約？(不過平日去都唔駛預約嘅) 同埋其實佢email回覆收費亦是即場繳付(入場時要除鞋, 記得要著襪) 我哋排咗5分鐘就到12:00! 啱啱開始當然有好多地方未做得好！ 佢搭正12:00先至開始逐個人收費入場，其實大家一早在12:00前已經排好隊 而且佢個收費系統都幾慢，處理一個收費(即一大一小)都要差唔多30秒至1分鐘，所以排在較後的朋友，只係等收費可能都用咗佢哋5-10分鐘，其實我覺得可以先收費，然後讓人進入再等侯！ 呢度有9個Locker，但係冇得俾你用！職員話全部key唔見哂...(滴汗) 呢度都劃分咗好多個BB車停泊位 呢個場地另外會劃分部份時段舉辦體能遊戲訓練班，應該有專人用專業技巧從專業角度去訓練小朋友！ 因為我哋排好前，所以Hysan一入到去就即刻除鞋一支箭飛咗入去 先影幾張環境相俾大家睇吓先，下圖望向較前嘅地方嗰度係唔同贊助品牌檔口！ 點擊圖片放大 +5 其實同場多數係2-4歲嘅小朋友，所以呢個6歲嘅哥哥喺度又跑又跳，真係驚佢撞到其他BB 場內有個火車造型嘅瀡滑梯！個樣幾靚，但係其實玩起上嚟同一般公園嗰D冇太大分別 暫時D嘢仲好新淨，襯仲少人去大家快D去玩喇！ 難得一見嘅鐵皮瀡滑梯，真係買少見少，可以俾依家呢一代嘅小朋友接觸下 呢個特別嘅幾可形狀支架，幾適合小朋友去訓練佢哋嘅大小肌肉 點擊圖片放大 哥哥，你唔好阻住後面個BB玩啦！ 玩吓玩吓開始搵嘢掉啦！ 佢呢個人造草皮都幾舒服，除咗對襪喺上面行都幾有質感 呢個破壞王繼續阻住人哋玩，你睇佢後面一堆都係BB！ 點擊圖片放大 +2 可能大家會擔心玩玩吓離開咗可唔可以番入嚟！如果你喺那個時段一個鐘內要出去就可以問職員拎番條手帶，咁就可以隨時番入場！(p.s. 職員都係認人樣，如果你打算博矇唔係同一個時段出入，可能會俾人捉到㗎) 另外溫馨提示，因為場內Locker不足(甚至今日都冇得用)，所以要注意自己D袋，好多人就咁放喺欄杆旁嘅櫈度(好似哥哥身後個紅色書包)，其實喺商場行緊嘅人好容易就可以伸隻手入嚟拎走佢 我哋玩唔哂一個鐘，差唔多40分鐘度就出番去！ 其實喺愉景新城個fb專頁有個「闖進多元智能世界」嘅有獎遊戲，先喺專頁玩咗個遊戲(睇條片答問題)之後就會得到一個QRcode嚟玩呢個「多元智能挑戰站」 另外仲會有一個優惠券可以使用，係for購買「亞馬遜學園」門票送你「愉快天地」門票，免費入場(下一篇會詳細講) 講番呢個挑戰站，其實簡單嚟講就係跳舞機！開始先Do番你手耭玩的QRcode，跟住開始玩 佢有兩款遊戲，一個係「M.I.音樂世界」，一個係「M.I.邏輯世界」，但係玩法都係一樣 同跳舞氈一樣咁玩，跟住熒幕腳踩上下左右！玩完之後可以在機下邊拎番份精美禮品，係一個身高量度尺 如果分數高的話可以喺番fb專頁個排行榜度睇番！我成績都唔錯㗎，玩咗一次(其他係哥哥玩)就排第六位 整個中央公園都有一條路軌包圍住，你估吓用嚟做咩？ 其實係全港首部室內兒童火車 - 小火車之旅，以下是詳細收費及開放時間(消息截至22/4/2016) (最新消息：小火車之旅逄, 星期六、日及公眾假期開出. 以下係火車開出既時間表: 1) 3:40 2) 3:50 3) 4:00 4) 4:10 5) 4:20 6) 4:30 7) 4:40 8) 4:50 火車票價每位$50, 可於D Central Park 門口購票) 除咗小火車之外，仲有D．PARK森林歷險大巡遊、與D．PARK朋友見面，相信都係周末假日先會出嚟同大家見面！詳細資訊去fb專頁睇會較Update! 隔離就係要大家洗錢嘅地方啦！拜拜L1向L2出發！ Photo by CANON 5D Mark III, Len | EF 24-70mm f2.8L USM 呀劍評分: 9分 呀劍評語: $20一大一細玩一個鐘真係幾抵玩！老實講場內嘅設施唔係特別，同一般會所或某室內遊戲室差唔多，不過個場夠大，適合周圍放電！再去埋隔離個鯨魚花園(免費) 就真係無得頂！ D‧PARK愉景新城( L1) D Central Park中央公園 多元智能玩具公園體驗旅程 - 逢星期四、五及星期日舉行，每節55分鐘，時間可參閱場內告示 - 適合0-12歲小朋友參加 - 費用：HKD$50 - 參與方法：部分節數已開放網上留位 https://goo.gl/6vGs8W 或可親臨D‧PARK購買即場及預售門票 (名額有限，先到先得) D‧PARK愉景新城( L1) D Central Park中央公園 多元智能運動體驗旅程 - 逢星期一至星期六舉行，每節55分鐘，時間可參閱場內告示 - 適合0-12歲小朋友參加 - 費用：HKD$20 (平日)、HKD$30 (周末及假期) - 參與方法：部分節數已開放網上留位 https://goo.gl/C7NwPr 或可親臨D‧PARK購買即場及預售門票 (名額有限，先到先得) D‧PARK愉景新城( L1)「多元智能兒童全能跑」 日期：4月23日 - 6日23日 時間：下午3:00 - 晚上7:00 (一至五)/ 中午12:00 - 晚上7:00 (六、日及公眾假期） 地點：D．PARK 愉景新城 L1 中庭 費用: $50(每節6分鐘) 適合對象: 身高110-150cm小朋友 -參加者必須脫鞋及穿襪方可進場 「全球最大硬紙板雕塑迷宮活動」 凡於D‧PARK愉景新城之商舖消費，星期六, 日或公眾假期, 憑每張有效的當日機印$100 或以上發票, 即可參加全球最大硬紙板雕塑個迷宮一次, 每次10 分鐘 小火車之旅逄 星期六、日及公眾假期開出. 以下係火車開出既時間表: 1) 3:40 2) 3:50 3) 4:00 4) 4:10 5) 4:20 6) 4:30 7) 4:40 8) 4:50 火車票價每位$50, 可於D Central Park 門口購票 地址 香港青山公路荃灣段398號愉景新城L1 ----------------------------------------------------------------------------------------------------------- 剛玩夠中央公園嘅多元智能運動體驗旅程，依家到亞馬遜學園繼續玩！ 我哋離開咗中央公園之後就搭扶手電梯直上L2，經過都見到好多影相位！ 為咗一配合番亞馬遜學園呢個題，L2周圍都做咗唔少熱帶雨林嘅影相位置 由L2望番落去L1中央公園，L2亦設有一條長扶手電梯直達L3 L2設有「童話公主講故事」專區，都係要假日先至會開放！ 行咗兩步見到「亞馬遜學園」啦，但係原來呢個唔係入口，呢度係場內最末端嘅位置 去到Baleno門口對面呢個位置先至係「亞馬遜學園」嘅正門入口，門口側邊有隻大啄木鳥好易認！ 呢個學園主張訓練小朋友的「自然智能」及「音樂智能」，其實簡單嚟講都係一個字「玩」 仲記得我上一篇介紹過，在D.Park fb專頁玩過遊戲之後會得到一個優惠券，可在你購買「亞馬遜學園」門票時送你「愉快天地」門票 所以你買「亞馬遜學園」門票，記住同職員出示此電子優惠券，「亞馬遜學園」門票有D貴，小童$50，成人$30，總共要$80，如果周末假日仲要小童價俾多$10 優惠券使用後職員會俾條綠色手帶你，之後可以到「愉快天地」免費玩(但要留意開放時段，因某些時間設有收費課程) 網上預約 http://goo.gl/forms/xNnZWsrqVa 未入場門口已放了一架小型電動車，但係職員話唔係for玩，只係for影相！(笑了) 「亞馬遜學園」設有一個等侯區，即使未夠鐘大家都可以先付費後在此等侯玩住先 正式入場玩lu...入到嚟已經見到一籃籃嘅蔬菜生果，像真度都幾高㗎！小朋友見到一定會好開心 以熱帶雨林為主題的學園，整個環境都好色彩繽紛！哥哥先找著一隻馬嚟騎！ 這裡都分為幾個區域，先係「動物合唱團」故名思義就係培養小朋友對音樂的觸角及興趣的地方，設有些音符氈及小遊戲等 點擊圖片放大 +3 行前少少就係「亞馬遜雨林歷奇」有「自然智能」及「自省智能」原素的區域 其實我諗咗好耐點玩會訓練小朋友有「自省智能」呢？ 呢度設有一個黑暗通首，哥哥起初唔敢入去，陪佢入咗一次之後就自己無限次進出 我諗番轉頭，唔通就係當小朋友走入去嗰幾秒鐘，因為裡面黑媽媽就係訓練佢「自省智能」 不過唔駛咁認真嘅，整個學習樂園都係商場嘅一種Gimmick！ 再行前D有個小小嘅攀石牆，哥哥玩過咁多次真係得心應手，唔駛5秒就爬到最高位！ 呢個琴鍵造型嘅攀爬滑梯都幾得意！ 無端端路中心又放咗隻船喺度！地面上一格一格嘅藍色液體好得意，當你踩上去嘅時侯可以做出唔同嘅效果 點擊圖片放大 爬過條橋望番落去L1，見到鯨魚花園同埋巡遊嘅裝備！可惜今日嚟嘅時侯鯨魚花園關閉了，官方網又沒有公佈，這點令專程嚟嘅人好失望！ 繼續向前行有好多唔同有音樂原素嘅設施 點擊圖片放大 +2 呢度都設有瀡滑梯設施！ 去到場內最末端位置(即剛才以為正門入口的那處) 有一個投射遊戲，它預設了很多遊戲，當每玩完一個遊戲之後會自動隨機開始另一個遊戲，這處可訓練小朋友的反應及敏捷度 哥哥喺呢度都玩咗好耐 點擊圖片放大 +3 最好玩係呢個氣墊球！我哋用腳當波咁踢...佢個接觸位都Detect得幾好，唔會俾自己個影遮住就冇反應 呢個物品回收分類遊戲都幾好玩！不過有D難玩 喺L2望番去另一邊會又見到「紙板迷宮」希望佢第日連平日都會開放！因為周末假日我都唔敢想像要排幾耐隊 番過嚟咩都玩吓！我喺度諗今日得我一個就鍾意玩咩都得，如果假日咁多人，每個遊戲都有小朋友玩緊，連馬仔都俾人騎哂，可能真係一個鐘內玩唔到幾多嘢！唔通真係俾$80入嚟瀡滑梯咩(所以小編暫時都建議大家未必要付費玩「亞馬遜學園」除非佢將來有機會減價) 點擊圖片放大 +3 頭先個熱帶雨林黑暗通道外有個「音樂動感舞台」其實即係玩xbox跳舞Game 但係跳舞嘅動作都幾難跟，唔似係俾小朋友玩！大人玩就啱D 點擊圖片放大 +2 我哋大概玩咗40分鐘度接近2:00pm又離開咗「亞馬遜學園」，因為下一場「愉快天地」嘅開放時間係3:00pm，所以先去食少少嘢再去玩！ Photo by CANON 5D Mark III, Len | EF 24-70mm f2.8L USM 呀劍評分: 6分 呀劍評語: $50一細$30一大，其實真係唔太抵玩(雖然佢有優惠免費去埋愉快天地)，因為大部份設施都係普通會所兒童遊戲室有嘅嘢！我個人意見唔太建議大家去呢個亞馬遜學園玩！ Amazon Academy亞馬遜學園 多元智能音樂及歷險旅程 簡介 - 逢星期一至星期日舉行，每節55分鐘，時間由中午12時至晚上7時 - 適合3-12歲小朋友參加 - 費用：HKD$50 (平日)、HKD$60 (周末及假期)，成人每位HKD$30 - 參與方法：部分節數已開放網上留位 http://goo.gl/forms/xNnZWsrqVa 或可親臨D‧PARK購買即場及預售門票 (名額有限，先到先得) 地址 香港青山公路荃灣段398號愉景新城L2 ----------------------------------------------------------------------------------------------------------- 玩完「亞馬遜學園」繼續上到愉景新城L3玩埋「 愉快天地」 因為仲有成個鐘頭先到下一場「 愉快天地」，所以我哋先去食D嘢同周圍逛逛 點知發現呢個愉景新城其實周圍都好多免費嘢玩！ 愉景新城現主打親子購物，所以商場每個角落你都見到好多得意嘅休憩設施，抖得又玩得！ 點擊圖片放大 +2 就連Shopping Cart都有心思咁有兒童坐架！只需交低$100按金就可以 L3有一排收費兒童電動車，$6搖一次 行前D有呢一個休息處，剩係呢度小朋友已經可以唔駛錢玩個夠！ 點擊圖片放大 +2 每間餐廳門口都設有BB車停泊處，一家大細嚟真係行得好自在 點擊圖片放大 L2見到小忌廉POP-UP Store 點擊圖片放大 落番L1有Toyrus玩具反斗城，裡面有呢個Lego區，哥哥喺呢度已經可以打發咗大半個鐘！ 最痛苦係砌好哂之後下一個小朋友玩之前要將Lego解體 砌咗成半個鐘終於大功告成！ 跟住見到R2D2又玩咗一陣 點擊圖片放大 就連洗手間都咁靚！ 我哋準備上番去L3愉快天地，經過實惠又行咗入去睇睇！係個兒童房間，希望將來可以俾到一個咁靚嘅房間哥哥同妹妹！ 我哋搭L2的長扶手電梯上L3，喺呢度望番落去L1感覺都幾得意！ 我哋3點上到嚟，只係得一對母子在玩！ 其實呢度幾乎同一般私人會所冇咩分別，如果呢度都收$20，咁我情願到中央公園玩lu 網上預約 https://goo.gl/3MxNjH 我哋俾手上嘅綠色手帶職員睇，我哋就可以免費入去 大家如果上嚟之前最好先打電話去問一問「愉快天地」嘅時間表，因為佢唔係每個時段都開放俾公眾「多元智能邏輯及語文旅程」$20 除咗「多元智能邏輯及語文旅程」仲有「英文主題語境學習課程」收費$150(另外預約)，仲有星期三及六1:00pm會設有一個「英文主題語境學習免費體驗」 有閱讀圖書區 同埋呢度比較適合3歲以下小朋友，大部份入場嘅都係BB 當然哥哥去到邊度都係可以玩一餐！ 佢差唔多大部份時間都係留喺呢間屋度砌磚，然後砌完之後就.... 點擊圖片放大 +6 其他設施就冇咩興趣，因為佢已經超齡了！反而之後識咗個3歲小朋友，同佢喺場裡面玩「捉依因」真係冇佢修 Photo by CANON 5D Mark III, Len | EF 24-70mm f2.8L USM 呀劍評分: 7分 呀劍評語: 如果同樣係$20，當然會玩番中央公園個多元智能運動體驗旅程 Kiddy Place 愉快天地 多元智能邏輯及語文體驗旅程 簡介 - 逢星期一至星期日舉行，每節55分鐘，時間可參閱場內告示 - 適合0-12歲小朋友參加 - 費用：HKD$20 (平日)、HKD$30 (周末及假期) - 參與方法：部分節數已開放網上留位 https://goo.gl/3MxNjH 或可親臨D‧PARK購買即場及預售門票 (名額有限，先到先得) 地址 香港青山公路荃灣段398號愉景新城L3 (以上資料更新至文章當日)
